O LA’U TALA FO’I

15 April 2016

1. Matauina i Tala Fou ua mana’o se Minisita e faaitiitia le tau o le eletise mo tagata e le lava ni a latou tupe poo tagata matitiva. O le ta’utinoga la a le Minisita o Papalii Niko Lee Hang-o le tau o le eletise i Samoa nei o loo tumau pea i se tulaga maualuga.

O le mana’o la o lea Minisita fou o le Faalapotopotoga o le Eletise-ia faa-taugofie le eletise mo aiga uma i totonu o Samoa i le isi lima tausaga o i luma. A tatou tilotilo toto’a la i lenei mana’o o le Minisita-o le upu moni- o le amiotonu lea a le Atua e tatau ona fai-ua auala mai ia Papalii Aisea?

A tatou tilotilo i le tau o le eletise i le taimi nei-ua matua o’o lava i le vanimonimo! Afai la e te alu atu e totogi le pili o lou molī-afai e te silasila lelei i ai- o lena e te totogiina le pili o lou molī-toe totogi ma le tau o le suau’u lea e vili ai le eletise-toe totogi ma le aitalafu a le Malo.

O se mea amiotonu lea faiga? E totogi e tatou mea uma ae toe totogi ma o tatou moli eletise? Afai la e le o totogiina ni pili o moli eletise o ta’ita’i o le faigamalo ma nisi o sui o Komiti Faatonu-o se mea amiotonu lea i luma o le Atua?

Afai la e faitau miliona ma miliona tupe a le atunuu ua maumau i faiga pi’opi’o a le Malo-aisea la ua le mafai ai ona noatia ta’ita’i o le atunuu- e toe totogi ia tupe a le atunuu?

Afai la o le finagalo lea o Papalii Niko Lee Hang ua taugata tele le tau o le eletise-o le tatalo –talosia ia tini taunuu lou faamoemoe mo le manuia o lou atunuu.

O le upu moni- e na o oe lava le Toa Magumagu lea o loo i totonu o le Palemene-e na o oe foi na finau ina ia tuuina atu faiga pi’opi’o a le faigamalo i le Faamasinoga!

E ui lava la ina tuai-ae fai mai le talitonuga o le atunuu-“e faatali lava i le Lagi vai o Aopo-ma e le mafai lava ona lilo se mea leaga mai le silafaga ati a le Atua! Alo ane la’ia i ou faiva-ma ia lele malie lau ti’a aua se manuia o Samoa ua lailoa i le faatautala ma le le popoi o le faigamalo! O le a sou taofi?

2. Matauina foi i Tala Fou e lua fo’i isi talosaga tau le faiga-palota ua toe faaui i tua. O lona uiga- o lēa ua avea lava ma Faipule o le Itumalo o Falelatai ma Samatau -Taefu Lemi-ae o Faumuina Wayne Fong o le a avea ma Faipule o le Itumalo Tu-taulaga i Sisifo mo le lima tausaga ua faagasolo nei.

E ui lava la ina e le o faailoa maia le pogai ua toe faaui ai i tua ia talosaga tau le faiga-palota-ae o le upu moni-o lea foi ua faaaoga le aganuu e fofo ai ia faiga pi’opi’o e pei ona ta’ua i ia talosaga.

ADVERTISEMENT

O le fesili la-aisea ua avea ai le aganuu mamalu a Samoa ma fala se’ese’e o polokiki leaga ma faiga pi’opi’o? Aisea ua faaaoga ai le aganuu ae na nofo nei lava le Faigamalo ma vaevae itumalo tu-taulaga ma nisi o itumalo mavae- e aunoa ma le fesiligia o le pule mamalu a alii ma faipule o ia itumalo?

O le mea ‘ea o le a lava le mea e loto i ai le faigamalo-ona fai lava lea i lana pule e aunoa ma le logoina o itumalo? Ua galo ia te oe Samoa-o le faavae na fai e matua mo le Faiga-Palota- e filifili lava e le itumalo o latou Sui Faipule-ae o lea ua nofo le faigamalo ma tasui ona o le fiapule ina tetele?

Silasila ua o’o i outou itumalo mavae ua nonofo le faigamalo ma vaevae i lana lava pule? Ua silasila la i le mata’utia o faigamalo e pulea e vaega faa-upufai? O le mata’utia-e tasi pe lava le faamoemoe o soo se vaega faa-upufai.

O le a lea? Ia o’o mai le tulu’iga o le lalolagi-o ona pulea lava se atunuu-ma ia na o ia lava- e pule! Ia manatua la-o soo se vaega faa-upufai lava- e malepe mai lava i totonu! E alu alu lava lagona e tagata o loo auai le mea moni.

O le a lea mea moni? O le faimea tonu-mautali atu i le atunuu i mea uma lava! O le a sou taofi? 

3. Matauina i Tala Fou se fuafuaga a le Palemia mo le faamanatuina o le Tuto’atasi o Samoa i lenei tausaga. O lea fuafuaga fai mai e leai se sauniga faamanatu e faia i Mulinuu aua ua leai se Maota o le Palemene ma isi mea sa masani ona i ai!

O le fesili la-afai o Mulinu o le Malae lea o le faautugā-tagi a Samoa ona o le sailiga o lona Malo Tuto’atasi-o le a la le pogai e feavea’i solo ai faa-pa’u-tolo a loi-e peiseai e le taua Mulinuu i le tala faasolopito o Samoa?

O le a la le pogai na tala ese ai le Fale Fono tuai sa tu i le malae? Na fai mai e na ona tala I lalo- ona toe fau ai lea o se fale fou faapena-ae leai se mea e tasi o faia! O fea la ua ave i ai la’au o le Fale Fono Tuai?

O lona uiga-o le faatalale le igoa o lena mea- i le nofoaga sa fili tagaga ai upu o le Faavae o le atunuu! O le fesili la-aisea ua taatia umi ai le fausia o le Palemene fou ae ua uma ona folafola mai e fai e le Malo o Ausetalia?

O le mea lea ua tatou i ai nei-o le a uma faavae ma mea sa faataua e matua na tafetotoi i le sailiga o le Tuto’atasi o Samoa -ona tasui e lenei faigamalo! O le a le pogai? O le manatu māmā i le taulaga na osi i le toto o tatou matua ina ia tuto’atasi Samoa!

O manatua Namulaulu Lauaki na faatafea ona o lona naunau ina ia tuto’atasi Samoa? O manatua Mataafa Iosefo na faatafea ona o lona alofa ia Samoa?

O mianatua le Mau a Pule ma le tafana o Tama-a-Aiga-Tamalii ma Failauga o le atunuu- i fana taavili ona o le naunau ia sa’oloto Samoa? O a la ni mea o i le Malae i Tuana’imato?

A ua leai ni fale i Mulinuu-avane ni fala e fofola tatou te nonofo ai ma faamanatu le Taulaga osi a matua ua mavae-ona faatoa aoga lea o lo latou tautiga- i tupulaga lalovaoa o le atunuu! O le a sou taofi?

15 April 2016

Related Stories


Bg pattern top

Sign in for free to read more stories

Bg pattern light

UPGRADE TO PREMIUM

Subscribe to Samoa Observer Online

Enjoy access to over a thousand articles per month, on any device as well as feature-length investgative articles.

Ready to signup?