TALATUU MA TALA O LE VAVAU NA FAAMAUMAU E PAPALAGI

FN
By Fuimaono Na’oia Faasavalu Touli F. Tupua, 15 April 2016

O LE TALA I LE FANAUGA A TAFA’IGATA:

O Tafa’igata o lona tama o Ata. Ona usu lea o Tafa’igata ia Saolepualai- o le la fanau o Veletaloola, Tali’ausolo, Mata ma Afa. O latou ia sa nonofo i le fale sa faaigoa o le “Fale o Aitu”.

Ona toe fanau lea o Saolepualai-ona fai atu lea o Tafa’igata-ia e alu poo ai o loo i gatai! Ona alu lea o Saopualai a’o vaivai lava lana failele, ona foi ane lea ma le tala ia Tafa’igata-‘E na o  Mata ma Afa o loo i gatai’.

Ona fai atu lea o Tafa’igata-“O le igoa la lena o si o’u atalii- o ‘Mata ma ‘Afa’. Ona valaau lea e Tafaigata Tauaitu ina ia potopoto ane uma-ona faapea atu lea o lana upu: “Vaavaai mai:-o le “Tama lea o le a fai ma outou Alii”-o le a outou tali ona toga; o le a fai lona igoa ma outou “Ao”.

O le mavaega la lenei na amata ai le “Ao o Faleata”; o le “Mataafa.” O le afuaga la lenei o le suafa o Mataafa: “O le alii o le Pipili na alu lana malaga i Manu’a; ao le’i faia le taua o Savaii.

Ona alu lea o ia i uta ina ua taunuu, ua savavali i le ala-ona ia vaaia lea o le ‘Niu ‘Afa’ o taatia i le ala. Ona tago lea ave-mele’i ese le pa’u-ae lamulamu le pa’u-fafine o le niu. Ona faapea lea o lana upu -‘Ua maua lo’u igoa-O le ‘Mata o le ‘afa, aua e suamalie le pulu i le mata.

O ona po ia sa tau ai le taua i Savaii i Lealatele i uta i le tuasivi. Ona o ai lea o Faauli ma Umi i le taua; ona o atu lea taunuu i le ‘olo o le Pipili. Ona fai atu lea o le Pipili i tama ia e to’alua-“Leoleo ia te a’u-ne’i o mai nisi o le itu-taua, ona fasi lea o a’u.

Ona nonofo ai lea o tama e leoleo le Pipili. Ua uma le taua-ona fai atu lea o le Pipili:”Ua faafetai lo oulua alolofa ia te a’u- ae o le a avatu lo’u ‘Ao’ mo oulua-lua te o ma ave i Upolu e taui a’i lo oulua alolofa; aua ua ‘ou ola i le taua.

Ona o mai lea o tama ma lo la Ao o le “Mataafa” i Upolu i Faleata.

ADVERTISEMENT

O LE TALA I LE FALE’ULA: O le fanau a Fe’epo e to’alua tama- o Malalatea ma Leatiogie ma lo la tuafafine o Sina. Ona usu lea o le Tuimanu’a ia Sina ma ua o i Manu’a ma nonofo ai mo ni aso se tele.

Ona poloa’i mai lea o Sina ia Malalatea lona tuagane  e alu atu, se’i o la feiloa’i. Ona alu lea o le tama-ma ua vaai mai Sina ua alu atu le tama, a’o fai le alofi o le nuu. Ona faafetaui ane lea e Sina ma fai atu-‘Talofa e ia te oe-auā o le a e oti.’

Ua e sau ‘ae o lea e fai le Alofi-Sa o le nuu nei! Ae afai e aami mai oe-ona e alu lea i ai; ae a fai ane ni mea e te faia-ia e sau muamua ia te a’u, ou te faatonu atu ia te oe le mea e fai. Ona alu lea o le tama i le Aofi-Sa.

Ona fai ane lea o le alii i le tama-“Alu e aumai i’a e fono a’i le ‘ava, ae o ia i’a -e matua fe’ai lava.Ona alu lea o le tama i lona tuafafine-ona fai mai lea o le tamaitai-

‘A e aIu i i’a-ia e togi muamua le ma’a lea i totonu o le vai; ona faatoa feala lea o i’a- leaga o la e momoe; o le tasi lea o ma’a e te togi i le ‘auvai, aua a iloa mai e i’a le ma’a, ona o a’e ai lea i le pa’u-matū.

Ona e tago lea ‘u’u fuilauvi ma ta’ita’i mai. Ona faapea lava lea ona fai e le tama. Ona vaai mai lea o le Tupu-ua avatu i’a e le tama. Ua ofo le Tupu ma faapea lana upu:”O le Sau’ai-tagata le tama nei!

Ona toe fai mai lea o le Tupu-‘e alu e ati mai le ‘ava’! Ona toe alu foi lea o le tama i lona tuafafine. Ona fai atu lea o Sina: ‘Sau ia-o le mea lena o le a e oti ai. Ae sau-sau ina alu ma le la’au pu’upu’u lea-a e alu atu ae oso mai le ‘ata muamua- ona e ‘alo lea ae ta ia gau.

A toe oso mai foi le isi ‘ata mulimuli- ia e ‘alo foi-ae ta ia gau. A e alu atu  ua momoe ‘ata o le ‘ava-ona e tago lea fuli le palapala o le ‘ava-ona faafuata mai lea, ave i le Alofi Sa.

Ona vaai mai lea o le Tupu-ua avatu foi le ‘ava e le tama, ona toe ofo foi lea o le Tupu. Ona tuu lea o le ‘ava, ae toe alu le tama i lona tuafafine. Ona fai atu lea o le tama-“Funa e-sau ia o le a ta o!. Ona tulai lea o le teine ua o i le vaa o le tama.

Ona vaai ane lea o le Tupu- o le a alu le teva’aga a le teina ma lona tuagane. Ona alu ane lea o le Alii-ua vavao le teine ma le tama, ae ua le mafai lava le teine ma le tama. Ona faapea lea o le Tupu-Pe o se a se mea e tatau ona alu ma lona to’alua?

E leai se tali a le tamaitai-ona fai atu lea o le Tupu: ‘Funa e-sau ia-afai lava ua le mafai ona e nofo-“sau ina alu ma le Fale’ula i lou aiga; ave ma le Tai-tafola-o i ai gau ma sea ma ‘alu’alu, loli atoa ma figota eseese”. Ona sau ai lea o le malaga a le tamaitai ma lona tuagane-ma le Faleula i Upolu nei.”

FN
By Fuimaono Na’oia Faasavalu Touli F. Tupua, 15 April 2016

Related Stories


Bg pattern top

Sign in for free to read more stories

Bg pattern light

UPGRADE TO PREMIUM

Subscribe to Samoa Observer Online

Enjoy access to over a thousand articles per month, on any device as well as feature-length investgative articles.

Ready to signup?