Mana’omia se fesoasoani tau suavai

AL
By Aruna Lolani, 19 March 2017

O le vai o le ola lea o so’o se tagata soifua. 

O le maua ia le fa’atalatalanoaga ma le tinā ia Sarafina Fatialofa mai le afioaga o Lotofaga    

I le leai o se tane vai, e tele lava mea latou te le mafai ona fai.

“E tele lava fa’afitauli i le vai i le matou nu’u,” o lona manatu lea sa fa’aalia i le Fofoga Samoa.  

“O le tele o taimi e tipi ai le vai. A o’o la i le taimi e tupu ai, ia matou te o lava e su’e se vai. 

 “Ia na ua e silasila mai i tua ole matou fale, e leai ma se tane vai o iai. 

Sa fa’aalia e le tina 47 tausaga lona manaomia tele o se tane vai mo lona aiga. O le taimi nei o lo’o fa’aaoga e latou tane vai a isi latou aiga e nonofo mamao mai ia latou.

I taimi e pe ai pe tipi ai foi le vai, latou te savavali solo e su’e nisi tane vai e maua ai ni latou vai. 

“O le tele o taimi e leai ai se matou vai e maua. O le manatu fa’aalia lea o Sarafina.

“E pei o se mea lena o lo’o mana’omia i lenei itu. E fia maua se matou tane vai ina ia faafaigofie ai fo’i le maua o se matou vai ma mafai foi ona sefe ai a matou vai,”

ADVERTISEMENT

 “E leaga foi aua ole tele o taimi e le timu.

“E le faigofie se soifuaga pea leai se vai e maua. Talu na matou omai i lenei itu le vaitaimi ole sunami, ole fa’afitauli a lea matou te mafatia ai. 

 E to’afa le fanau a Sarafina ma e tua lava latou mo meaai mai le sami.  

“O le taimi nei matou te le mafaia se tau o se tane vai aua o matou tupe maua e o uma i mea e manaomia e le matou aiga.

 E ui lava i lenei tulaga faigata, e le’i fa’avaivai lava Sarafina i lona olaga i totonu ole nu’u. 

“O le vai a le mea o lo’o matou mana’omia ae o lo’o lelei pea lo matou olaga ma soifuaga i le matou nu’u. 

 “E leai lava sesi itu o matou tigaina ai ae na’o le vai lava.”

“Ou te talitonu o lo’o iloa uma e tagata le leaga sa iai i le taimi ole sunami, e toatele tagata ua le toe fia nonofo ii nei ae peitai o se mea lava na tupu faafuasei i lena aso. 

 “E faigofie le olaga ii nei, matou te maua uma lava mea e tatau ona ola ai vagana ai se suavai.

 “O lo’o lelei le matou aiga, lelei matou meaai e maua mai fagotaga.

 “Pei se itu na ou te lagona ai le loto fiafia, ona matou te le’o fa’amoemoe i sesi tagata e faia lenei galuega mo i matou i aso uma. O lo’o ou ola lava a’u ia i galuega a o’u lima ma la’u fanau.  

“E tusa lava pe le tele se matou tupe maua, matou te taumafai pea i lenei olaga. Ia e faatau foi a matou fualaau aina ina ia maua ai foi sesi tupe. 

AL
By Aruna Lolani, 19 March 2017

Related Stories


Bg pattern top

Sign in for free to read more stories

Bg pattern light

UPGRADE TO PREMIUM

Subscribe to Samoa Observer Online

Enjoy access to over a thousand articles per month, on any device as well as feature-length investgative articles.

Ready to signup?