E le lava avanoa faigaluega i Samoa

SS
By Sarafina Sanerivi, 25 September 2016

O Lina Savelio o se tina mai le afioaga o Vaoala. 

E 54 ona tausaga ma na afea e le polokalame a le Fofoga o Samoa le tinā ia Lina o lo’o fa’atau ana fuāla’auaina e autafa o le auala i Vaoala.  

Na fesiligia Lina mo sona finagalo i le olaga o Samoa i le vaitau lenei, ae po’o iai foi ni fa’afitauli o feagai pea ma aiga i lana silasila, ae fa’ailoa mai ai e Lina, o le fa’afitauli tele lava o le lava o galue e aga’i iai fanau pe a i’u mai aoga. 

ADVERTISEMENT

“O se tasi lenā o fa’afitauli o lo’o o’u iloa e a’u ia o lo’o tupu i Samoa,” o le tala lea a Lina.  “O le uma mai o aoga a le fanau ae leai ni galuega e o ai fanau e faigaluega ai. Ia o nisi o fanau, e ma’ea mai aoga, a fiu loa e su’e ni galuega ia ua omai loa ua fesoasoani i le faiga o le ma’umaga ma fa’ato’aga.  “E le’o lava ni galuega i totonu o Samoa e faigaluega ai fanau. A ave foi la ni tusi apalai i fale faigaluega, e umi lava se taimi e fa’atali ai ae isi foi a taimi e leai a ma se tali e maua mai. 

“Ia o le tele a la o fanu ua uma mai ona omai lea o le tausi aiga, fai le ma’umaga ma fai fe’au a le aiga e fa’aaoga ai le malosi.”

Ae peita’i, na ta’ua e Lina, o lo’o sologa lelei pea le olaga i Samoa i lana ia maitau. 

“E moi lava e faigata le olaga o lo’o ola ai nei. E to’atele si a’u fanau ma e tele foi mea e fai. Ua fai fanau foi nisi o le fanau, ma e faigaluega le tamā o le aiga.  “Ae fai lava le fa’ato’aga fuāla’auaina e fesoasoani i meaai ma tupe maua e tausi ai aiga ma fanau.” Na ta’ua e Lina, o le seleni e maua mai i le fa’atauina o ana fuāla’auaina, e tu’u fa’atasi ma le tupe e maua mai le galuega a le tamā o le aiga ona fa’aaoga lea e tausi ai le fanau. 

E le gata i lea, na ta’ua foi e Lina, e le faigofie le fa’atinoina o le tōtōina o fuāla’au o lo’o ia fa’ataua. 

“E leai lava se mea e maua ma se filemu i le olaga nei. A fia maua manuia, e tatau lava ona galue malosi.” Ae peita’i na ta’ua e Lina, o le fuala’auaina o lo’o ua ave iai lana fa’atuatua i le taimi nei o le kapisi vai.  “E faigofie lava ma e telē le tupe e maua mai ai.”

SS
By Sarafina Sanerivi, 25 September 2016

Related Stories


Bg pattern top

Sign in for free to read more stories

Bg pattern light

UPGRADE TO PREMIUM

Subscribe to Samoa Observer Online

Enjoy access to over a thousand articles per month, on any device as well as feature-length investgative articles.

Ready to signup?