LAUGA - “Alu ia oe, auā ua auina atu oe e Ieova”

RP
By Rev. Petaia Setu, 19 March 2017

(I Samuelu.20:22)


E manatua pea upu a le Valasi i tu’itu’i o lona alii. “E ā oulua nei, e ā a’u taeao.” Ua le nofoia le nofoa o Tavita.

Ua lafi i le vao, sulu i le mauga. Ua su’e mala le tausi manu auā ua loto le tupu o Saulo e fasioti ia te ia. Ioe, o nei e ta’a ai le fili; o taeao e seei ai le nofoalii.

O le valo’aga lenā a le perenise o le mālō, ua tautino ma le mautinoa i si ana uō. “Faauta, o ū o loo i ou tala atu. “Alu ia oe, auā ua auina atu oe e Ieova.”

E le toe tau faamatalaina le mafutaga a le alo o le tupu ma le atalii o le fai lafumanu. Ua pine le feagaiga (f.14-17). Faamasino le ū (f.21-22). O le faaiuga, tă’ape (f.42).

A o le itū tāūa, o le loto malamalama ma le lelei na tuu e le Atua i nei taule’ale’a talavou, e fau ai lo la talitonuga i ala o le Atua, i pulega a le Atua, ma le faamoemoe o le Atua. Manatua foi Samoa, o le mea muamua lava lea na tu’u e le Atua i le lalolagi, o le malamalama. Aisea? Ina ia manino ai mea uma.

Ia maioio lelei mea taitasi uma. E faigofie ai mea uma. E fai mălie ai galuega uma. Auā e nenefu loa, vevesi.

E pogisā loa, pisa. E lē malamalama loa, malepe. Tă’ape! Lea e alia’e i le tele o aiga, nuu, aulotu ma faalapotopotoga. La lea ua malomaloā ai le lalolagi i le laufalī Uelese i le ipu o le lalolagi.

Ua faitioina ai le IRB ma le SRU! Ua fesiligia ai le faamaoni ma le auaunaga a nisi o tagata faigaluega ma nisi o matagaluega a lo tatou malo! Ua onosi solo ai tagata lotu i le lē mailoa poo le fea tonu? Ua oo lava ia Saulo, ua galo ia te ia o Ionatana o lona atalii! (f.33)

A o Ionatana, ua faapei o le uiga o lona igoa (‘ua tuuina mai e Ieova.’) Ua faautauta o ia. Auā ua tuuina e le Alii le Atua i lona loto le malamalama ma le faatuatua na te mautinoa ai le faamoemoe ma le tōfā paia a le Atua o Isaraelu ia Tavita lana uō. Amene. (I Sam.23:17) O lona talitonuga e mai le Atua lenei mea (I Sam.15:26-28). O lana upu, O Ieova. ‘Ua auina atu oe e Ieova.’

E lē o se avane ai! E lē o le gutu na faapogai, a o le loto. Ua fai mautinoa, o le ala mai le Atua. Ua ta’utino ma le manino, o le pule a le Atua. Ua lafo i le malamalama, o le tofa moni lea mai le Atua – Alu.

O le alu mai le Atua. Ae alu la i fea? O fea ’a fetulina’i solo ai lenei tama e pei e leai sona aiga? E lē i iai sona aogā i le tupu ma le nuu? A o le ā se tulafono ua ia soli? Faalogo ia Ionatana, ‘Tavita, ia ia te oe foi Ieova, e pei ona sa iai i lo’u tamā.’(f.13) Ioe, o le auauna ua filifilia faapitoa e le Atua, ma faauuina e le Atua, ma mata’u i le Atua, e le te’a ese ai le Atua. (I Sam.16:13) E aogā le alu ese mai le lalolagi. E le tatau ona nofo pea i le pouliuli, ae ao ina vavae ese mai le agasala. (Ken.12:1).

O Tavita, o le faapolopolo a le Atua. Ua auina atu e le Atua i le vao, e tapena mai ai mo taeao. E te silafia Samoa, o tagata ta’uta’ua o le Tusi Paia, e le o ni pulu o le Tertiary Education.

A o le mata’u i le Atua, sa a’o’oga ai i le ala sopo (Aperaamo); i le toafā i Patanarama (Iakopo); i le vao o Mitiana (Mose); i le Esoto (Iosua); i le vao (Tavita); i le ala i Tamaseko (Paulo); i le motu tuufua (Ioane); i le, ma Iesu i le fagafulu aso i le vao.

ADVERTISEMENT

E le tioa Ionatana ia Tavita, ‘Alu. E le o iinei lou faleaoga. O le vao. E a’oa’o le Atua ia te oe. Samoa, o le manaia ia o se tagata ae a’oa’o e le Atua. E iloa ai foliga o le Atua. E faamaoni, e alofa, e agamalu ma le loto maualalo. E fai ma tonu ma tautala sa’o. ’O ’e iloa le mea o loo e alu iai?

A o ai o loo i tua o lou alu? Poo fea lava e faasino oe e le Atua e te alu iai, alu. Ia mautinoa o le Atua, ae le o le poto o lenei lalolagi. O le tapenaina o i tatou e le Atua, e aofia ai le aoaoina, o le tofotofoina, o le faa’auupegaina, ma lona taimiina.

O Tavita na faauuina e fai ma tupu i lona talavou. Ona fetamo’ea’i solo ai lava lea o le taule’ale’a i ana feau masani a o le tupu! Momo’e ma le ’ie’ie i le vao e faainu ma fafaga le lafu. Momo’e i le aai e fafaga Iese, a o le tupu! Tamo’e ma le tau ’ato’ato ma le agaese e sui manu.

Toe tamo’e i le aai e vaai lona tamā, a o le tupu! Na te le i sii se matālālāga pe foua le nofoaiga a Saulo.

Aisea? Lima tausaga talu ona faamauina o fetamo’ea’i ma ausulusulu solo i le vaomatua ma tumutumu mauga, e tusa ma ala o le Atua e a’oga mai ai. ‘Auā ua auina atu oe e Ieova.’ Ioe, o loo i le Atua lou taimi.

E sa’o lava le sa’otamaitai a Asiata, “E a oe nei o a a’u taeao. O le tele o le ‘au fai faailoga, ua vaaia ai le faafiapoto ua fufula ola. Fo’i mai loa ma kikeli, finau loa i le totogi e sii.

Pale loa i le suafa o le aiga, faavava loa i luma i le saofa’iga. Faauu loa i le togi faifeau, pei a lea nai toeaiina ma nai lomatutua o lona fanau. Ae tofi foi e fai ma CEO, Ona sisi faasoloatoa ai lava lea e le toe punou. Ia e manatua, poo le ā lava lou tulaga sinia, ia e iloa la oulua feagaiga ma le Atua. E faamasino lona to’asā. O lana faaiuga foi, e a’oa’oina ai oe.

Faafetai ua le faasesēina Ionatana i le pouliuli o le lalolagi o loo fēsēa’i ai lona tamā. Ua mau lona loto i le loto o Tavita (I Sam.18:1) Ua ia te ia le ola alofa, ola tausi feagaiga, ola mama.

A o lea foi ola e pei o la Ioane (1:4), o le malamalama lea o tagata. I le o lea lava malamalama, e inu mălie ai i faigata ma luitau o le olaga, ma faaeaeaina ai mai le maa tui ma maa gao o le siosiomaga, seia ’ula i le manogi o le faaolataga. Samoa pele e, e le o aso uma e taugalemu ai.

O le aso e ma’ona ai, ma le aso e mativa ai. O le aso e siva ai, ma le aso foi e tagi ai. O le aso e faaputu ai, ma le aso e faata’ape’apeina ai. O aso e talileleia ai, ma aso e tuulafoaiina ai. O le aso e tu ai, ma le aso e malolo ai.

E afua mai fea? E tele ina tatou fana le ū i ou tala mai. Piki mai le ū i ou tala mai. Ua vaai i le vave. Ala puupuu! Ala faigofie! E musu i le vaomatua. E le fia aoga i aavae mauga. Inoino i le palapalā? Maasiasi i le ’ie’ie ma le tau ’ato’ato! Samoa, o le upu amata o le olaga tautua , E te ‘ai au meaai ma le tigā i aso uma o lou ola.

E afu ou mata (Ken.318-19). E le inu fua oe i le ola ma le malosi o le isi. Na pei o le ’alu’alu toto le afu sisina o Iesu i le eleele ona o le manulautī sa aoga ai i le fagafulu aso i le vao, o le faaolaina o oe ma a’u. (Lk.22:44) Alu la ia. Go for Christ! “Auā ua auina atu oe e Ieova.”

 

Amene

7737063/7783782

RP
By Rev. Petaia Setu, 19 March 2017

Related Stories


Bg pattern top

Sign in for free to read more stories

Bg pattern light

UPGRADE TO PREMIUM

Subscribe to Samoa Observer Online

Enjoy access to over a thousand articles per month, on any device as well as feature-length investgative articles.

Ready to signup?