Fesoasoani Saina e ati-a’e le musika ma isi taleni

By Pai Mulitalo Ale 16 July 2016, 12:00AM

O le Kolisi o Avele, o se a’oga e matua anoanoa’i le mau taleni ‘ese’ese e maua iai. 

O lo’o a’o’oga ai fanau e fiafia e kuka, fiafia e vali-ata, e kamuta, lelei i ta’aloga ma le tele o isi taleni o lo’o atina’eina ma fa’aleleia atili ai. 

O le tausaga talu ai, na fa’aopoopo iai ma le musika, e le Pule o le Kolisi, o Lesaisa’ea Matafeo Reupena.

O le vaiaso nei, na asiasi atu ai le Amepasa o le Malo o Saina i Samoa nei, o Wang Xuefeng, i lea kolisi ma taua’aoina iai se piano fou mo le Vaega o Musika a le Kolisi. Sa fa’apea fo’i ona foa’ia iai ma se pusa’aisa e fa’aaoga i mata’upu tau-kuka ma isi. O le tau aofa’i o ia meaalofa, e $4,000.00. 

Na fa’afetaia e le Ali’i Amepasa, le Pule o le Kolisia, ona o le avanoa ua mafai ona o’o atu ai ma lona faletua o Tong Xing, e asiasi i laufanua o le Puataunofo. 

Na saunoa, ua tele ta’ita’i o matata ‘ese’ese o galuega, ua maua mai le Kolisi ma faia so latou sao taua ma aoga mo le atina’eina o Samoa. 

“’Ou te talosia, ia atili to’atele pea nisi e iai taleni ma agava’a mo le atina’eina o Samoa, e maua mai Avele,” o lana fa’aaliga lea. 

Na fa’aaliga le agaga fa’afetai o le Ali’i Pule o Lesaisa’ea, ona o le fa’aaloalo a le Amepasa ma le Faletua. Sa ia fa’afetaia fo’i, le sao aoga o se tasi o faia’oga-saienisi mai le malo o Saina, o lo’o galue-fua i le Kolisi o Avele.

“E na o le tolu lava vaiaso na avatu ai la matou talosaga, a ua matua fa’ate’ia matou uma, ona o lea ua fa’atino lou alofa ma lou ma’au i lenei aso,” o le fa’afetai lea a Lesaisa’ea. 

E talitonu le Ali’i Amepasa, o tupulaga talavou, o le lumana’i lea o le lalolagi.

I nei aso, ua matua iloga le tula’i mai o le malo o Saina i le saunia o avanoa fa’aSikolasipi mo fanau a Samoa e a’o’oga ai i Saina. 

Mo le to’atele o tamaiti-a’o’oga a Avele, na matua alalaga fiafia ma talia lelei le agalelei o le Amepasa ae maise le matua maofa i le tala-fa’asolopito, o tu ma aganu’u ae maise le agalelei o tagata Saina. 

“O le tatalo, ia avea lenei faiga-Pa’aga, o le a to’atele ai tupulaga o Samoa e aga’i atu e a’oa’oina i lo matou atunu’u.” 

By Pai Mulitalo Ale 16 July 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>