FOLAUGA NA MAUA AI SAMOA

By Fuimaono Na’oia Faasavalu Touli F. Tupua 21 July 2016, 12:00AM

O le lipoti e uiga i le malaga a La Perouse, lea e fa tusi tetele na faamaumau ai ma lomia i totonu o Pare i le 1797-98 faatasi ai ma se faafanua e faavae i luga o faamaumauga o aso ta’itasi, sa tapena e Brigadier General Milet e ala i le faatonuga a le Malo o Farane.

Ona o le taua tele o ia faamaumauga o le a ‘oto atu ai na o nisi auiliiliga ina ia mafai ai ona fesootai lelei ma isi faamaumauga. Fai mai na latou vaaia Manu’a i le aso 6 o le masina o Tesema 1787 pe tusa lea o le itula e 3 i Ie afiafi, ma faasolo atu ai lava i le aso 7 o Tesema i le va o Ta’ῡ ma Olosega i le aga’i mai sauté i matῡ. Sa matou vaaia ni vaa ua aga’i mai Olosega ae lē o Ta’ῡ, lea e matua lilofia i la’au ae tutū vāvā solo ai toganiu ma le tele o faatoaga, ae fai mai lana faamatalaga e lē lafulemu le eleele o le motu.

Sa o mai vaa mai Olosega ma ni niu inu mo le faafesuiaiga o oloa faatasi ai ma se Manuma. Sa mulimuli ane ona matua si’omia i matou i le tele o paopao, ia sa sa’e i nisi taimi a le popole lava i ai tagata. Sa alu lo matou vaa ae mulimuli atu ai lava isi paopao ma o le tele lava o taimi e sa’e ai o latou paopao, ae na ona feosofi lava i lalo tatā o latou vaa toe feosofi i luga. O le toatele o ia tagata e ogaoga manu’a i  o latou tino, ae sa iloa e La Perouse o lea faama’i o le lepela ma le mūmū tutupa.

O le ala lea sa o mai ai ia tagata ia i matou ae peiseai e fefefe ma latou te le’i tauaveina ni ‘auupega’; o iina na matou iloa ai o i latou o ni tagata amio lelei ma le filemu o Society Islands. O le aoauli na toe o mai ai ia paopao i lo matou vaa ma latou oloa e fia faafesuia’i-e lima moa, sefulu manuma, se tama’i pua’a ma se tama’i-lupe . E lua ta’ifau na faatau mai e de Langle, ma sa aoga tele. E le fiafia ia tagata i ni u’amea, vagana ai fasi tioata. Ona latou asia ai lea o Maouna (Tutuila).

Na latou tuutaula i le aso 9 o Tesema ma auina atu i uta ni vaa se tolu sa faa-auupegaina ma sa matua talia lelei e o’o lava i le afiafi. Matou te le malamalama pe aisea na tafu ai e tagata o lea motu se Afi tele. Sa maua e le ‘auvaa le tele o manulele eseese, puaa ma fualaau ‘aina ma toe taliu ane i le vaa ina ua mavae se itula e tasi. 

O le isi taeao, aso 10 o Tesema, e sili atu i le 100 paopao sa faapotopoto faatasi i le mea sa taula ai lo matou vaa ua matua tutumu i fualaau ‘aina e faafesuia’i ma oloa, ae na o ‘ula o mea lapotopoto sa latou mana’omia. O le itula e 5 i le taeao na soso’o ai na auina atu ai ni vaa pailate se fa o lo matou vaa e asu vai; e lua vaa o le ituaiga o le Boussole sa faafoe e Conrad ma Colinet, ae o le isi lua o vaa o le Astrolabe sa faafoe e Monti ma Bellegarde.

Sa latou aga’i i le itu i sasa’e o le matafaga, ae masalo o Fagasa, lea foi sa agai atu i ai La Perouse i lona vaa, ae o le Astrolabe lea sa faafoe e de Langle sa aga’i atu i le isi itu e mamao ese i sisifo e savalivali ai.  O lea savalivaliga na latou taliu mai ai ma le ofo i le matagofie o le nuu na latou asiasi i ai, ae o lea asiasiga na tulai mai ai se mala. A’o asu a latou vai, o vaa leoleo ia sa tuutaula i le va o le matafaga ma tagata o le nuu sa matua faatumulia i tagata o le nuu e sili atu i le 200 o loo manana’o e faafesuia’i a latou oloa ma oloa a le ‘auvaa.

O nisi o tamaitai ‘aulelei sa auai i ia faafesuiaiga o oloa sa o atu ia i latou e i ai a latou ‘ula e fai I fasi tioata.Sa latou sopoia le laina a fitafita ia sa latou le teena i latou. Sa iloa le amio lelei o ia tamaitai i ia fitafita aua e leai ni a latou auupega. Sa vave ona auai ma alii o le motu ma ua amata ai loa ona vevesi, ae sa mafai e matai ona faafilemu. Ae o totonu o se tasi o vaa na vaaia ai se tulaga mata’utia-ua vevesi ma sa ‘ou mana’o e faafilemu.

O se tasi o ia tagata sa ‘a’e mai tua o se tasi vaa, tago i se uatogi ma sasa ai lima ma le tino o se tasi o le auvaa. Sa ‘ou faatonuina se to’afa o seila malolosi e pu’e lea alii ma lafo i le sami, ma sa faapea lava ona fai.

O isi tagata o le nuu sa le fiafia i le amio a lea alii. Ina ia mafai ona faamalieina tagata o le nuu ona o le toatele, o lo’u manatu e sili i latou i lo nai tagata Farane tino laiti.Sa matua lagona lo’u fefe. O lea na alu atu ai La Perouse i le isi nuu e latalata ane, pe tusa o le luaselau la’a ma toe fo’i ane i le vaa i le aoauli ma latou vai, atoa ai ma le fiafia ona ua le toe i ai se isi vevesi. 

E toatele isi alii o le nuu sa i luga o le vaa. Sa lipotia e Boutine lea sa na pulea le vaa a’o toesea o ia, e faapea sa le mana’o e avatu latou i luga o le vaa, ae latou te le’i aloa’ia leoleo o le vaa ma toē ia i latou, ae ana faapea na te taofia i latou, semanu na te tafanaina i latou.

E anoano meaalofa na ave e La Perouse i ia tamalii ma na aloa’ia i latou. Sa fai foi le tula’i faaaloalo a le ‘auvaa lea ailoga sa faafiafiaina ai i latou. Sa vave ona taunuu ane de Lange mai uta ma fai mai na ia maua se ava lelei mo vaa faatasi ai ma se afu manaia o le vai manino e latalata i se nuu manaia.

By Fuimaono Na’oia Faasavalu Touli F. Tupua 21 July 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>