Fasioti se tama’ita’i, ona ua fesoasoani e fa’asola sana uo

By New Zealand Herald 10 May 2016, 12:00AM

“Na muamua fa’a’ona le tama’ita’i-talavou lea, saisai fa’atasi ai ona lima ma vae, ae mulimuli tutu se afi ma susunu ai. O le tama’ita’i lea sa fesoasoani i sana uo ina ia avaga,” o se fa’aaliga lea a Leoleo anapo ma fa’ailoa ai fo’i, ua latou taofia ai nisi e to’asefulu ma le fa, i se tasi o gaioiga tau fasiotiga-tagata “mata’utia”.

O le tama’ita’i talavou na fasiotia – lea e talitonu fa’atoa 20 tausaga le matua, sa muamua fasioti fa’atoa susunu ai lona tino, i totonu o se ta’avale  (Suzuki van), i se fa’atonuga a le fono a le nu’u o Makol, i matu-sasa’e o Pakistan. O lea fa’alavelave na tupu i le Aso 29 o Aperila, pei ona ripotia e le Ta’ita’i-Leoleo o Khurram Rasheed, i vaega fa’asalalau (AFP). 

 “E 13 sui o le fono a le nu’u lea ua loka nei e Leoleo, latou na faia le tonu e fasioti le teine,” o le fa’aaliga lea a Rasheed.

Na ta’ua fo’i, na loka fa’atasi ai fo’i ma le tina o le teine na fasioti, ona sa ia lagolagoina le fa’ai’uga a le nu’u.

O le Aso Tofi na fa’atonuina ai e le Fa’amasinoga (e tete’e i faiga-fa’aTelolisi), le taofia pea e Leoleo o le vaega lea e 14 i vaiaso e lua, ona o moliaga o le fasioti-tagata ma faiga fa’atupu-fa’alavelave.

O lē e ana le ta’avale (van) na susunu ai le teine, o se sui lava o le fono a le nu’u ae na mafua ona susunu o le ta’avale lea, ona o le ta’avale lea e talitonu sa fa’aaoga e le teine ua avaga, e sola ai. E o’o mai i le taimi nei, e le-iloa lava po’o fea o lafilafi ai le tama’ita’i lea. 

E selau ma selau tama’ita’i e fasiotia e o latou aiga i Pakistan i tausaga ta’itasi, ona o le manatu lava lea, o le fia puipuia  o le “mamalu” o aiga, peita’i, e seasea fa’alogo o fasiotia nisi, e fesoasoani i se teva’aga fa’apea.

Na ta’ua e Samar Minallah – o se tasi e tete’e tele i faiga fa’apea – o le fono a le nu’u latou te faia fa’ai’uga fa’apea, e a’oa’i ai isi tama’ita’i o le nu’u.

“Vagana lava ua faia o se fa’asalaga malosi i sui nei o le nu’u, ma latou o lo’o lagolagoina ia faiga, e le mafai lava e le tulafono ona taofia le ogaoga ma le matuia o faiga e fasioti ai tama’ita’i, ona o le fa’ananau lava i le tausigaa lava o o latou mamalu,” o lana fa’aaliga lea i le vaega fa’asalalau a le AFP.

O le tausaga e 2005 na toe teuteu ai tulafono a Pakistan, ina ia puipuia ai tamaloloa e fasiotia tama’ita’i o o latou aiga mai le fa’asalaina i le falepuipui, e ala i le ta’ua o latou (tamaloloa), o ‘suli’ o e na sauaina.

Peita’i, e tu’u-tasi lava i le pule a le fa’amasino, e filifili ai pe tu’uina atu se fa’asalaga fa’aFalepuipui, a’o lea ua leva ona fa’amagalo e le aiga o le ua afaina, le tagata fasioti-tagata – o se ‘auala e talitonu le to’atele, o se faiga-sese o lo’o fa’aauau pea i le taimi nei.   

Teineititi i le Vaitafe: Taui o le Fa’amagalo – o le igoa lea o se ata-tifaga o lo’o fa’amatalaina ai se tasi e ma’eu lona sao mai se taumafaiga e fasiotia ai – le ata lea na manumalo i fa’ailoga a le Academy Awards a le lalolagi mo ata-fa’asolo ia Fepuari. 

E ui fo’i i le ta’uta’ua o lea ata, ae na ta’utino pea e le Palemia o Nawaz Sharif, le mana’o ina ia tafi’esea ai ia “faiga-sese”, o le fasiotia o tagata ina ia aloa’ia ai pea ma fa’amautuina le malosi o pulega a fono a nu’u, ui lava ina leai nisi tulafono fou sa tu’uina atu i le Fono Faitulagono a le atunu’u. 

By New Zealand Herald 10 May 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>