O fuafua se fetauiga a Parker ma Haye?

By Fa’aliliu e Maiava 31 May 2016, 12:00AM

Ua fa’ailoa e le Vaega o Fuafuaina fusu’aga a Lupesoli’ai Joseph Parker, latou te talia fiafia se fusu’aga e faia a Parker ma le ali’i o David Haye, lea e ono afaina ai lona tulaga ua fa’atulafonoina e lu’i ai le fusi o le lalolagi, peita’i, e ono tauia ma fa’amanuiaina ai i se totogi tele ma si’itia ai fo’i lona tulaga i se isi maualuga e sili atu i totonu o Peretania.  

Fa’aalia e Dean Lonergan o le Vaega a le Duco Events, o se fusu’aga a le Kiwi talavou ma le ali’i 35 tausaga o Haye – e lua fusi sa ia umia – e ono avea o se fusu’aga aupito totogi-tele mo Parker nai lo se fusu’aga mo le fusi o le lalolagi.  

 “A tapena se fusu’aga a Joseph Parker ma David Haye i se aso, o le a matua fiafia lava iai tagata Egelani ma ono avea o se fusu’aga tele,” o le fa’aaliga lea a Lonergan. “E matua tetele lava a la tupe o le a maua – la’ua uma, e matua tetele lava o la totogi. Mo Joseph lava ia, e tele atu tupe o le a maua i lo se fusu’aga mo le fusi a le lalolagi.

“A tatou aga’i e fa’atino se fusu’aga ma Anthony Joshua i le fusi, e mautinoa lava o le a maualuga teisi Joshua ona o “tatou” lea o le a lu’i. Ae a fusu Joseph ma Haye, atonu o le a tutusa lelei aua o le a fa’asalalauina o le fusu’aga e sa’ili ai se tasi e fusu ma Joshua.” 

Ua leva o talatalanoa Lonergan ma latou o tapenaina fusu’aga a Joshua, o Barry ma Eddie Hearn mo se fusu’aga a Parker i le aso tonu e fusu ai Joshua i Lonetona ia Novema. O se ‘auala e si’itia maualuga ai le tama-fusu Samoa i totonu lava o Peretania a’o loma le lu’ina o le fusi o le lalolagi o lo’o ia Joshua i le tausaga fou. 

Ui i lea, o se fusu’aga a Parker ma Haye e ono tulaga-‘ese atu ma sili ona tele tupe e ono maua ai. 

 “A matou malaga i Egelani ma fa’afaia’ina David Haye, e mautinoa lea le avea vave o Joseph Parker ma fetu-pupula …ma ‘ou te mautinoa lava, o lo’o naunau lava Hearns ina ia taunu’u le tulaga lena aua o le a matua tele ai tupe e maua, pe a o’o lona ina fusu Parker ma Joshua,” o le fa’aaliga lea a Lonergan. 

“O le taimi lenei ia Joseph Parker, atonu o le fusu’aga aupito taugata lea mo ia i le lalolagi. Aisea la e le-tilotilo loa iai? 

 “Ae mo David Haye, o le fusu’aga aupito tupea lea mo iai i sina taimi pu’upu’u. ‘Ou te iloa mai nusipepa, e le o fia fusu Tyson Fury ia David Haye, e fa’apena fo’i Anthony Joshua, e matua le-mana’o lava iai aua e le lelei tagata o lo’o latou fusu.

“Ae a malo ia Joseph Parker, o le a mautinoa loa se la fusu’aga ma Anthony Joshua.” 

E fa’alua ona faia’ina Haye i ana fusu’aga fa’aporofesa e 30, ma sa faitioina lava i lona atunu’u ona o le fusu ma tagata e matua ‘ese’ese mamao talu ona toe taliu i le maea talu mai le tolu ma le ‘afa tausaga o malolo. I luma atu, sa avea ma siamupin o le paga-mamafa tau-mama (cruiserweight)  ma le paga-mamafa;  ae na mamulu le fusi mulimuli ane ia Wladimir Klitschko i le 2011.

E ono tula’i mai Haye i le lima pito i luga o le fa’atulagana a le IBF, pe a mae’a ona se fa’atulagana fou o lo’o fa’agasolo nei, o lona uiga, a manumalo ai ia Parker, o le a avea loa o ia ma tama-fusu e fa’atulafonoina mo le lu’iina o le fusi o lo’o ia Joshua. 

Na fa’amatala e Lonergan le ali’i o Haye, o se tasi e “atamai” tele i le fuafuaina o ana fusu’aga, ma o se isi fusu’aga a Parker e faia, e fua i le lelei o Parker e fa’afaia’ina ai Solomon Haumono o Ausetalia i le isi ana fusu’aga o soso’o nei i Karaiesetete ia Iulai 21.

Ae talitonu Lonergan ma le vaega a Parker, e sili atu le lelei o Carlos Takam lea fa’atoa faia’ina atu ia Parker, i lo David Haye. 

By Fa’aliliu e Maiava 31 May 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>