O FAO O LE MAUGA TALUSᾹ UA TATOU PENEI AI

28 February 2016, 12:00AM

E le uma le faafetai ma le faamanū i le Atua aua ua na aumaia Samoa i le manuia, i lenei vaiaso faai’u o lenei masina o Fepuari.

Ua toe foi o se aga ona tatou aulia lea o le Faiga-Palota o le 2016. . Ae ui o lea, tatou te le o iloa poo fea o lafilafi ma tilotilo mai mala ma puapuaga, e aofia ai le maliu ma le oti.

E i ai foi le talitonuga o le to’atele, ua sopoloa le malaga a mala ia Samoa, ona o loo aliita’i Samoa i le Atua. Peitai o le talitonuga o le tusitala, o le manuia ua sapi ai nei Samoa, e mafua ona o Lona Natura tutumau o le alofa ma le faamaoni. O le pogai lea o le manuia o Samoa i soo se vaega.

O le viiga lea ma le faafetai i le Atua. Ae alo maia se’i o tatou talanoa e pei ona masani ai ma le ‘aufaitau o lenei nusipepa, aemaise ai foi le mamalu o le atunuu, o loo fiafia pea e silasila ma faitau i lenei tusitusiga.

O le autu o lenei talanoaga, o se tautua mafaufau lea e uiga i le pogai o nei faafitauli ua tatou feagai ai i le taimi nei. E le o se faatonu i le atunuu, ae ua na o se lagona ma le faamoemoe, o le a maualafia ai se tatou talanoaga, e ala i ni tusitusiga i lenei lava nusipepa. 

O Fao, o le mauga aupito i maualuga lea i Tumua nei, ma e i Fagaloa. O Fao, e tu talafeagai i uta ma Malata, lea e taula’i i ai le atu-lagi o loo i Uafato.

E faapea le tala-o Malata sa afio ai Tagaloaalagi, ma e faalupe e Tulatoa-o le Malae o le Toto’a, aua na muta ai le fasi a Lufasiaitu i le Aiga o Sa Tagaloaalagi, ae faaipoipo ai loa ma le tama’ita’i o Leamoā, poo Lagituaiva,o le afafine o Tagaloaalagi. O lenei atulagi i le aga’i i Malata, sa i ai le Fale Pou Selau, o Tuiatua Lufasiaitu, e pou i tagata ola sa tapu’e solo atu i Samoa, faatasi ai ma lana Pa-Moa e Sa.

O le va-tapuia o Fao ma Malata, e tausi mamalu. Afai mo se faata’ita’iga, o le a ulufia Fao, e muamua ona faatulou ia Malata. , e faapena foi Malata ia Fafo. O le mea la e masani ona tupu, afai o le a laasia ae leai se faatulou, ona faatotō ifo lea o le timu e Fao, e faa-tatafe ai vaitafe, ae malaia ai le Aiga o Tagaloaalagi.

Afai foi e laasia Malata e Fao, ae lē faatulou, ona feitai foi lea o le Aiga o Sa Tagaloaalagi ma feau le utafanua o tagata o Fao. E lelei lava la Malata e to’a, aua foi o loo i ai le Malae o le Toto’a, ae o Fao, e lē to’a, ona o lona maualuga ma lona malosi, ona faasaga ai lava lea e faatupu le pologa ma le puapuaga i le aiga o Sa Tagaloaalagi. 

O le upu “talusā”, o lona uiga o le faatupu mala, o le faatupu mala ma le faamaualuga o Fao, lea ua pagatia ai tagata o Malata, ae o Malata lava ia o le Malae o le Toto’a.   O le uiga moni la o le ulutala o lenei talanoaga-o le faatupu mala o Fao poo le Malo ua tatou penei ai. O le faamaualuga o Fao  poo le Malo, ua pagatia ai Malata poo le atunuu, ona o le mitamita vale i lona malosi ma lona maualuga.  

I nei la aso ma le tulaga ua i ai si o tatou atunuu,o le mea moni ua tatou pagatia  faatasi i le faamaualuga ma le fia malosi o Fao. Pau lava le mea a Fao o loo fai nei, o le tagi atu lava o le atunuu, faatotō mai uaga, ona tatafe ai lea o vai ma alu atu ai ma le faitau miliona ma miliona o tupe a le atunuu! 

O le a le pogai ua faapea ai? E pogai ona o i tatou; e lē mafua mai le Atua, a’o tatou loto lava ina talusā., loto o mata’u e le tonu, ae o loo tumau pea le malolosi o e malolosi. Ua faataua le lape ma le ‘aleu ae galo le tagata o loo ati afi.

O le mea ua tupu, ua faatau loto, ae galo le tatā. Ua ututau amio ma faiga, ae usi le loto i le tautua matavela. Ua avea le maualuga ma mea ua le iloa ai le ‘auvae-mauga. E mafua isea? Ua malepe lou Faavae na faata’oto e matua ua tofafā mai Tia.

Na fai e matua le Faiga-malo e fai ai ni Vaega Faa-Upufai? Afai e leai, o le a le mea ua sui ai? Fea la o i ai le faamaualuga o Fao? E aumai le faamaualuga lena e toe totogi ai tupe a le atunuu ua faaalu ma le faatautala e le Malo. Tafefe alii ua pei lava o ni tupe a outou aiga?

Ua pei lava o ni tupe a sou tamā! Tafefe alii i lo outou lē fufu’e ua o’o i eleele  o le atunuu o ana esetete tausi ua uma ona outou faatau e pei o outou lava fanua ma faaaoga sese tupe e faatau ai a outou taavale. A faapefea la tupe a le atunuu na faaaoga sese e se Minisita o le Kapenet Aisea ua faigata ai i le Palemia ona fai se faaiuga i lea mataupu pe afai lava o ia o se ta’ita’i lelei? Ua ta fia faalogo poo fea se aso a’o se taimi e fai ai se faaiuga a le Palemia.

E ui lava ina fai mai nisi na te le mafaia ona fai se faaiuga, ae ua lava ma totoe le leai o se faaiuga e faia i lea mataupu, ma faamau-faailoga ola, o le leaga ma le mata’utia o nei mea o Vaega Faa-Upufai ma e lē o se faiga-malo lea e talafeagai ma Samoa. 

O le faaaoga la o le malosi e pei o Fao, e na o le oti o le tagata le mea e maua ai, ae o le to’ato’a malie ma le faautauta poto, o le Malae lena o le Toto’a. Ae ia manatua- “e na o le Malae o le Toto’a e fia nofo ai le Atua, ae inoino i le amio a Fao. O le faiga-malo foi e amio faa-Fao, e na o le malaia o tagata e maua ai. O le manuia foi o le atunuu, e lē sailia i le fia maualuga ma le fia malosi, ae saili tonu lava i le Malae o le Toto’a.

O iina tatou te vaaia ai le Nuanua o le Feagaiga, ma le Afu o le amiotonu ua tafe ifo, e faaola ai tagata ua galala i le fia manuia. Tagata ua afaina i le saua o Fao ma ana faiga, ona o le faataute’e ia Malata ma le Malae o le Toto’a, tagata na tafefea ma lofia i mala, talu ai fuafuaga ma faufauga a Fao, le Mauga talusā ma le faatupu mala. (Ia Manuia le Aso Sa)


28 February 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>