Ua faigata le olaga i Samoa

By Sarafina Sanerivi 12 December 2016, 12:00AM

O Fata Fa’asoa mai le alalafaga o Nono’a Saleimoa o se matai tausi aiga. 

Na afea e le Fofoga o Samoa le tama ma fesiligia sona finagalo i le tulaga o iai le olaga o Samoa i le vaitau lenei, ma na ta’ua ai e Fata, o lo’o sologa lelei pea lava le olaga, se’i vagana ai sina o fa’afitauli o lo’o feagai pea ma le atunu’u.

“Ua tatou va’aia lava le tele o suiga o le olaga ua iai nei,” o lana fa’aaliga lea. 

“E le faigata ona tatou iloa lea tulaga, o lo’o faigofie lava. 

“O le vaitau lenei ua fai lava si faigata o le olaga ua iai. Ua taugata le soifuaga, laiti tupe maua a tagata.

“Auā e fai o le tausiga o aiga, ae fa’apea foi le mau fa’alavelave e feagai ai ma aiga.”

E ui lava na ta’ua e le tama ia Fata le taugata o le soifuaga ma le tele o fa’alavelave e feagai ai ma aiga, ae na ia fa’ailoa mai, e le mafai ona tatou suia lea tulaga ona ua masani ai lava le atunu’u.

“Ou te iloa lava e a’u ia e le mafai ona suia le tulaga i le aganu’u a Samoa ma le mau fa’alavelave e feagai ai.

“Auā e suia loa, atili ai loa ona faigata mo tagata.”

Peita’i na ta’ua e Fata, na te fa’afetaia le saofa’iga a matai i lo latou fa’atautaia ma tausia le filemu i totonu o nu’u ma alalafaga.

“O le tulaga lea ua iai, ua anoanoa’i le mau fa’afitauli, ae e pei o le pulega a matai olo’o fofo alamea le mau fa’afitauli ma fa’atonutonuina amio a tagata ta’itasi i totonu o nu’u. 

“O matai lava ia o latou ia e fai ma ulu o le aiga. A maopoopo aiga, ua fa’apena foi ona faigofie ona maopoopo nu’u ma ekalesia. 

“A fa’atusatusa foi la i le olaga o iai nisi o nu’u i le taulaga, o lo’o tele ai le vevesi ma fa’afitauli, ona e le’o iai le saofaiga lea pe e le’o malosi foi ni faiganu’u.

“O i latou foi ia e ta’ita’ia le malosi o le nu’u ma una’ia le faia o ma’umaga e galulue ai aiga ina ia fesoasoani i le tele o mea e fai i lenei vaitau.

“A tagai foi i si o matou nu’u, o lo’o fa’atau lava meamata a aiga i tafatafa ala ona e lelei uma ma’umaga a aiga.

“O le manuia foi lea o lenei nu’u ona o le galulue.

“Auā a na’o le pisa lava i le faigata o le olaga ae leai se mea e faia ai, ona matua’i faigata loa lea ma pologa.

“Ae a galulue lava, e mafai lava on fo’ia ia fa’afitauli.”

By Sarafina Sanerivi 12 December 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>