Ua tele faipisinisi mai fafo i totonu o Samoa

IL
By Ilia L. Likou, 26 September 2016

“Ua tele ma anoanoa’i pisinisi a tagata mai fafo i Samoa,” o le finagalo lenā o le taule’ale’a ia Tino Tiomai, e 25 tausaga mai le afioaga o Sataoa.

Ina ua fesiligia e le Fofoga o Samoa le taule’ale’a mo sona finagalo i le olaga o Samoa i lenei vaitau, na ia fa’ailoa mai ai, o lo’o sologa lelei pea mea uma i Samoa. 

“O lo’o seki lava le olaga i Samoa.

“Na pau lava le fa’afitauli o lo’o ou va’aia i totonu o Samoa, o le fa’atuputupula’ia o le faitau aofa’i o Saina ma tagata mai i isi atunu’u e omai i totonu o Samoa ma fai ai a latou pisinisi. 

“O le tele o tagata Samoa i le vaitau nei, ua tele lava ina tau leai ni polofiti a tagata ona o le tele o fa’atosina mai pisinisi e faia e tagata Saina ma isi atunu’u.”

O Tino e fai lona ma’umaga ma e fa’atau ana umu talo, fa’i ma ‘ulu i aso Sa uma e maua ai se seleni e fesoasoani i le tausiga o lona aiga. 

“O le ala lea ua matou faia ai lenei atina’e auā ua tele ina fao uma e le au Saina tagata fa’atau aemaise o pisinisi. 

“Toeititi lava leai se vaipanoa o Samoa e le iai se pisinisi a tagata mai Saina. E tele foi lava se seleni e maua mai le fa’atauina o talo ma fa’i ma o le ma’umaga lava o lo’o fa’amoemoe iai le manuia o aiga. 

ADVERTISEMENT

“O le olaga a i Samoa e faigofie, ae o le tulaga lena ua iai, ua tele tele pisinisi a le au Saina ma tagata mai i isi atunu’u i totonu o Samoa. Ua faigata la i tagata Samoa ona tauva ma pisinisi ia auā e tele a latou fa’atosina.”

Na fa’aalia e Tino, e tatau lava i le malō ona toe tagataga’i lelei i lea tulaga.  “Ou te tu’ua’ia tagata mai fafo i le fia omai i Samoa auā e matagofie ma faigofie le olaga i Samoa. 

 “Ae peita’i ua avea lea ma ala e to’atele mai ai ma fa’atau fanua o tagata Samoa, ma fai ai a latou pisinisi i Samoa. 

“E tele a latou fa’atosina ma e popoto foi e maunu atu tagata e fa’atau ia latou faleoloa.”

E le gata i lea, ae na fa’ailoa mai foi e Tino, e tatau ona tagataga’i lelei le malō i le tele mai o pisinisi mai Saina ona ua fa’atuputupula’ia le faitau aofa’i o tagata Saina i Samoa. 

“Tatou te le’o iloa po’o le a le e tupu i le lumana’i. Tatou te le’o iloa foi po’o le a moi le mafua’aga o le tele mai o tagata Saina i Samoa. 

“Ae a le mataala a le tatou atunu’u, e iu lava ina pulea e Saina le tatou atunu’u. Ua matua’i toatele mai lava le au Saina i Samoa. 

“Ua ou va’ai atu foi i luga o upega tafa’ilagi, ua matua’i toatele lava le faitau aofa’i o tagata Saina, o le ala lena ua omai ai i Samoa, ma ua taumafai foi le malo ina ia fa’aitiitia le faitau aofa’i o tagata e ala lea i le ta’itasi o fanau a le ulugali’i. 

“E sa’o o lea e omai ma fesoasoani i le atina’e o Samoa ma fa’alelei faleaoga ma isi tulaga, ae tatou te le’o iloa moi poo le a tonu lava le mafua’aga o le omai le omai ai. 

“I te’i ua pulea e tagata Saina Samoa.”

IL
By Ilia L. Likou, 26 September 2016

Related Stories


Bg pattern top

Sign in for free to read more stories

Bg pattern light

UPGRADE TO PREMIUM

Subscribe to Samoa Observer Online

Enjoy access to over a thousand articles per month, on any device as well as feature-length investgative articles.

Ready to signup?