O LE MAU A PULE-THE MAU MOVEMENT

11 May 2016

Tapena ma Tuufaatasi e Fuimaono Na’oia Faasavalu Touli F. Tupua mo le Samoa Observer. 

Sa matua gūgū Tuimalealiifano e tusa ai ma lea mataupu-ae na matua faate’ia Papalagi i le malosi ma le matuitui o lana saunoaga. Na amata lana tuleiga i lona faapea mai –o ia ua matuā matua lava.

E tumu lo’u loto i le alofa i o’u tagata-talu ai ua ‘ou tofo i mea na tutupu-talu mai ona galue Niu Sila mo tagata Samoa. Ua uma ona ‘outou fai mai –e agalelei Niu Sila, ae o lea ua ‘ou vaai tino ma tofo i ai-e le o se agalelei lea mea. E toatele tagata Samoa, e faitau afe ma afe tagata Samoa-ua tanu i le eleele. O le mea lea-‘ia outou faalogo lelei mai lava ia te a’u.

E tatau ona ia te outou le amiotonu ma le faamaoni. Ia fai a outou faiga e pei ona a’oa’o mai Keriso. Ia outou faamaoni. Aisea tou te pepelo mai ai ia  i matou? O le Tusi Paia o le amiotonu ua leva tausaga talu ona ia i matou-ua faitau selau tausaga-ua outou a’oa’o i matou ma ua matou maua uma na mea mai ia te outou. O le a le pogai o lenei mea?

O outou e mafua ai! O Pulega uma ua mavae na latou aveese o matou ulu. Tou te malamalama i lena mea? Na outou fai mai o loo i ai tagata ua solitulafono, ae faapefea outou?  O loo i ai foi tagata ua latou faia solitulafono o loo filo ia te outou. Ua matou vaaia i le taimi nei- o loo outou taumafai ia maua se mea lelei mo outou mai ia i matou.

Ae a faapefea i matou? Ua na o le fia’ai le mea lea ua matou maua, faata’ape solo i le vaomatua, sami ma soo se vaega o le laueleele. Ua loa ona matou faailoa atu o matou faamoemoega-o mea e mana’omia e le Mau o loo i totonu o le anoano o nei talosaga, ae outou fai mai le a ma le a-ma ua aga’i ina fenumia’i. Na outou fai mai e faamuta le Mau ma tu’u loa le Mau, ae a faapefea lana uta?

ADVERTISEMENT

O le Mau e pei o se va’a o loo i ai lana uta. A pa’ia e le va’a le laueleele-ona la’u ese lea o lana uta. I le taimi nei-o lea ua outou fai mai e faamuta le Mau-ae a faapefea faamoemoega ma fuafuaga a le Mau? Ua uma ona outou fasi le Mau ma fai i ai faiga e le talafeagai ai, ae o lea ua outou talosaga mai e faamuta.A faapefea meatotino a le Mau? Sa ‘ou manatu o le a outou faasaga i se faiga faigofie-e fai se tonu o lea mataupu-ia Iloilo ma le faaeteete, ma a faapefea le fasiotiga o le Mau e pei o ni manu? O se mea lena ua sili ona leaga.

Ua matou malamalama i le aganuu a atunuu malamalama-a sisi’i  i luga lima o tagata-ona lē faapaina lea o se fana. O Outou, le Malo-aisea ua outou lomia faasalalau ai i nusipepa fai mai ua le avatua e le Mau tagata o loo manaomia e le tulafono?

Na matou o atu i lena aso i la matou solo e aunoa ma le iloa- ua uma ona outou faia nisi faiga fetuuna’i! Aisea na outou le fai mai ai- Tuimalealiifano poo Tamasese poo Faumuina, “Aumai ma tuuina mai ia i matou tagata o loo manaomia e le tulafono? Aisea na outou le manaomia ai i matou ina ia tuuina atu na pagota? O le mea ou te manaomia i le taimi nei-o le tuu lea o le Mau ina ia faaauau pea se’ia o’o ina maua le mea o loo ona mana’omia.

A latou maua lena mea-ona tuu loa lea o le Mau. Aumai ia i matou se taimi e faataape ai sui o le Mau ma toe taliu atu i o latou aiga ma mafaufau i mataupu ia ua ‘outou tuu mai ia I matou.

Ae o le itu i le Togiga a le Mau-e leai se mea o afaina ai le Malo-e le o i ai ni pulufana i totonu. Tuu pea matou e faaaoga la mato togiga-se’ia o’o ina matou maua le mea o loo matou faamoemoe i ai. I le taimi nei, o le a se mea ua outou aumaia mo le Mau? Ua na ona outou una’i o  le Mau ina ia tu’u-ae leai sa outou mea e faamalieina ai matou.

E le mafai ona ioe atu le Mau, se’ia vagana ai-ua outou faapale le Mau i le palealii. O le faate’ia i le saunoga a Tuimalealiifano-o lea na vave tapuni ai e Allen le fono ma fai mai-o lona mana’o ia toe foi atu le Mau i o latou aiga i le itula e 8 i le taeao o le Aso Faraile. O le Aso Faraile 7 o Mati na toe fono ai Allen, Cobbe ma le Mau i Vaimoso-o le taimi lea na talosagaina ai e le Mau lea ua mae’a ona ia faata’oto se lisi o fesili latou te manaomia ai ni tali. Na latou fesiligia pe o le a le mea ua o’o ia latou talosaga-e aofia ai le 1928 i Malo Aufaatasi.

Na latou fesiligia foi suafa o ta’ita’i o le Mau, se’ia vagana ai i latou o loo aafia i soligatulafono mamafa, ina ia aveeseina mai le lisi o tagata o loo mana’omia. O i latou sa totoe ai pea i luga o lea lisi- e tatau ona faamasinoina i totonu o se faamasinoga-ae ia le faamasinoina e tusa ai ma “aganuu taualoa i totonu o Samoa ma e faasino i sui o le Mau.”

O lea tusi na faaalia ai le le fiafia i le faaiuga a Luxford e tusa ai ma le tafanaina o le Mau i le Aso To’ana’i Pogisa-ma sa fesiligia ai pe na faatonuina e Allen le faamasinoga o i latou ia na faapaina le fana taavili ia Tupua Tamasese, Tapu, Tu’ia ma Migao, o gaoioiga ia na fai e Luxford e pei ona faamatalaina-e le talafeagai ai.

11 May 2016

Related Stories


Bg pattern top

Sign in for free to read more stories

Bg pattern light

UPGRADE TO PREMIUM

Subscribe to Samoa Observer Online

Enjoy access to over a thousand articles per month, on any device as well as feature-length investgative articles.

Ready to signup?