Molimau Toea’i’ina o le Ekalesia

22 February 2016

Riportia e Lanuola Tusani Tupufia

Fa’aliliu e Maiava  

 

E to’atolu sui o le Komiti a le ‘Au-Toeai’ina (o le Ekalesia Fa’apotopotoga Kerisiano Samoa – EFKS) na tula’i i le Fa’amasinoga e fa’amautuina la latou fa’ai’uga na ‘ave’esea ai tofiga e lua a le ekalesia, mai le Faife’au o Kerita Reupena.

O le Aso Faraile talu ai, na tutula’i ai i luma o le Fa’amasinoga, le Sui-Ta’ita’ifono o le Ekalesia, le Toea’ina Fa’atonu o Tauti’aga Senara, le Toea’ina Fa’atonu o Kerisiano Soti ma le Toea’ina Fa’atonu o Peleti Toailoa, e molimau i le fa’amasinoga o se tagi fa’asaga ia latou uma.

E le’i faia se molimau a le Ta’ita’ifono o le Ekalesia, le Toea’ina o Tavita Roma.

O lo’o molia i le fa’amasinoga sui o le Komiti a le ‘Au-Toea’i’ina, ona o le latou fa’ai’uga na ‘ave’esea ai tofiga e lua mai le Faife’au o Kerita Reupena o Ipswich i Ausetalia e aofia ai le tofiga o le Toea’ina Fa’atonu o le Matagaluega a Kuiniselani  

O le loia o Leuluaialii Olinda Woodroffee o lo’o tulai mo le Faife’au o Kerita a’o loia o Francis Cooke, Leota Tima Leavai ma Semi Leung o lo’o tula’i mo le Ekalesia.

O le Fa’amasino Sili, o Patu Tiavaasu’e Falefatu Sapolu o lo’o fa’afoeina le fa’amasinoga. 

Na toe fa’amanatu e le Toea’ina o Kerisiano Soti, le fono lea na laga ai le fe‘ese’esega i le Matagalega a Kuiniselani. O le fono lea, na fa’aalia lona popolega ona o le fe’ese’esea’iga lea, e ono o’o atu I se tulaga fa’ateteleina pe a o’o i le Fono Tele Fa’aletausaga I Malua, talu ai, e tasi lava le maota o le matagaluega lea i totonu o Malua.

“E ui sa saunoa Kerita e le o-gatasi ma le Fa’avae o le Ekalesia, ae tumau pea le talitonuga o le Komiti a le ‘Au-Toea’i’ina, e ao ona faia o se fa’atatau a’o le’i o’o atu i se isi la’asaga e ono tupu ai ni pefea,” o le saunoaga lea a le Toea’ina o Kerisiano. 

“Ona fai lea o le i’uga a le Komiti, ia toe fa’alelei le matagaluega. A le-mafai loa ona latou faia lea tulaga, ua tatau loa ona vaeluaina.

Sa faia se fono peita’i na ta’ua e le molimau, sa iai lava ‘ese’esega na va’aia ma tula’i mai.

 

“Na ta’u mai ai i le Fono a le ‘Au-Toeai’ina, o lo’o tumau pea ona iai ‘ese’esega i totonu o le matagaluega,” o le fa’aaliga lea a Kerisiano.

 “O le ulua’i taimi lea ua tula’i mai ai se tulaga fa’apea – le vaeluaina o se matagaluega i totonu o le ekalesia. I nisi matagaluega, e mafai lava ona toe fofo e latou a latou lava fe’ese’esea’iga ma fa’aletonu.” 

I le taimi o su’esu’ega, na fesili ai Leuluaialii, pe aisea na ‘ave’esea ai Kerika mai le fono a le Komiti a Toeai’ina.

Na tali Kerisiano, o le mata’upu lea sa talanoaina i le fono, o le Faife’au o Kerita.

“E sili pe a le-‘auai o ia mai le fono, ia mafai ai ona fa’aaliga sa’oloto finagalo ma lagona o tagata uma, ma matou manatu ai, (o nisi o finagalo na fa’aalia), e ono tiga ai ma afaina ona lagona.” 

Na fa’aaliga fo’i, sa manan’o latou uma e toe fa’alelei le matagaluega atoa peita’i sa le mafai lava talu ai, ona o nisi o sui sa tete’e malosi lava i lea mana’oga.

O Ianuari o le 2015 na tupu ai lenei fa’aletonu.  

Na ta’ua fo’i e Kerisiano, i le taimi lea, ua mae’a ona fa’ailoa ia Kerita ma isi le vavaeina o le matagaluega ma fa’ailoa fo’i iai, ia tapena ma sauni mo tofiga fou.

“Na fa’ailoa fo’i iai ia faia ni tapenaga o mata’upu e manana’o e laga I le Fono Tele a le Ekalesia toe o nai masina fa’atino i lea taimi.” 

Na finau atu le loia o Leuluaialii, sa taumafai lava le faifeau o Kerita e faia se fa’aleleiga a le Matagaluega peita, e le’i manuia ona sa leai se felagolagoma’i.

ADVERTISEMENT

Na ali le Toea’ina o Kerisiano, o le faia o se fa’aleleiga, o le tasi lea ‘auala ma o le Faife’au o Kerita, o le ta’ita’i sa iai i le taimi lea, lona uiga, o ia lava sa tatau ona faia ma fa’ataunu’u lea fuafuaga. 

“O lana matafaioi lea e pei ona iai i lalo o le Fa’avae a le Ekalesia,” o lana fa’aopopo mai lea. 

Na fesiligia fo’i e le loia le fa’ai’uga a le Komiti a le ‘Au-Toeai’ina, na ‘ave’esea ai tofi o Kerita Reupena e ui o le fa’ai’uga na tu’uina mai e le Fa’amasinoga.

O le taimi lea na fa’asalavei ai le Fa’amasino Sili o Patu.

Na saunoa fa’amalamalama Patu, o lana fa’ai’uga sa faia o se tulaga le-tumau e le faia ai o se sui mo le Faife’au o Kerita.

“’Ou te le’i fai atu fa’apea ia sui pe fa’aleaogaina fo’i le fa’ai’uga a le Komiti a le ‘Au-Toeai’ina,”o le saunoaga lea a le Fa’amasino Sili. 

Na molimau fo’i le Toea’ina Fa’atonu o Peleti To’ailoa, o ia o le Ta’ita’ifono o le Komiti i le taimi lea. 

Na fesiligia e Leuluaialii le Toea’ina o Peleti, e uiga i lana talosaga e feiloai ma Kerita Reupena e talanoaina fe’ese’esea’iga a le Matagaluega.  

  “E tusa ai ma ‘ou tiute o le Ta’ita’ifono ma se matai, a tula’i mai se ‘ese’esega i totonu o le matagaluega, e tatau ‘ona ‘ou tu i luga e fai se fa’atatau iai,” o le saunoaga lea a le Toea’ina o Peleti.

“Na saunoa mai Kerita, e le fa’atagainaina i le Fa’avae o le ekalesia ona fono peita’i, ona o a’u o le Ta’ita’ifono, ‘ou te lagona e tatau ona fai o sa’u galuega ma sa taumafai lava e fa’amatala le tulaga lea ia Kerita.” 

Na fesiligia fo’i ona ose fa’ato’esega a Kerita ia ia, ae saunoa Peleti, sa na taliaina. O lona talitonuga, o le fa’ato’esega a Kerita, ona o lona le-taliaina muamua o lana talosaga la te feiloa’i.

Na fesiligia fo’i le Faife’au Toea’ina o Tauti’aga, le Sui-Ta’ita’ifono a le Ekalesia, e uiga fa’atuina o le matagaluega fou.

Na finau atu le loia, ua fa’ailoa atu e Kerita se tulaga ‘ese ona ua ta’ua lana matagaluega o se matagaluega fou peita’i, o le igoa tuai lava o lo’o fa’aigoa ai, o lo’o latou fa’aaogaina fo’i le falesa tuai ma tagata-lotu lava e tasi.

Na tali le Toea’ina o Tauti’aga, o le ‘upu fou e fa’asino tonu i le matagaluega ua fou ona tagata ma le numera.

“O le igoa tuai lava peita’i, o se matagaluega ua fou ma o lo’u lea malamalama iai.”  

Na fesiligia fo’i, pe ua iai nis suiga iloga o le matagaluega e pei ona fa’aigoaina ai o le matagaluega fou.

Na tali Tauti’aga, ua iai suiga ona o le aofa’i o tagata-fa’atuatua i le matagaluega ua fa’aitiitia.

 “’Ou te matea, i tulaga tau-seleni ma le lagolago i so’o se mea a le matagaluega e manana’o ai, o le a fa’aitiitia ma ua le toe tutusa la malosi e pei ona sa iai muamua, sa lava le malosi.”

O le fesili mulimuli a Leuluaialii, e fa’atatau i se fono lea na sa tu’uina atu ai se talosaga e ‘auala atu i le Failautusi Aoao talu ai o Iutisone Salevao, ina ia talia-aloa’ia lana asiasiga o le Aso 12 o Mati 2015. 

Na fesili, pe mafai e le molimau (Tauti’aga) ona fa’amaonia lana talosaga e talanoaina le fa’ai’uga a le Komiti a le ‘Au-Toeai’ina na faia ia Kerita ma le faia o se fa’aleleiga.

Ae na fa’afetaui mai e le Toea’ina o Tauti’aga, e tolu lava ‘autu o le asiasiga a Leuluaialii.

Na saunoa, o le mafuaga lona tolu, o le fa’amata’u lea o latou, o le a ‘ave le mata’upu i le Fa’amasinoga.

 “Na fa’ate’ia lava a’u nei ona o uiga-fa’aalia a le loia lea ma le ‘aumaiga o ana saunoaga ia matou, e le o ni ‘upu ia ma saunoaga ma ni aga a se loia,” o le saunoaga lea a le Toea’ina o Tauti’aga.

“Sa ‘ou matua fa’anoanoa ai lava. Na fa’amata’u matou ma ‘ou te mautinoa sa iai nisi na fefefe ina ua saunoa mai, a matou le faia se fa’ai’uga o le a alu sa’o i le Fa’amasinoga i le taimi lea.

“Sa matou taumafai lava e fa’afilemu ma fa’aleleia mea uma ae saunoa mai pea, a matou le faia le mea e mana’o ai, o le a alu i le Fa’amasinoga ma o le tulaga lena o lea ‘ou te manatua.”

Ua tolopoina nei e le Fa’amasino Sili le mata’upu mo loia, e faia ai a latou folasaga mulimuli, i le masina fou. 

22 February 2016

Related Stories


Bg pattern top

Sign in for free to read more stories

Bg pattern light

UPGRADE TO PREMIUM

Subscribe to Samoa Observer Online

Enjoy access to over a thousand articles per month, on any device as well as feature-length investgative articles.

Ready to signup?