O LE ‘OLO O VAOMANOGI I LUATUANUU

23 June 2016

Ua le masino le tele o tausaga o tatou taofi pea i le mau-o tagata Toga na fausia lenei ‘olo. O tagata Toga ia e faapea- sa latou pulea Samoa e afua mai le T.A. 900-1250. E le faigofie foi ona faagalo lenei mau aua ua le gata ina tusia i le tele o tusitusiga-ae o ia tusitusiga- ua uma foi ona faasalalau atu i le lalolagi atoa- ma ua a’oa’oina ai le to’atele e o’o lava i tama fanau a Samoa.

Ae peita’i, talu mai le taimi na faatinoina ai lenei su’esu’ega, o lea ua tulai mai nei se tasi o mau- e ono mafai ona faapea- e talafeagai-talu ai-o loo maua ona pine e o’o mai i le asŏ. O lenei la mau-e le o se mau na pua’ina mai le agi fisaga o le matagi- pe na faalogo ai i nofoaga faitele-ae o se mau na fofoa mai le sa’ausi o le tofā saili ma le suaga a le vaatele- e ala i le faafesaga’i lelei ma le ‘Aufueloloa o afioaga i ona maota ma laoa faitauina.

O le mau lava a Seiuli ma Luafalealo, Lauofo ma Upu i le Amomua.

Fai mai le mau a le Afioaga-o le ‘Olo lenei na fau e le itumalo o Atua- i le taimi o va-tau ma le Tuamasaga-talu ai o la tuaoi eleele. O le Ta’ita’i o Vaega’au a le Tuamasaga o Malietoa Falefatu- a’o Tuiatua Fotuitama’i le Ta’ita’i o ‘Au a Atua.

O le taua lenei- e ta’ua- o le “Fasitele” ma o le feto’aiga muamua na to’ilalo ai Atua. Ona si’i mai lea o le tuaoi i le nofoaga e igoa o Asusu i Salelesi- i le itu i sasa’e o Luatuanuu. E le’i faamalieina le Tuiatua ina ua to’ilalo-ma sa faanatinati loa tapenaga e toe sosofa le tuaoi ua fai.

A’o Malietoa Falefatu-ua faamalieina lava i le tulaga ua i ai -ma ua faapea lona finagalo-“ailoga e toe lagaina i se taimi vave le to’ilalo o Atua? Peita’i, sa le faapea le finagalo o le Tuiatua-ona e le’i mapu i le matuitui o le to’ilalo. Sa faalilolilo pea ona fai tapenaga a le Tuiatua ma ua amata ona taunuu atu faailoilo -‘au a Atua i le ‘olo- e ala mai sauté poo le itu i uta.

A’o faagasolo pea ona taunuu atu ‘Au a Atua-sa o’o atu ia Malietoa le ta’u- ua taunuu vaega’au a Atua ma ua latou nofoia le ‘olo. Ua faaletonu le finagalo o Malietoa-talu ai-ua na le silafia poo fea na ala atu ai ‘au a Atua i le ‘olo.

Sa faanatinati loa ona o’o atu Malietoa i Luatuanuu i ana fuāva’a-ina ia faailoa atu i le Tuiatua- lona tomai i taua i le sami. Peita’i-e taunuu atu Malietoa-e leai se va’a o le Tuiatua o tuutaula i Luatuanuu. Ua vevesi solo le alii i lona faaletonu, peita’i, e le’i lilo lona faaletonu i le matau mai a Vaega’au a Atua- ia ua i luga nei o le ‘olo.

ADVERTISEMENT

Ua leai se tonu lelei i le finagalo o Malietoa, ae ua nanati atu nei i ana vaega’au ma ua amata loa ona osofa’i Atua-e ui atu i le tuasivi ma vanu loloto. E le’i faigofie ia Malietoa ma ana ‘Au lenei osofa’iga.Fai mai le tala-o le toatele o ‘au a Malietoa-sa fetolofi i o latou tulivae ma fe’a’ei i luga.

O le faigata tele o lenei osofaiga- na faaigoaina ai lea vaega-eleele o “Olotuli.” O le taeao po o le aso na soso’o ai- na taunuu ai vaega’au a Malietoa i le ‘olo ma tau ai loa le taua. O se taua vave ma le tele o le toto masa’a-talu ai le maoa’e o le tomai o ‘autau a Atua- i luga o le fogaeleele.

Ia silafia fo’i- e fita le ala na uia e vaega’au a Malietoa-ma o le taua lenei o loo ta’ua i mau a le afioaga o Luatuanuu o le “Taua o le Taeao Fua.” O le taunuuga-na toe si’i le tuaoi o Atua ma le Tuamasaga mai Asusu i Salelesi i sisifo- i le mea e ta’ua o “Muliapoaifasa”po o le vaitafe lea e i totonu o le afioaga o Laulii-o se vaega lea o le Tuamasaga-ao ona faalupega-o loo faatau aofia ai upu o Atua ma le Tuamasaga. O lenei foi ‘olo-e tele ona igoa sa faaigoa ai.

O loo faaigoaina e le Afioga a Iiiga Pisa i ana tusitusiga o “Sauofafine” lea na sulufa’i i ai Tupua Tamasese Titimaea ma ana vaega’au- ina ua to’ilalo ia Malietoa Laupepa-lea na faatafea i Sailusi ma Asi Tunupopo, La’ulusa, Tuiletufuga ma Mauga Manuma o Pagopago. O le pito i sasa’e o Luatuanuu i le sami- o loo i ai ni ma’a tetele se lua-ua faaigoaina o- Utuma ma Utumau’ū-ia na malaga mai Papatea.

Na ala ona malaga ese ona o taua sa fai i le va o Tui Pulotu ma tagata o Papatea. Fai mai le tala na alu Lagi le afafine o Tui Pulotu i le tasi ato e ta’ele- ae tu’u-feanu i ai Utuma ma Utumau’u. Ona pogai ai lea o le upu “anuilagi.” Ua to’atama’i tele Tui Pulotu ma tau ai loa le taua ma tagata Papatea. Ona sosola ai lea o le ulugalii o Ulu ma Malautea- ma le la fanau. Na muamua lava sosola tama o Utuma ma Utumau’u i Samoa.

Ona malaga mai ai lea o le ulugalii i Samoa e saili tama. A’o tama-na taunuu i Luatuanuu ma ua liuma’a ai. E vaai atu le ulugalii o Ulu ma Malautea-ua liuma’a tama, ona faapea foi lea ona liuma’a ai ma i la’ua-i le gutu o le ava i Fagalii ma ua ta’ua nei o le “Maatulua.” Fai mai le tala- o Pulotu ma Papatea- o atumotu ia sa i ai i tala atu o Fiti-ae peita’i-ua magoto i le moana.

O Luatuanu’u foi e i ai lana i’a (anae) lea fai mai le afioaga- na aumai i Samoa nei mai Fiti- e Sinalefiti le alo o Tuifiti.Na malaga mai Sinalefiti ma ona tuagane e to’atolu, o Lua, Tua ma Nu’u ( i latou ia na maua ai le igoa o le nuu). O lenei i’a-e a’e ia Iulai e o’o ia Novema. A o’o i le aso e a’e ai-ona sauni lea o pa-i’a i le uaea fai pa-moa.

E afua mai lea pa i le gutu o le ava- se’ia pa’ia le matafaga-poo le vaega lea e tu ai le fale o tautai. I le va o le fale o tautai ma le gutu o le ava-e faataamilo ai le pa-uaea- ona aga’i ai lea i le matafaga. O iinei la e ta’oto ai le muli o le pa- e nofo ai le i’a-a’o le’i fagotaina. A sau le i’a, e ui mai le ava- ona tau loa lea i le pa- ona alu ai lava lea se’ia pa’ia le muli o le Pa.

A’o aga’i mai le i’a- a ua i ai le tapuaiga e aofia ai le “Matuaofaiva” ma le Aiga Tautai. Ona aumai ai lea o upega fou- ua tuu i le totonugalemu o le fale- ina ia faapa’iaina. Ua aumai foi mea taumafa i ato fou, valusaga, pa’u fa’i ma mea uma lava  sa faaaoga i gasesega.

Ona aumai ai lea o le ‘ato faapitoa o loo i ai le Talosā ma le Popo-ma-sua  e tasi- i luma o le Matuaofaiva. Ua avane foi ma “Upega Pupuni.” O nei mea uma- e aumai i luma o le Matuaofaiva- e le ‘aumaga ia e savavali mai i totonu o le maota i se laina e tasi-ona tūtū lea i se li’o -ma tuu faatasi mea uma i lalo i le taimi e tasi. A uma ona faapa’ia ia mea uma-ona alu loa lea o le solo aga’i i le sami -e ta’ita’i e le Matuaofaiva- e fagota le anae i upega.

O soo se i’a e oso ese- e sapo i upega. A lava i’a ua maua-ona aumai uma lea i luma o le Matuaofaiva-o ia lea na te faia le tufa i le ‘aufai-lotu ma le Aiga Tautai. Afai e sau le i’a ma toe mou atu-e le mafai ona taumafaina le Talo-sa se’ia vagana ai ua toe fo’ mai!

23 June 2016

Related Stories


Bg pattern top

Sign in for free to read more stories

Bg pattern light

UPGRADE TO PREMIUM

Subscribe to Samoa Observer Online

Enjoy access to over a thousand articles per month, on any device as well as feature-length investgative articles.

Ready to signup?