Fa’aaoga tatau le malosi

SS
By Sarafina Sanerivi, 24 September 2016

E leai lava se mea e maua ma se filemū.

O le upu lea ua masani ai lava le fa’afofoga ma le fa’alogo a le atunu’u.  Ma o le manatu foi lea o le taule’ale’a ia Sam Pati, e 19 tausaga mai le alalafaga o Tiāvī.

Sa fa’ailoa mai e Sam i le Fofoga o Samoa, o lo’o ia matuā fiafia lava i le olaga faima’umaga. 

“O tua nei, o lo’o ola lava tagata i le olaga ma le soifuaga fa’asamoa,” o lana tala lea. 

“E leai lava se isi e savalivali solo e leai se mea e faia. Ua iai lava fe’au a le tagata ia e fai. Ua masani foi le olaga o tagata i tua nei i le ola galulue. 

“Ma iā te a’u lava ia, e sili atu lo’u sau e toto le talo ma fa’i nai lo’o le fa’aalu sesē o le malosi i isi mea lē aoga. 

O le olaga lava ia i tua nei, e ala usu lava i le ma’umaga ma fai galuega ao le’i vevela le la.”

Na ia ta’ua fo’i o le faigofie fo’i o le olaga i nu’u i tua, e seāseā ai lava ona tutupu ni fa’afitauli i tupulaga. 

ADVERTISEMENT

“O la’u tala mo’i lava lea; e leai lava ni fa’afitauli ma ni fa’alavelave i nu’u i tua nei. O le mamao mai o matou mai le taulaga atoa ai ma le mamalu o pulega a ali’i ma faipule, e sologa lelei ai lava le olaga ia i tua nei. 

“Na’o le pau lava lea o le mea e ave ai le fa’amuamua ma fa’aaoga iai le malosi mai le Atua, o le faiga o ma’umaga auā le tausiga o aiga.”

Na fa’ailoa mai foi e Sam, o lo’o ia matuā fiafia lava i le olaga o lo’o ia ola ai i le taimi nei. 

“Ou te matua’i fiafia lava i le olaga i tua nei. O le matua’i tele lava o le tamaoaiga o lo’o maua i tua nei, ma ou te fiafia lava a’u ia i le olaga i tua nei. 

“E sili atu lava la iā te a’u le nofo i tua nei ma fai le ma’umaga ma tausi ai aiga.”

Na ta’ua foi e Sam, o le tupe na te maua mai i le fa’atauina o ana talo, e ave uma lea i ona matua aua mea e fai i totonu o aiga. 

E ui foi lava ina iai tagata faigaluega i totonu o le aiga o Sam, e le’o avea lea ma ala e taofia ai le ola galue o Sam. 

“O le ma’umaga lea e maua ai talo aua mea’ai i aso ta’itasi. E le alu lava se tupe e fa’atau ai se alaisa poo se meamata.

“Ma o la’u fautuaga lea mo isi uso e le’o fa’aaoga tatau o latou malosi mai le Atua, ina ia fa’aaoga tatau taleni ma le malosi mai le Atua e tautua ai aiga ia ma le Atua.  “E sili a le olaga faima’umaga. E moi lava e faigata, ia ae leai se mea e maua ma se filemu. A le galue lava le tagata e le maua se manuia mo aiga. 

“A fai foi e mafai ona faia e isi, aiseā la e le mafai ai e nisi?”

SS
By Sarafina Sanerivi, 24 September 2016

Related Stories


Bg pattern top

Sign in for free to read more stories

Bg pattern light

UPGRADE TO PREMIUM

Subscribe to Samoa Observer Online

Enjoy access to over a thousand articles per month, on any device as well as feature-length investgative articles.

Ready to signup?