UA OLA A MOAMOA SAMOA! –LIFE IN SAMOA IS LIKE THAT OF A TRUNK-FISH

17 July 2016

Tatou te faafetaia pea le alofa ma le agalelei o le Atua ua aumai ai lou soifua Samoa i le manuia i lenei taeao fou-o le Aso o Tapuaiga Faitele a Samoa i le Atua Silisili Ese e Toatasi-o loo faavae ai lona Malo Tuto’atasi.

E le o se mea e tau faailoa atu Samoa- e ui lava ina sa tatou feagai ma mala ma puapuaga i lena vaiaso ua mavae atu-aemaise ai o le maliu ma le oti ua motusia ai mafutaga pele ma Matua, Uso, Tuafafine- o nisi o tatou Aiga aemaise ai o le fanau pele- ae faafetai e le o tuulafoaina i tatou e le Atua i taimi o puapuaga ma mea tiga-aua e lava ma totoe lona Mana e faamafanafanaina ai i tatou!

Ia-ia i le Atua Poto e Toatasi-le Viiga ma le Faaneetaga – e amata atu nei se’ia o’o i le faavavau, faavau lava! Ia –alo maia Samoa o le tatou Talanoaga masani foi lenei ma le ‘aufaitau o lenei nusipepa i Aso Sa uma- ae tainane foi le mamalu o le atunuu o loo fiafia e faitau i lenei tusitusiga! Ia- o lena ua tusia i luga le ulutala o le tatou Talanoaga- ae tatau lava ona avatu muamua se faamanatu e faapea:-O lenei tusitusiga- e le o se faaleaga i se tasi poo le tuua’ia foi o se tasi; e le o se tala fatu fua poo se faa-oloataua- e leai lava!

O le aano moni o lenei tusitusiga- o le fia faailoa atu lea o mea uma-lelei pe leaga-o tutupu i totonu o lo tatou atunuu- e tusa ai ma la outou aia tatau-tou te silafia ai ia mea uma! O le ulutala la o lenei talanoaga-o lena ua tusia manino i luga-ma e i ai le faamoemoe o le tusitala-ua manino lelei ma malamalama i le atunuu!

Ae afai lava e moomia pea se isi faamalamalamaga- ia o le a ‘ou taumafai atu e faapupula atili. Fai mai le ulutala o le tatou talanoaga-“Ua ola a Moamoa Samoa”-o lona uiga-o le soifuaga lea ua i ai nei Samoa- ua soifua i le popole, fefe, mativa masaesae ma le atuatuvale. O le Moamoa-o le igoa lea o se i’a o le sami-ma o lea i’a –e le maua sona mapu -ona o le tele o i’a fe’ai o le moana e lamalama ia te ia!

E le nofonofo lelei-e le mafai foi ona malolo pe moe-e le mafai ona sau i fafo ma lona moega-talu ai –o le taimi lava e aliali mai ai i fafo- o le taimi foi lena e uma ai ma lona ola!

O le pogai lena o le ola popole o lenei ‘ia itiiti-aua e leai sona malosi e tali atu ai i le saua ma le faatautala o i’a tele o le moana. O le faatusa tonu lava lena o le tulaga lea ua i ai nei le soifua o Samoa! Ua pei o le ola a le i’a o le Moamoa. Ua leai se vaipanoa e mafai ona faapea o loo saogalemu. Ua lamatia faasoloatoa le soifuaga o le atunuu-talu ai faiga faatautala ma le pi’opi’o o le faiga-malo.

ADVERTISEMENT

O ia tupe e faitau miliona ma miliona na faamaonia e le Pule ma Su’etusi Sili i ana lipoti- ana faaaoga tatau e le faiga-malo e faaleleia ai le soifua o le atunuu-semanu e le soifua Samoa e pei o le ola o le moamoa! Silasila i alo ma fanau ia e feoa’i solo i luga o ala tetele i le ao ma le po e faatau atu ni oloa ina ia maua ai se tupe e tausi ai o latou aiga!

A tuu ane i le Tau o le Soifuaga i Samoa nei-ua le iloa e le atunuu pe o le a faapefea ona ola. E tipi le lafoga o le totogi o le tagata faigaluega- ae a alu atu e faatau mai se mea’ai mo le aiga- e toe totogi foi le isi lafoga. O lea foi ua toe sii le Tau o le Soifuaga i lenei tausaga-ma ua atili ai pagatia le atunuu i soo se tafa o Samoa! Ua totogi e le atunuu le suauu e vili ai le eletise-toe totogi aitalafu a le Malo ma pili o latou moli eletise.

O le tau o le suauu ma le penisini atoa ma malaga i le vaalele-ua su’e uma ai tupe a le Malo! Ae o le fesili-faamata ana faaaoga tatau e le malo le faitau miliona ma miliona o tupe a le atunuu ia na o latou faaaoga sese e ala i taupulepulega leaga a tagata faigaluega ma faiga pi’opi’o a taitai o le Malo-e ola a moamoa le atunuu?!

O le fesili la-Samoa -o sou tofi lea o le ola a moamoa? O se mea lea na finagalo ai outou matua ma loto i ai ni o matou matua- ina ia tatou ola a moamoa poo le ola ma le fefe i taimi uma? Silasila i nai fanau ua le momoe i le po ae ua feoa’i solo i ala tetele e faatau atu oloa ona ua popole ma fefe pe o le a faapefea ona ola le aiga i le isi aso? Afai la e ola a moamoa le atunuu ona o faiga a o latou taitai-o le a la le taunuuga e o’o i ai? O le upu moni-“Toe lava o le ‘Ea a le Atua lea e manavaina e Samoa- e le o i ai se lafoga a le Malo.

Silasila la i le matautia ma le uiga ese o soligatulafono i nei aso! O le a le pogai? Ua ola a moamoa tagata- ua le iloa pe o fea o le a maua ai se lavea’i ma se mapu. Afai la ua ola Moamoa Samoa-o le a le mea o le a o’o i ai a tatou fanau? Afai e ola i le fefe -o lona uiga o le a tua i le solitulafono ina ia maua ai se lavea’i ! Silasila i le sasao faa-afi o le fasioti tagata!

Ua pei lava o le mea noa! Silasila i le gaoi ma le talepe fale, tosoteine ma le sosola so’o o pagota i fafo! E mafua isea? E mafua i le le mautinoa, le mautonu ma le fefe! Aisea? O puapuaga ma mea faigata ua tulai mai e pei o se mauga! Ua le iloa pe o le a faapefea ona laasia! Ua le iloa e tagata pe o le a faapefea ona tali atu i lenei anoano o mea faigata! Ae ia manatua foi- e le o ni mea faigata na afua atu i tagata o le atunuu-ae o mea na afua mai taitai o le atunuu na latou filifilia.

Afai la e faitau miliona ma miliona tupe a le atunuu ua maumau talu ai faiga piopio a le malo ma taupulepulega leaga a tagata faigaluega-o le a faapefea la ona le soifua i tiga Samoa? Afai la o le a 40 lava tausaga o fai lava nei mea leaga e le HRPP ma ua afaina ai le atunuu-ia manatua la-poo a lava upu suamalie ma faamatalaga e fai mai-“ae le mafai lava ona suia e le “nameli lana lava amio masani”.

Afai e te talitonu ma ‘ou talitonu ua ‘ola a moamoa Samoa’-o lona uiga-o lena foi e aofia ai ma lou aiga ma lou nuu ma lou itumalo! Afai la e 24 itula tasi le aso- ae o le amio lea a le moamoa- e le mafai ona moe ona o le fefe; a tu’u mai la ia i tatou-o lea ua savali le 40 tausaga o pulea e le HRPP le malo o Samoa!

O le fesili la-ua lava na tausaga e te le moe ai- pe e te toe manaomia nisi tausaga faaopoopo-e te saga le moe ai ma lē momoe ai ma lou aiga-ona o le popole ma le fefe- e te loto lava la i lenei ituaiga o soifuaga o le nofo i le popole ma le atuatuvale? O le a sou taofi? Ia manuia tele le Aso Sa Samoa.

17 July 2016

Related Stories


Bg pattern top

Sign in for free to read more stories

Bg pattern light

UPGRADE TO PREMIUM

Subscribe to Samoa Observer Online

Enjoy access to over a thousand articles per month, on any device as well as feature-length investgative articles.

Ready to signup?