Manatu o le Fa’atonu - Le a le mea e toe fa’atali ai?

MK
By Mata'afa Keni Lesa, 24 March 2016

Lea la ua tuana’i malie atu le atu-vasa sousou lea, sa tu’u-fesilisili ai po’o ai o le a i le kapeneta fou a le Palemia, Tuila’epa Sa’ilele Malielgaoi, ma ua tatau ai nei ona fa’amanatu e se tasi i ali’i-tofia nei, ua tatau loa ona se’e i luma le sa, ua tatau ona fa’atutu-foe, silasila toto’a i mea na tutupu ananafi, e maua ai le ‘ai mo le savaliga ua amata nei.  

Ioe, ua te’a timuga, mavae fo’i samiga-sili. Ua o’o i le taimi e tui ai mea-faigaluega. Vagana ai se Minisita o le Kapeneta e ono toe ‘ave’esea ona o se tagi i le Fa’amasinoga, a o le galuega lava ia mo le Minisita fou, lea ua mae’a ona fa’asoa atu. Ma e matua anoanoa’i, e aofia ai fa’afitauli fai-fai-pea o lo’o fa’ataupupula mai ia tatou i aso uma, e le fia mou ‘ese – po’o fea lava e o’o iai le malosi e tau-fa’agalo.  

Si o matou lava manatu, o le tasi o ia fa’afitauli ogaoga e le’i faia lava iai se fofo, o faiga-pi’opi’o ia na maua e le Pule ma Su’etusi Sili i totonu o nisi o itutino o le malo lea fo’i na ripotia e le Komiti o Ofisa o le Palemene. O fa’aletonu nei na laga i le paea’ia talu ai a le Palemene ma e moni sa na o si tepa tasi lava iai ma fa’agalo, ae matou te talitonu, e tatau lava ona toe-lalaga i luga pei ona laulauvivilu ai, i faigamalo ma pulega lelei, e malamalama fa’ai’uga ma mea-fai ma ia fa’atino le amiotonu.  

Ae malie la, pei se mea na momoli mai Luga, le fa’asalalauga fa’alaua’itele a le malo i le lua aso talu ai. O lea fa’asalalauga aloa’ia – mai le Ofisa mo Moliaga a le Atunu’u (NPO), o lo’o fa’ailoa atu ai i le lalolagi, le sainia ai nei e le Ofisa fou lea, le NPO ma le Ofisa Suetusi a Samoa, o se Maliega Malamalama e galulue fa’atasi ai mo le fa’atinoina lelei male atoatoa o moliaga fa’asaga “i faiga fa’aalatua ma faiga-pi’opi’o.”  

 “E matua mo’omia lava le ‘ausia o le poto ma le atamai maoa’e, e tagofia ai ma su’esu’eina faiga fa’aalatua ma faiga-pi’opi’o ogaoga nei aua le faia o moliaga talafeagai,”o le fa’asilasila lea. 

“Ua iai i le Ofisa Su’etusi ia tomai taua mo le fa’atinoina lelei o moliaga mo fa’amasinoga. O le fa’amoemoe o lenei faiga-pa’aga, o le a sologa lelei ai le fa’atinoga o moliaga i mata’upu lavelave e mo’omia ai tomai agava’a fa’apitoa lea o le a taumafai le Ofisa Su’etusi e fa’aleleia.”

O se tala manaia tele lea mo tatou.

Ua toe fa’amanatu mai ai se maliega fa’apea fo’i, na ulua’i sainia i le tausaga talu ai,  e  le Ofisa o le Loia Sili ma le Ofisa Su’etusi, lea na talanoaina ai le faia o se fa’atatau i faiga-pi’opi’o ma fa’aalatua. Matou te le o malamalama, pe o le mea lava lea e tasi e pei ona sainia nei e ofisa ia e lua. 

Ae po’o le a lava, a ua mautinoa o se fa’aola-totoga na’ua, ona o lea ua malele mai le tala, o le a galulue fa’atasi ofisa nei e ulu-sa’o lava ma foi’a ia fa’afitauli. A o le fa’alavelave la, e leai se aoga o nei maliega uma, pe a le fa’aaogaina.  

Ua matou ta’ua lea tulaga ona matou te talitonu, e iai gaioiga ma faiga-sese o lo’o pulato’a mai pea i o tatou tagata, e le’i faia lava iai se fa’atatau. 

Lea matou te talanoa atu i se faula’iga-fa’amaumauga na ave o “molimau”, lea na taua’aoina i le Ali’i Palemia o Tuila’epa i le tausaga taluai, e fa’amaonia taupulepulega a nisi le ‘aufaigaluega a le malo e fa’aaoga-sese tupe-faitele, i le Fa’alapotopotoga mo ‘Ele’ele a Samoa (le SLC). 

O le tusi lea – na tusia i le Aso 24 o Ianuari 2015 - na fa’atoa tusia ina ua mae’a ona pasia e le Palemene le tali ua leva ona fa’atali a le malo, e uiga i le ripoti a le Komiti a Ofisa o le Palemene (OPC). I le ripoti lea a le Komiti, sa iai se fautuga ina ‘ave i le tulafono, le ‘aufaigaluega a le malo o lo’o a’afia i ia faiga-pi’opi’o.   

I le tali a le Ali’i Palemia, na ia ioeina ai vaega fa’aletonu na laga peita’i, sa ia fa’amautu mai, ua mae’a ona fa’atinoina e le malo, o galuega ma fa’atinoga talafeagai, e fa’aleleia ai le ‘au’aunaga. 

Ona pusi-nofo ai lea o lena fa’aletonu, leai se isi tala na faia e uiga i fautuaga sa iai, e ‘ave le mata’upu i le fa’amasinoga e fai iai se fa’ai’uga, i le ‘aufaigaluega na tausolomua i ia fa’aletonu. O lona uiga, ua sa’oloto e leai se fa’asalaga, i latou na. 

O le tulaga tonu lava lea na matua le-fiafia ai le Ta’ita’ifono  o le Komiti o Tupe a le Palemene i lena taimi, le Susuga a Papali’i Niko Lee Hang, lea sa matua tete’e malosi i le fa’ataga o “faiga-pi’opi’o” i totonu o galuega a le malo, ae o lo’o pologa le-leoa le mamalu o le atunu’u.  

Mafuaga tonu lea na una’ia ai e Papali’i le Palemia ma tatalo fa’atauanau, ina ia toe silasila toto’a ane i fa’amaumau na tu’uina atu e le Komiti a Ofisa o le Palemene.

A silasila la i le maliega ua faia nei e le Ofisa o Moliaga ma le Ofisa Su’etusi lea e fa’apea o le “a galulue fa’atasi ai mo le fa’atinoina lelei ma le atoatoa o moliaga fa’asaga ‘i faiga fa’aalatua ma faiga-pi’opi’o,” matou te talitonu, ua talafeauga lelei le toe silasila toto’a i molimau nei:  

 

• FA’AMATU’UINA ATU FA’ASOLITULAFONO O LE 10% O TUPE TAOFIOFIA – TAUPULEPULEGA E FA’AAOGA-SESE TUPE FAITELE A LE ATUNU’U 

 

ADVERTISEMENT

O se gaioiga e fa’aaoga-sese ai tupe a le atunu’u sa fa’atinoina e le Minisita, le Ofisa Sili ma le konekarate lea sa talosagaina le fa’amatu’uina atu o le 10% o Tupe-taofiofi e fa’aaogaina ai se Feagaiga fa’aInisiua taufa’asese e fai ma fa’amaoniga ma sa fa’amaonia lava e le Minisita ma le Ofisa Sili ma lo la silafia o se Inisiua tau-fa’asese talu ai, e leai ni tupe-totogi fa’avaitaimi ma sa fa’amonia lava le tulaga e le kamupani inisiua ma ta’ua ai, e le o toe aoga lea feagaiga, ua le toe aoga. E le gata i lea, o le vave fa’amatu’uina atu o le 10 % lea o tupe-taofiofi a’o le’i mae’a le galuega, ae maise e le’i mae’a le 12 masina talu ona mae’a o le galuega, ua afaina ai tu’utu’uga ma le Maliega fa’aKonekarate sa faia. O se fa’atinoga tau-fa’asese lea sa fa’atinoina, ma e mautinoa lava, o se solitulafono matuia. 

 

 

• SOLIA O LE TULAFONO O 

LAFOGA TOTOGI 2012

Tupe-totogi Fa’aauau: E uiga i le Tau o le Konekarate sa tu’uina atu i le Kamupani e aunoa ma le to’esea o Lafoga Taofiofi, ua solia ai le vaega e 95 o le Tulafono o Lafoga Totogi 2012. O Ponese Fa’aleTausaga sa totogi atu i le ‘aufaigaluega, ua solia ai fo’i le Tulafono o Lafoga Totogi, e ala i le le-‘ave’esea o lafoga-totogi mai le aofa’iga atoa o tupe o ponesi. 

 

 

• FA’ATINOGA MASALOMIA I 

LE FA’ATAUINA O ASETA MAI LE 

KAMUPANI FA’AOGATOTONU 

Sa fa’apopoleina le Pule ma Su’etusi Sili ona o tupe-totogi sa totogiina atu e le Fa’alapotopotoga o ‘Ele’ele a Samoa (SLC) i le kamupani(ali’i) fa’aOgatotonu, sa totogiina i Tupe Niu Sila (NN$) ma Tupe Amerika (US$) e aofia ai le fia miliona tala a’o lea Kamupani o se Kamupani o lo’o resitalaina i Samoa nei. O risiti uma ma fa’amaumauga o tupe mai teuga-tupe a le kamupani lea i faletupe i Niu Sila. O lea faiga o le totogiina atu o tupe, ua maua, e le o le faiga aupito lelei lea ma sa’o talu ai, e leai se lafoga VAGST sa totogia i le malo. O le kamupani fo’i lea na fa’atauina mai le Loli Vili Vai taugata mo le Fa’alapotopotoga, lea na taunu’u mai i Samoa nei, i se tulaga le-manuia tele. 

 

 

• OFISA TUTOTONU O LE FA’ALAPOTOPOTOGA O ELE’ELE TUMAOTI O SAMOA

 

O le aofaiga na mo’omia mo le fa’atupeina o le Ofisa Tutotonu (fou) a le Fa’alapotopotoga o Ele’ele Tumaoti o Samoa e  $2,419,977.12 ae ma’ea ane ua $$5,219,977.12, e $$2,800,000.00 na fa’amaonia e le Kapeneta ma e le’i tu’uina fo’i i totonu o le kapeneta mo lona fa’amaoniaga e pei ona masani ai faiga fa’avae.

 

E tusa ai ma su’esu’ega a le Komiti Fa’apalemene o lo’o maua le tele o vaega e le’o mafai ona manino lelei mai e pei o fa’amatalaga i se sainigalima i le totogiina atu ai lea o se tupe e tusa lona aofa’i ma le $120,670 lea na fa’amatu’u atu i se kamupani lea e fa’apea o lea kamupani e onaina e se le to’alua o le afafine o le minisita. E o’o i se tasi o tupe na tu’uina atu mo le fa’aleleia ma le fa’agatusa o se tasi o vaega ele’ele a le faalapotopotoga e tusa ma le $62,500.00.

Na fa’ailoa mai e le komiti e fa’apea, o nei galuega na fa’atupeina e le’o tula’i ma i se tulaga lelei lona fa’atinoina, lea fo’i e lavea ai ma le lifi lea e le’i i ai se taimi na fa’aaogaina ai ae leaga, ae e pei ona silafia ai e ma’ea ane le toe fa’alelei o le lifi ua totogi e le SLC le tau aofa’i e $490,000 mai lona tau sa tatau ona i ai e $180,000.00, o lona uiga ua fa’aoppopo ai le tau sa’o le $310.000.00

 

I lenei lava taimi, e ao lava  ona manatua, e le o se taimi muamua lenei ua laga ai nei fa’aletonu. Ia tautuana, na o nisi ia o le anoano o fa’aletonu na laga mai le ripoti a suetusi, o fa’atinoga i totonu o Matagaluega o le malo.

E manino mai ai, e tele lava se galuega e ao ona fa’atinoina.

MK
By Mata'afa Keni Lesa, 24 March 2016

Related Stories


Bg pattern top

Sign in for free to read more stories

Bg pattern light

UPGRADE TO PREMIUM

Subscribe to Samoa Observer Online

Enjoy access to over a thousand articles per month, on any device as well as feature-length investgative articles.

Ready to signup?