AGANU’U MASANI PE A FANAU MAI SE TAMA POO SE TEINE- Mai le Tusi o le “Suaga a le Vaatele”

24 July 2016, 12:00AM

O le fanau mai o se tamaitiiti i totonu o se aiga Samoa-o se fiafiaga tele lea- ma e le popole le tina poo ai e tausia le pepe-aua ua tumutumu lea aiga i le ‘au-tausi tama’ ma tagata o le aiga- a o le’i taitai ona fanau mai lea pepe. E taiulu i le ‘au-tausi tama ma tagata o le aiga-le tina o le tinā fou.

E auai lona tamā poo lana tane i lenei vao o tagata, afai e le o tatalo i le atua o le aiga mo le saogalemu o le tamaitiiti-ia poo le folafola i atua na te avatua soo se taulaga ia te ia- pe afai na te puipuia ina ia saogalemu le tina ma le pepe. Afai e tuai ona tali mai le atua o le tane lea na tatalo i ai-ona saili foi lea –o se isi fesoasoani a atua o le aiga o le fina fou.

O le atua e muamua ona tali mai-o le a faamanatu pea ona aso faailogaina a’o faagasolo le olaga o le tamaitiiti. O nisi o taimi- e masani ona faaigoa ai le tamaitiiti i le igoa o le atua- lea e muamua ona tali mai i talosaga-ma faalauiloa ai loa lea tamaitiiti-“ua paia mo lea atua.” O le talosaga lea- e maua ai e le tamaitiiti le puipuiga atoa a isi atua uma lava o le aiga.

O loo faamauina e Misi Tana e faapea- a fanau mai o se tama, ona ave lea ua tipi lona pute i luga o se “uatogi” ina ia tupu a’e e toa i taimi o taua. Afai o se pepe teine-ona ave lea o lona pute ua tipi i luga o le ‘upeti’ e fai ai le siapo-ina ia tupu a’e -e aoga i lona aiga i le gaosiga o le siapo- lea o loo fai pea ma fatuaiga tausi a tamaitai o Samoa.

E ui lava la i le eseesega o nei sauniga, ae leai se uiga faailoga-tagata e pogai ai. O le fasiotia o tamaiti-e ui lava ina mafi ai isi motu o le Atu Polenesia, ae peitai-e le’i tupu lava i totonu o Samoa, se mea faapea-ma e leai foi ni tamaiti e faapea sa fasiotia. E faapelepele tele i ai aiga i le taimi e fanau mai ai.

Ae ui o lea-o le aganuu e faaumatia ai- a’o le’i fanau mai-ma o loo faamaumauina e faapea sa i ai pea-ma o mafuaga autu o le “faalumaina ma le popole ne’i faasalaina.” I lo’u lava taofi-o mafuaga e pei ona faaalia-e ao lava ina tatou silasila toto’a i ai ina ia mafai ai ona faamasinoina ma le tonu-tama’ita’i o Samoa-i aso anamua e tusa ai ma le tulaga sa i ai -atoa ai ma le malosi o le aganuu lea sa faamalosia ai latou-ina ia tausisia pea poo le faasalaina. I aso anamua-o le fanau mai o se teine i se aiga o se Tamalii poo se Tupu-o se faamanuiaga lava lea.

Afai o alo o le tamalii –o tama uma, o le fanau mai la o se teine-sa faauigaina-‘o le faatupu filemu lea’ pe afai e masesei ona tuagane. O lea ua faaigoaina ai- o le “Feagaiga” a le Aiga poo le “Augafaapae.” I taimi o le fefulituaa’i ona o taua, sa masani ona ofo atu se “Tama’ita’i” e togiola ai lona aiga, nuu poo le itumalo i se tamalii ua manumalo i se taua.

O loo faamatalaina i Talatuu le tala ia “Leamoā le alo o Tagaloaalagi lea na ofoina atu ia Lufasiaitu o Fagaloa-e togiola a’i le Aiga o Sa Tagaloaalagi. Sa faapea foi ona ofo atu Tuatuamamao le alo o Sagapolutele o Ulutogia ia Tamafaiga o Manono-e togiola a’i Atua. 

O le ofoina  atu la o nei tama’ita’i e fai ma togiola o latou tagata-ua atili ai ona si’isi’i pea i luga le tulaga aloa’ia o le tamaitai poo le tama teine i upufai o le Faavae Popo o Samoa.

O le avea o i latou ma “Feagaiga” a o latou aiga-ua mautu ai le filemu i le va o itu e lua sa fefulituaa’i-e ala i fesootaiga o latou gafa ma gafa tau Tupu o le atunuu.

O lenei sootaga o gafa-o se mea lea e moemiti i ai soo se matai faale-iloga-talu ai-o le ala lea o le a tafe atu ai ia te ia ma lona aiga le tamaoaiga aemaise ai o le saogalemu i taimi o taua.

Afai e sao i matau se tasi o ona suli e suitulaga pe umia suafa matai sa umia e lona tamā, ona ta’u lea o lona suli o le “Ma’upu” e ona tuagane ma latou fanau.

E mafai foi e ona suli ona soloa’i ane i le suafa sa umia e lana tane.Afai o se teine e le’i ofoina atu e fai ma togiola, e leoleo e tagata uma- o lona aiga i soo se mea e alu i ai, e masani lava ona vaaia lelei. E pule lona aiga poo ai ana uo aemaise ai teine o lana tupulaga- i latou ia latou te o faatasi i soo se mea e alu i ai.

E ese ai mai ana uo-le uso o lona tina poo le tuafafine o lona tamā- lea e ta’ita’ia le vaega atoa. Ao tuputupu a’e-o le a vave ona a’oa’o i ai ona tiute. E i ai foi le taimi e tu’u atu ia te ia- e o ai ma ana uo teine e matamata ma faaa’oa’o i le lalagaina o fala ma le faiga o le siapo.

E i ai foi taimi e tatau ai ona fai sona aiga, ona faataga loa lea e auai i talanoaga a tama’ita’i matutua- e uiga i galuega fai a tama’ita’i i le itu i le pulega lautele o le nuu.

O le a faaa’oa’o i le tausiga o tamaitii aemaise ai le faiva o le faatosaga i lalo o le vaaiga a tamaitai popoto faapitoa. E le faatagaina ona femioa’i ma tama talavou- ma e na o le lua lava isi nofoaga e ese ai mai lona aiga-e mafai ona moe ai-ua na o le maota o le aualuma poo le maota o le Faife’au- ina ua taunuu mai le Tala Lelei.

O faiga-uo a le teine- e matua vaaia lelei ma e pule lona aiga i le filifilia o lana tane. E masani ai le aiga ona filifili se alo o se Alii Sili poo se Tupu. E pei ona mua’i ta’ua, o le fesootaiga o le laina o le tamaitai i soo se aia tau-Tupu poo se Alii Sili-o le a mafai ai ona faafesuia’i meaalofa i aiga e lua aemaise ai o le filemu.

O le tamaoaiga e faasino i toga, siapo, paopao ma isi lava oloa- o le a mafai ona solo mai –talu ai lea lava sootaga tau gafa. Afai e ma’i-to le tama’ita’i a’o le’i faia sona aiga-poo ua avaga i se tasi tane-e ese ai i lo le na malie i ai le aiga, o le a tulai mai loa le agaga fia taui ma sui-ma e masani lava ona tupu mai ai taua.

O le avaga- ua lava ma totoe lea e avea ma pogai poo se mafuaga- e tau ai se taua-lea o le a aafia ai faatasi ma le aiga o le tane lea ua aafia-faatasi ai ma le aiga o le tamaitai e faasaga i le aiga o le alii lea ua na faa-avaga le tamaitai.

O le avaga lava ia i le itu i le tamaitai-o se luma lea i lona aiga ma e masani ona faasalaina ai e le nuu. E mafua lea itu ona –afai sa fofoga le nuu e le aia  le tamaitai e fai le faaipoipoga-o lona uiga-sa sauni i ai le nuu i lea faamoemoe i soo se itu. Afai la ua avaga-o lona uiga-ua faalataina le nuu ma ua faalumaina ai lona aiga.

O le “Ie-faa-Tupu” lea na amata lalaga i le aso na fanau mai ai le tamaitai-ae faatoa faamae’a i le aso e faaipoipo ai-ua avea ma “mea-ula”-ma ua leai se aoga.

O lana amio ua faaleaogaina ai ana aia tatau- e avea ai ma Feagaiga mo lona aiga atoa ma ona tagata. (E faaauau pea)


24 July 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>