O la’u tala fo’i

28 February 2016, 12:00AM

1. Matauina i Tala Fou se faaupuga a le Palemia fai mai e “Faaaoga lou mafaufau”-ma o lea faaupuga e peiseai e fai aga’i ia i latou o loo fia avea ma ta’ita’i o le Malo; ma o le lapata’iga la a le Palemia-fai mai e le’i tuuina atu ia te oe le suafa matai e te saofa’i ai luga.

O lona uiga fai mai- e tatau ona faaaoga le mafaufau- ia matai ona e alu e asi lou nuu.

O le mau lava a le Palemia-a e fia ta’ita’i-e tatau ona e tautua muamua. E te alu e asi lou nuu ma fai lau monotaga-ina ia taunuu ai afioga a le Atua a fia avea oe ma ta’ita’i-e tatau ona e auauna muamua. Ia- e malie tatā lava i le faalogo faaupuga a le Palemia-ae o le fesili- sa na faatinoina lea tulaga ina ia mafai ai ona avea o ia ma ta’ita’i?

Ia manatua la –o le afioga a le Atua e faasino i Ta’ita’i lelei, ae le o ta’ita’i e faafoliga e lelei? A tatou tilotilo la i le tautua lea e pisa ai nei poo le monotaga- o ai e aumai ai le faamaoniga o loo fai le monotaga a Pai poo Lafai?

O se mea lea a le aiga e faasino i ai le matai poo le nuu ma le itumalo? Afai la o loo tautua le matai i lona aiga-o le aiga e aumai ai le tonu-ae le o le nuu aua e le o iloa e le nuu le anoano o isi mea o loo faatino e le tagata e tautua i lona aiga!

Ae o le mea tonu lava ia-o lenei mataupu o le tautua-sa le faatauaina tele i palota ua mavae-se’ia vagana ai le palota o loo loma nei! O le a la le pogai ua faataua ai i lenei taimi? E faapefea ona outou iloa le tagata o fai lana tautua ma le tagata e le o faia se tautua? Ae faamata e fai ni a outou tautua pe ana outou le fia avea ma faipule? O le a sou taofi? 

2. Matauina ma le ofo tele se tasi o matai Aleipata Itupa i Luga-o se alii fomai ua leva ona tautua i lona itumalo ma le atunuu lautele i lana galuega o le foma’i- toe tautua i lona aiga-ae o lea ua faaleaogaina lona tulaga agavaa e avea ai ma sui tauva mo le faiga-palota.

Ua manino mai la i lenei mataupu- ua matua nenefu atoa le lalolagi pe o le a le ituaiga o tautua e le o faia e lea Sui Faatu ma o se alii fomai foi i lona itumalo ua mafua ai ona faaleaogaina lona tulaga agavaa. E mafai la ona tali mai se tasi poo le a tonu lava le ituaiga o tautua lea o loo faatauaina e le Tulafono. O le aganuu la a Samoa-e na o le lua lava ituaiga o Tautua. Muamua- o le Tautua Tuavae.

O lona lua- o le Tautua Matalilo. O le Tautua Tuavae la- o le laulau o le sua a le matai ma nofo mai ma le ‘apa fafano. O le Tautua Matalilo- e le o nofo i le nuu ma le aiga-ae o loo tautua mamao mai fafo! O le a tonu lava la le ituaiga o Tautua lea e faasino i ai le Tulafono ma o loo faavae ai faaiuga a le Faamasinoga? O le a sou taofi? 

3. Matauina i Tala Fou se ulutala fai mai e to’avalu ua Molia ae o le isi o loo masalomia- ua sola. O i latou ia e faapea na latou fasia se tama a’oga mai Fiti lea na o ni nai vaiaso talu ona taunuu mai i Samoa nei.

O lea la tama a’oga mai Fiti ua auina atu i Niu Sila mo ona togafitiga ma o lo i ai pea i se tulaga faigata. O i latou la o loo masalomia i lenei faalavelave ua molia i le faao’o o ni manu’a matuia-ma afai e maliu lea tama a’oga mai Fiti-o le a molia loa i latou i le fasioti tagata!

O le fesili la-aisea ua le mafai ai ona saogalemu tagata ese i totonu o Samoa? Afai la o lea tatou te taumafai e faatosina mai tagata tafafao i Samoa nei-ae o le tulaga lea e o’o i ai talu ai nei tamaiti faatautala-o le a le tulaga  e ono o’o i ai Samoa? Faamata e toe fia o mai nisi iinei pe afai latou te iloa e feoti ai? O le a sou taofi?

28 February 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>