Fa’amuamua aoga a le fanau

By Vatapuia Maiava 27 September 2016, 12:00AM

O le mana’oga o so’o se matua - ia i’u ma le manuia le ola a’oa’oina o fanau.

 O le mafua’aga lea o le aga’i mai ai o le tamā i a Sapi Misa o Tufutafoe o Savai’i ma le aiga ma nofoia le talafatai o le taulaga i Apia nei i nai tausaga e le’i leva atu nei.

Na ia fa’ailoa i le Fofoga o Samoa na mafua ona omai ma nonofo latalata i le taulaga, ona ua maua le avanoa i nisi o lana fanau e a’o’oga ai i le  Iunivesite o Samoa.

O lona talitonuga, o le a le tele o le mau fa’afitauli, ma tele tupe e alu mo le tu’uina atu ai o fanau i a’oa’oga, ae a tali fanau i le i’u lelei o a’oa’oga e pei lava e leai se tigaina sa i ai.

O lona naunautaiga o lo’o i ai i le taimi lenei ia ave lana fa’amuamua i lana fanau.

O ananafi i le Maketi i Fugalei, na maua ai le fa’atalatalanoaga ma Sapi a’o ia fa’atauina atu fua o fa’ato’aga i le mamalu o le atunu’u.

“Ia o ona itu lelei lea e omai ai i le maketi ia e maua ai le seleni ma fesoasoani ai i pili o le fanau aoga, aiga , Ekalesia ma nisi o vaega e fuafua i ai e le tinā ma le tamā i le aga’i i luma ma le tausiga o le aiga.

“E leai se isi o faigaluega , o le poloka nei o lo’o fa’amoemoe ai le tausiga o le aiga, a lelei le fa’atau i le aso, e $100 i le $110 i le aso ae a fa’aletonu e $50 i le aso.

“O le tulaga lea e i ai aua o lea e taugata le soifuaga, ia o lea fo’i ua tau si’isi’i le tau o vaega nei i totonu o le maketi.

“O le taimi lenei e to’alima la’u fanau ma o lo’o a’o’oga uma.

Na ia fa’ailoa  nisi o fa’afitauli o lo’o feagai ma le tele o le ‘au fai poloka i le maketi.

“Ia  o lo’o telē lava le fa’aletonu o lo’o i ai i totonu iinei, o lea e fa’atonu fa’afia mai le sikaleti i totonu o le maketi…ua sa, ia ae fai lava loto o tagata, 

 “O le isi tulaga o le fa’alapisi ma i latou fo’i nei  o lo’o fa’aletonu mafaufau, ia o le manumanuga o e tafafao mai fafo.

“E tatau ona ave se fautuaga mo i latou o lo’o so’ona feoa’i, ia o e ulaula sikaleti i totonu iinei ia ma aafia ai le ola o nisi o tagata.

“O le isi tulaga o le to’atele o fanau o lo’o fetamo’ea’i solo i totonu i le maketi ma fa’aleaga ai nisi o meatotino.

“Ia o lo’u iloa i ai o le galulue fa’atasi lava e faigofie ai mea uma.

By Vatapuia Maiava 27 September 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>