E le’i avea le fa’avevesi ma fa’amata’u a se tamaititi Avele na taofia ai le Kolisi o Maluafou, mai le fa’atinoina o le latou Aso o le Gagana Fa’aperetania, i le Aso Tofi.

O se aso matagofie tele, i le tumutumu ai o matua, o aiga, o uo ma le atunu’u lagolago, ae maise o  faia’oga ma fanau-a’o’oga, mo le fa’atauaina ma una’ia le a’oa’oina o le gagana fa’aPeretania, o le faitoto’a lea mo avanoa lelei i le lumana’i. 

O le ‘autu o le aso, o le “Gagana Peretania, le So’otaga o Mea Lelei Uma”, lea na saunoa ai le Pule A’oga o Lasi Tavae, o le fa’amoemoe lava lea, ia una’ia ai fanau-a’oga e taumafai e tautatala ai, ma  fa’amanatu ai ia latou, o le fa’avae lea mo se lumana’i manuia.    

 “O le gagana lea o lo’o fa’aaogaina i le lalolagi atoa,” o lana saunoaga lea. 

“E matala ai le tele o avanoa ma faitoto’a lelei mo ‘Oe. O le mafai ona tautala i le fa’aPeretania, e mafai ai ona e feso’ota’i ma tagata mai isi atunu’u, ia pe a malaga fo’i i fafo atu o Samoa.” 

Na liliu ane le Tama’ita’i Pule i fanau-a’oga ma fa’amanatu iai, o latou o lumana’i o le atunu’u lenei, ma ua tatau ona amata tapenapena i le taimi nei, ina avea latou ma ta’ita’i lelei i aso o muamua. 

“O le gagana Peretania, e fa’afaigofia ai mea uma i tulaga tau-a’oa’oga ma o le gagana ‘autu o lo fa’aaoga i totonu o potu-a’oga. Lona uiga, e mafai ona tatou fa’apea ane, o le Gagana Fa’aPeretania, o le faitoto’a lea e manuia ai a’oa’oga i Samoa nei. 

 “O mata’upu uma lava o lo’o a’oa’oina i le Gagana Fa’aPeretania, vagana lava le mata’upu o le Gagana Samoa. Peita’i, ua matou matauina, e iai tamaiti e le lelei tele i le fa’aaogaina o le gagana, ona e popole ne’i sese se ‘upu e tautala ai. A’o le aoga lea o lenei fa’amoemoe, e fa’amalosia ai tamaiti e fenanui ma fa’amasani atili pea e tautatala ai.”

Na ta’ua e le Tama’ita’i-Pule, e le se fa’amoemoe e faia i tausaga uma. 

“O le tausaga e 2014 le taimi mulimuli na faia ai le Aso o le Gagana Peretania. O le tausaga talu ai, na fai ai le Aso o le Aganu’u, na tu’u ai le avanoa i tama ma teine-a’oga e fa’ailoa a a latou taleni ma lo latou malamalama fo’i i le Aganu’u a Samoa.” 

Sa vaevaeina le a’oga i ‘Au e fa – o Upolu, Savai’i, Manono ma ‘Apolima, ma e ono vaiaso sa lafo i ‘Au uma e tapena ai mo lenei fa’amoemoe. 

O Fa’amasino mo tauvaga ta’itasi i lea aso, sa aofia ai Malopaumalama Papali’i – le Sui Fa’atonu o A’oga a le EFKS ma le Fa’atonu o le Samoa Observer, o Mata’afa Keni Lesa.

E fitu vaega ‘ese’ese sa faia ai tauvaga. O le tauvaga o Sipelaga-‘upu, o tauvaga-Solo ma Tala-fa’atino, tauvaga-Siva, tauvaga-lauga, o Finauga ma le sa’iliga o le Tausala ma le Manaia a Maluafou, na taualuga ai le aso. 

O le fa’ai’uga o lea fa’amoemoe a le Kolisi o Maluafou, na sola ai ma le ‘Au a Savai’i, le manumalo.