Manatu o le Fa’atonu - Vaiaso o le popole ma le masalosalo

14 March 2016

Tusia - Mata’afa Keni Lesa

(Fa’aliliu e Maiava)

 

E tutupu matagi i liu o va’a pe a taula’i le silasila i le ulutala o le Sunday Samoa ananafi, “O ai o le a avea ma Sui-Palemia.

I le amata o lenei vaiaso a’o tulimata’ia e le atunu’u po’o ai o le a tusi-a’ao iai le Ali’i Palemia e avea ma Minisita o lana Kapeneta, e aoga fo’i ae fa’asoa atu nisi o motuga’afa ma le mamalu o le ‘aufaitau.

Muamua lava, e le mafai e le Palemia, o le Ta’ita’i fo’i o le HRPP, ona tofia o Faumuina Tiatia Liuga e avea ma Sui Palemia, ona e manatu tele i le maopopoga o le Vaega. 

O le mea mautinoa lava lena.

Talu ai le anoanoa’i o mea o lo’o tu’ufesiligia ai pea fa’atinoga a Faumuina ma a’afiaga o le Vaega Fa’a’Upufai e pei ona silafia, e mautinoa ai lava le le-faia e Tuila’epa o se tofiga fa’apena. E le gata e ono tutupu ai ni fete’ena’iga i le lotoifale lava o le Pati ona o Faumuina ma ana ta’ita’iga le-lelei, a ua mautinoa fo’i, le le-toe mo’omia e Tuila’epa o se isi fa’atiga-ulu e toe fa’aopopo atu i le taimi nei. 

A’o le isi fo’i itu, pe a fa’apea o lona lima-tausaga mulimuli lenei i le Palemene, e faigofie lava ona filifilia e Tuila’epa ia Faumuina, e fa’ailoa atu ai i tagata um - e aofia ai ma ona fili i totonu lava o le HRPP, a-mea e pule a ia i le mea e mana’o ai,  pe malilile iai pe leai fo’i. 

Ae ono tupu le mea lena.

ADVERTISEMENT

E mafua ona fai atu, ona e tiga le tele o fa’aletonu ua matauina, a’o lea lava e avea Faumuina, o se sui fa’atuatuaina ma talitonuina i totonu o le vaega fa’aUpufai o le HRPP.  O le fa’amaoniga lata mai nei nei lava, o le fa’ai’uga o le palota mo se Sui-Ta’ita’i o le Vaega, lea na malo ai Fiame Naomi Mata’afa, e na o le 21 i le 19. Si tama’i va lava. 

O le mea moni a, e faigofie lava ona ono malo ai i’ina Faumuina ma avea ma Sui-Ta’ita’i.  Ae ‘ana tupu se mea fa’apena, e le masalomia le avea sa’o lava ma Sui Palemia. 

A o le fesili la, fa’amata e foliga fa’apena le fa’ai’uga pe ana palota le isi to’afitu o le vaega? Lea e talanoa atu i sui ia na mautinoa e le’i ‘auai i le taimi o le palota. Se mea lea na fuafua pe a?

Po’o gafea lava e aga’i iai, e sili pe a fa’apea, o taimi aupito ma’ale’ale lea i totonu o le HRPP.   

O le tasi o vaitau e foliga mai e leai se mea o tupu ai.

Ae talitonu mai, e le fia to’ilalo ai fo’i le Sui Palemia talu ai, e le fa’avaivai ai fo’i Fonotoe ia. E mautinoa o lo’o matua e’eli fo’i ana foe ia tumau ai pea i lona tofiga lea, ma manatu ai fo’i, e tatau lava ona fa’aauau mo se isi lima tausaga. 

A’o le manumalo o Fiame i le palota a le vaega i le vaiaso talu ai, e toe ono malo ai fo’i i le tofiga lea i le vaiaso nei. Aua o ia le sui e ono i’u iai le tausinioga – e le gata o le to’atele e lagolagoina a’o le mautu fo’i ma le fa’amaopopoga o le vaega – a o le a atili aloa’ia ai ma vi’ia ai le malo ma Samoa atoa, ona o le filifilia o se tama’ita’i e avea ma Sui Palemia mo le ulua’i taimi i tala-fa’asolopito o faigamalo a le atunu’u. 

O le isi mata’upu o lo’o atupopole ma mamafa iai mafaufau, o latou o le a filifilia e avea ma Minisita o le Kapeneta. E mautinoa lava, o taimi aupito faigata nei mo le Ali’i Palemia. 

Moni ua manino le manumalo a’ia’i o lana vaega i Faiga Palota Lautele, a’o le taimi nei lava ia, e tatau ona tula’i mai ia manumalo i le taua, o le faia lea o fa’ai’uga sa’o, e filifilia ai tagata aupito lelei ma agava’a ma fa’atumauina ai pea le maopopo o le Vaega a le HRPP.  O le mea moni, e foliga o lo’o savali i mea-matuitui le Ali’i Palemia i le taimi nei, ma e mautinoa lava, e leai se tasi o tatou uma, e fia iai i se tulaga fa’apea. 

A’o le tala lelei la mo tatou, e le o toe ‘umi ae i’u le fa’amasinoga.

I le fa’ai’uga o lenei vaiaso, o le a fa’ailoa ai e le Palemia, Tuila’epa Sa’ilele Malielegaoi lana Kapeneta fou ma fa’amuta ai loa le popole ma le masalosalo. 

Manuia tele lenei vaiaso Samoa. Fa’amanuia Le Atua!

14 March 2016

Related Stories


Bg pattern top

Sign in for free to read more stories

Bg pattern light

UPGRADE TO PREMIUM

Subscribe to Samoa Observer Online

Enjoy access to over a thousand articles per month, on any device as well as feature-length investgative articles.

Ready to signup?