Tolopo le Fa’amasinoga se’ia toe iloilo le talosaga

By Pai Mulitalo Ale 21 June 2016, 12:00AM

O ananafi na toe tula’i ai i luma o le Fa’amasino Sili, Le Afioga a Patu Tiava’asu’e Falefatu Sapolu, Aitken Keil ma Kim Carruthers e tali i o la moliaga. 

O lo’o molia le to’alua lea i mata’upu tau-fuala’au fa’asaina, lea na maua i se osofa’iga a Leoleo i le Aso 27 o Me, 2016 i Lotopa. 

O Aitken – o lo’o taofia pea e Leoleo, o lo’o tula’i ai i le fa’amasinoga, lana loia o Rosella Papali’i, lea sa talosagaina le tatalaina i tua o Aitken mai le falepuipui. 

Peita’i, na talosagaina e Lucy Sio o le Ofisa mo Moliaga le fa’amasinoga, mo se isi vaiaso e tolopoina ai lea mata’upu, se’ia fa’amae’a le toe iloiloina o le talosaga e tatala ai i tua.  

Na fa’ailoa e Papali’i i le fa’amasinoga, o le vaiaso talu ai na tu’uina atu ai lana talosaga ma toe toloina mai ai le mata’upu i le vaiaso nei, e le gata e fa’amae’aina ai moliaga a le Vaega mo Moliaga, ae fa’apea fo’i le iloiloina o le talosaga mo le tatalaina i tua. 

Peita’i, na fa’ailoa lava e Papali’i i le fa’amasinoga, na te le-te’ena le talosaga ae na fesiligia lava se fa’a’iuga o le aso e tolo iai lea mata’upu. 

Na talia e le Fa’amasino Sili lea talosaga ina ia tolopoina le mata’upu se’ia aulia le Aso 27 o Iuni 2016 e fa’amae’a ai tapenaga a le Ofisa mo Moliaga e pei ona talosagaina. 

O  Kim Carruthers sa tula’i ai le Loia o Leota Raymond Schuster ma te’ena moliaga uma o lo’o tu’ua’ia ai Kim.

O la’ua uma nei, sa pu’eina e Leoleo i se latou osofa’iga na faia i le lua i le vaveao o le Aso Faraile, i le Fale Ta’alo i Lotopa. 

I lea osofa’iga na maua ai e Leoleo se vaega o lo’o masalomia na fa’aaogaina e le to’alua lea mo le ulaina o ia fuala’au fa’asaina fa’apea ma taga-pepa sa fa’aaoga e fe’avea’i fuala’au fa’asaina.

By Pai Mulitalo Ale 21 June 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>