Galue malosi mo se manuia o fanau ma aiga

SS
By Sarafina Sanerivi, 24 September 2016

Hana Fa’afeu’u o se tinā e 27 tausaga mai le afioaga o Faleasi’u, o se tinā e galue malosi auā se lumana’i o lona aiga.

Na afea e le Fofoga o Samoa le tinā ia Hana ananafi o lo’o fa’atau ana oloa i tafā ala o le afioaga o Faleasi’u. 

Sa ia fa’ailoa mai, o ana galuega uma e fai e afua mai lea i lona naunauta’iga ina ia maua se fesoasoani auā le tausiga o lana fanau ma lona aiga. 

“O le mafua’aga ou te fiafia ai e fai lenei mea auā e maua mai ai le fesoasoani mo a’u ma lo’u aiga. O le tupe e maua mai i lenei mea e fesoasoani tele mo le tausiga o lo’u aiga aemaise o la’u fanau. 

“Auā o le vaitau lenei, ua fai lava si taugata o le soifuaga, ae a tatou nofonofo loa ma fa’avaivai ona fia a’ai lea o fanau aemaise o le aiga.

“Ou te talitonu fo’i au ia e leai se mativa i Samoa. O lo’o tamaoaiga le atunu’u i le tele o fanua e galulue ai aemaise o le sami e maua mai ai mea e tausi ai aiga.” 

Na ia fa’aalia fo’i  o le galue malosi lava o le a’upega malosi lenā e maua ai le manuia mo fanau ma aiga.

Na saunoa fo’i Hana, e faigofie lava le olaga o lo’o iai Samoa i lenei vaitau. 

ADVERTISEMENT

“Ia o a’u ia, e leai a ni mea tele e faia i le aso. O feau masani lava e fai i totonu o aiga. 

“E ala usu lava i le taeao i le faiga o meaai ma lavalava o tamaiti aoga. A ma’ea lea ona tapena loa lea o mea e aumai e fa’atau aua se tupe e fesoasoani i mea e fai a le aiga.”

Peita’i, na fa’ailoa mai e Hana, e le’o aso uma e fa’atau ai ana oloa. 

“A lava a fagu’u ma koko ua aumai e fa’atau. Ia o isi mea e fa’atau o esi, salulima ma isi a mea.”

Ae le gata i lea, na saunoa fo’i Hana, e fa’aosofia lava lona fia galue ona o le suamalie o le fa’alogona o le va’ai atu i le fiafia o lona aiga ma lana fanau i fa’amanuiaga e maua mai i ana oloa e fa’atau. 

“E mo’i lava e fa’amata e faigata i le tagataga’i a nisi, ae ia te a’u lava ia, e le faigata auā o lea e alu tatau le malosi. 

“Ma o le ala lena e to’atele ai i latou ua fa’apea mai e taugata le soifuaga ona o le nofonofo i aiga ma fa’apalapala.”

E ui fo’i lava ina iai nisi o le aiga o Hana o lo’o faigaluega, e le’o tu’ua ai lava le naunau o Hana ina ia fa’aauau pea lana galuega o lo’o fai e fesoasoani ai i mea fai i totonu o le aiga. 

“O le soifuaga lenei, a tatou le galulue, tatou te le maua se manuia. 

“O le fua a ete luluina, o le fua fo’i lena ete toe seleseleina. O au galuega fo’i e fai e manuia ai le fanau i le lumana’i. 

 

SS
By Sarafina Sanerivi, 24 September 2016

Related Stories


Bg pattern top

Sign in for free to read more stories

Bg pattern light

UPGRADE TO PREMIUM

Subscribe to Samoa Observer Online

Enjoy access to over a thousand articles per month, on any device as well as feature-length investgative articles.

Ready to signup?