Selau-afe tala le fesoasoani a Samoa mo Fiti

26 February 2016, 12:00AM

Fa’aliliu e Maiava

 

Ua momoli atu se tusi-fa’ala’ei-‘au a le Palemia o Samoa, Tuila’epa Sa’ilele Malielegaoi i le Palemia o Fiti, Josaia Voreqe Bainimara e tu’uina atu ai fa’amaisega ma fa’ao’o atu se fesoasoani mo le malo ma tagata-nu’u uma o Fiti, ona o a’afiaga sa feagai ai i le taimi ole afa-mata’utia o Uinisitone.

O lea afa, na matua telē tele ai se afaina o le atunu’u ae maise fo’i le to’atele o soifua ua ma’umau ai tainane le atu-popole o le anoano ua leai ni fale e nonofo ai, mo le toe tau-tapenaina o mea sa fa’aleagaina. 

Na ofoina atu fo’i e le Palemia o Tuila’epa, le tapua’iga ma tatalo a Samoa ae maise o mo’omo’oga alofa mo lona tua’oi fa’aPasefika, ma momoli atu ai se meaalofa e selau-afe tala Fiti FJD$100,000.00 mo galuega toe-fa’aleleia o lo’o ua feagai nei.

“A’o tou saga’i atu i fita o le toe fa’aleleia o mea uma e toe fa’afo’i ai le soifuaga masani i le Atu-Fiti, matou te fa’amalosi-‘au atu ma manatua pea ‘outou uma i a matou tatalo," o le saunoaga lea a Tuilaepa.

Sa toe fa’amamafaina fo’i e le Ali’i Palemia, tulaga o le afaina-gofie o motu laity uma o le Pasefika i a’afiaga fa’apea.

“O tatou uma o malo laiti o le Pasefika, o le tulaga lava lea tatou te feagai ai pea ma a’afiaga ona o fesuia’iga o le tau e o-mai fa’atasi ma fa’alavelave fa’aleNatura,” o lana fa’aaliga lea ma fa’aopopo mai fo’i, “ae ui i fita ma faigata tatou te feagai pea lava pea, ua fa’aalia ai le malolosi, le fa’atuatua ma le soifua-finau o o tatou tagata.” 

O lea foa’i o le a fa’amatu’uina atu i le Malo o Fiti i le vaiaso nei.

26 February 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>