O LA’U TALA FO’I

16 July 2016, 12:00AM

1.Matauina i Tala Fou se ulutala fai mai ua “Teena faaupuga faa-uiga lua-ma o lea la ulutala e faasino lea i kamupani e gaosia le sikaleti poo le tapaa! E ui lava la ina moni le saunoaga a le Minisita o Pisinisi a le Malo e faapea sa leai ni fale gaosi tapaa i Samoa nei –ae sa ulaula lava tagata…..!

O le tapaa la sa taumafa e tagata Samoa i aso ua mavae-o le ‘tapa’a Samoa’lava. 

O lona uiga-sa leai ni vailaau sa faaaoga i ai-ae sa na ona faala lava se’ia mago-ona faatoa faaaoga lea! Ae afai la ua faaalia se agaga popole ona o le ulaula tapa’a-o le a la le pogai o le faataga foi o le Fale Tapa’a o Saina e fai i Falelauniu? E faapefea pe a feoti ai nisi? 

O manatua pisupo leaga ia ua avese mai faleoloa uma? O Pisupo a ai? Fai mai e taofi le ulaula tapa’a-ae o lea foi o le a fai le fale sikaleti o Saina. 

O le a le pogai o le faataga o nei Saina e fai soo se pisinisi i totonu o Samoa? Silasila i le ‘aufaipisinisi a Samoa! Ua le iloa pe o le a faapefea ona maua ni o latou manuia mai o latou faleoloa. Ua o’o i nuu i tua- o lea foi ua avanoa i ai Saina. 

Aisea ua le taofi ai nei Saina e fai a latou pisinisi i totonu o le Taulaga ae tuu nuu i tua mo le aufaipisinisi Samoa o loo taumafai a latou pisinisi? O lea la ua ataata mai le mea o loo popole i ai le atunuu! 

O lea ua amata tagata Saina i pisinisi-e le gata i totonu o le Taulaga-ae o lea ua faasolo atu i nuu i tua! A uma nei la ona faoa e tagata Saina avanoa tau pisinisi mai tagata Samoa-o le a le isi mea o le a soso’o ai? 

O le tali-ou te le vavalo-ae mautu loa tagata Saina i nuu i tua-ona liliu ane loa lea ave ma fanua faale-aganuu ae matamata fua tagata Samoa! O le fesili la-afai o le faigamalo lenei ua mafua ai ona o mai nei Saina i totonu o le atunuu-aisea ua le mafai ai ona ave faleoloa o nei Saina e faatu i totonu o le itumalo o le Palemia ma itumalo uma lava o faipule o loo lagolagoina lana faigamalo? O ai la na faatagaina nei Pisinisi Saina e faatu i totonu o nuu o le atunuu?

Afai o le faigamalo-o lona uiga-ua pule aoao le Palemia ma lana faigamalo i afioaga ma alalafaga o Samoa atoa? O fea o i ai le Pule mamalu a Alii ma Faipule? A faapefea ona ola ma faamanuiaina pisinisi a tagata o outou itumalo o loo tautua i le nuu ma ekalesia i aso uma-pe afai e faataga atu nei Saina i outou nuu? O le a sou taofi? 

2. Matauina foi i Tala Fou nisi o turisi mai NIu Sila sa asiasi atu i Savaii-ae na fasi ai e ni tama talavou! O ia la alii talavou ua uma ona saisai e Leoleo ma ua molia ona o le umia o ni ‘auupega mata’utia’ ma le faao’o o ni manu’a i lea ulugalii…! Ia-a tatou tilotilo la i nei faiga-o le fesili-aisea ua faapenei ai Samoa? O se mea lea sa masani ai Samoa? Afai la o lea ulugalii mai Niu Sila na aafia ai-ua toe taliu atu i lo la atunuu-faamata o le a se la faamatalaga o le a fai nei e uiga ia Samoa? 

Afai nei la ae faasalalau e lenei ulugalii le mea na tupu ia i la’ua i totonu o Samoa-i le lalolagi atoa-‘O ai la le turisi valea e toe fia sau i Samoa nei -ae na te iloa lelei e oti ai? Faamata la o silafia e le Malo lenei mea mataga? Ae o le a sana mea o le a fai i ai? Afai la e le o kea i ai le Malo-o le a se finagalo o afioaga ma alalafaga i nei mea mataga o loo ta’u ai latou? 

Ae o le fesili taua lava-‘Aisea ua le mafai ai ona pulea nei tupulaga talavou? O fea le ‘aufaigaluega pa’ia a le Atua o loo tala faa-uto i le salafa o Samoa mo le faaolaolaina o le finagalo o le Atua? Afai e na o le Aso Sa e galue ai-a faapefea le vaiaso atoa? O le a sou taofi?

3.Matauina foi i Tala Fou se ulutala fai mai-“E le’i faia lava ni moliaga e faasaga i Leoleo-ma o lea ulutala e faasino i se mataupu lea na pu’e ai se tagata o le atunuu ae faa-siilima e Leoleo-ma sa faa-auupegaina foi Leoleo. 

O le mau la a lea tama- e leai se mea o faia i lana mataupu faatasi ai ma le anoano o isi mea o loo ona fesiligia e uiga i lana mataupu. O le fesili la-aisea ua tuai ai ona fai ni moliaga e faasaga i Leoleo? O ai na te faia? O ai e i luga atu o le tulafono ae o ai e i lalo o le Tulafono? Afai e moni ma faamaoni- e leai ni moliaga o faia-o ai la e i luga atu o le tulafono-ae o ai e i lalo ifo o le tulafono? Afai la o moliaga e faasaga i Leoleo-o fea o i ai le faigamalo? Afai o le tulafono e mo tagata uma-aisea la ua le faatinoina ai?

O i ai ni polokiki leaga o filogia ai? Afai la o le tulafono na fai mo tagata uma-e tatau foi la ona faataunuu i tagata uma lava! O lona uiga-poo le a lava lou tulaga ma lou tofi i totonu o Samoa-tatou te mautali uma lava i   le Tulafono! O le a la sou taofi?

16 July 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>