Tala tu’u - Samoa ne’i Galo Talatu’u ma Tala o le Vavau a Samoa

14 March 2016

E pei o se lamepa lotolotoi i le pogisa, ma o le a le-mate le susulu o lona malamalama e ofaga iai mafaufauga o tupulaga au i luma o Samoa

 

O nisi nei o Tala ua ‘oto mai le Tusi, Samoa Ne’i Galo (Volume 1) sa tu’ufa’atasia ma fa’amaumauina e le Matagaluega mo Tupulaga, Ta’aloga ma Aganu’u, ua ‘auina atu e lau Nusipepa, le Samoa Observer aua tupulaga ma le mamalu o le atunu’u e pei ona fa’ananau iai. O nei tala, o le a ‘auina atu i Aso Lulu o vaiaso ta’itasi. 

 

O le Vaosa o le Tuifiti

 

Upu Tomua:

E tele itu o Samoa o ta’ua ai le Tuifiti i Tala o le Vavau, o le Fe’e i le Vaimauga i Upolu, faapena foi le tala ia Vaea na foua e le fanau a le Tuifiti ae na sao ona togiola ia Apaula lo latou tuafafine. O le tala ia Nono na faapogai ai le motu o Manono, o atalii foi o le Tuifiti, o le nu’u o Iva, o Samauga fo’i, ae i ai fo’i ni nu’u o le itu i Saute o le motu, pei o Salega. 

Ua faapitoa le Tala o le a auiliili nei i le vao ua ta’ua o le Vaosa o le Tuifiti. Ae ao fo’i ona iloa pe aisea ua sa ai le vao mo le Tuifiti, ao ia o le tagata poo le aitu ese, e le tupuga mai i Samoa. 

O Matautu, o le vaega lea o le lio o le Gaga’emauga i le Itu o Tane i le itu i matu o Savaii, o loo i ai le Vaosa o le Tuifiti.  E afua le upu Vaosa o le Tuifiti i se Talatuu po o le Faavae o le itumalo ua taua o Matautu. O le taofi, na uluai nofoia lea itu o le motu o Savaii e le aumalaga na folau mai Fiti ma ‘ainaina ai ni vaega o Savaii – Matautu, Sataua atoa ma le itu ua taua o Salega. O le manatu la, o le pogai lea o le asia mai e le Tuifiti i ia ona po o tagata na folau mai lona atunuu, ona o le fia mautinoa o se tulaga o soifua ai i latou pei ona muai faamatalaina. 

E taatia isi vaega na uluai to’ai i ai le aumalaga ua ta’ua, ae tuliloa pea le vaega o loo fitoi tonu i ai le ‘autu o le Mataupu. O i ia se vaega o lea itumalo o Matautu, ua taua o Tutaga, o lona pogai, sa tuta i ai Va’aloa o ilamutu o Tuifiti i po o le Vavau. Ua fai fo’i ma sapiga o lea itu ma latou tau faaumi ai:

 

Tutaga o Vaaloa

O loo iai pine faamau e o’o mai i aso nei:

a) Le Vaosa o le Tuifiti

e) O le nofoaga tonu o Tuifiti

i) Tutaga o Vaaloa

o) Le igoa o Matautu 

Liliu ane loa i le Tala e usi i ai le faitau. 

 

O le Tala:

“Molia o se Taulaga o’o i le Vaosa o le Tuifiti”

O se taulagiga laulalo pe teuloto lea e le soona faaleoa aua e seiloga o mea ua alia’i mai ma popoe ai loto o tagata o Matautu. O le a muliai ona liliu ane lea o se taofi o le Tusitala i le matua o le Tala nei. Ua anamua lava lenei talatuu ma ua faaupu faapea, o le Tala o le Vavau. Ua maitauina, e le maua se faamatalaga maoti o lenei vaega o le motu o Savaii i le Talafaasolopito o Samoa, pe o anafea ni senituri na nofoia ai nei laueleele. O le siligia lea o le aumatutua o le itumalo e ala i suesuega, a ua le maua se taimi e tusa ma tala tuutuutaliga mai anamua, peitai, ua tonu lava le mau, na mafua ona o le folauga mai Fiti. O le uso e toalua, o Utu ma Taua tama, ma le tuafafine o Lega, o le aumalaga maemae lea na saili nuufou mo ni nofoaga lelei o le latou nonofo mau ai. O le mau faaalia lenei a nisi o le mamalu o Matautu. 

Na a’e le folauga i le nu’u o Fagamalo i le tolotolo i le gataifale, ona mapu lea i ona laufanua. O le filifiliga a le aumalaga, o Utu o le a nofo i lea vaega o le motu ae faaauau le malaga e Taua ma le teine o Lega, agai i sisifo. 

Na taunuu i le pito lava i sisifo, ona nofo lea o Taua a ua malaga Lega agai i le itu i Saute o le motu ma ua nofo ai. Ua le gata ina faamautu le tagata ia i lona nofoaga, a ua faapea fo’i ona fai o latou aiga seia o’o ina uluola ma toatele i le au mai i augatupulaga. O le foafoaga lea o nei itu tetele o Savaii po nu’u fo’i e faamanatu ai le aufolau mai Fiti. 

 

Matautu – na tupuga mai ia Utu 

Sataua – na tupuga mai ia Taua 

Salega – na maua mai ona o le teine o Lega 

 

E matua moni ma le faamaoni lea taofi e tusa ma lenei talatuu, ua avea ma Tala o le Vavau. Taoto ia la ni auma e le fati, ae faataalolo upu faavae o Taua ma le tama’ita’i o Lega aua ua talatofi le atunuu o Samoa. O le a sagai tonu upu o le Tala ia Utu o loo i ai nei le Vaosa o le Tuifiti. 

 

“Faapefea ona maua lea igoa 

ua ta’ua, Vaosa o le Tuifiti”

Ua toatele tagata aua ua feusuai e na tupuga mai ia Utu ma tama’ita’i Samoa i po anamua, ma ua vaevae nofoaga e tala i ai tagata o le nu’u. o Fagamalo na avea ma o latou nofoaga autu, e faamaonia lea taofi e pei ona i ai i ona po nei. Mavae atu ia tupulaga ae fotua’i mai isi augatupulaga, o le mea ua tuali mai, o le totoa ma le malolosi o tagata. Na sii taua nisi o le motu ia Utu aua ua iloa, o tagata ese a ua tualugaona talaave. I le, ua faapea ona o’o i Fiti tala e uiga i le ta’uta’ua o Utu, Taua ma Lega. E le taumate ua avea ia tala lelea mamao i le vasa, faagaeetia ai le Tuifiti ii a ona po, ma o le ala lea o le asiasi mai o le alii i Samoa e sailii ona tagata nu’u e fia feiloa’i i ai. 

O le malaga mai o le Tuifiti i Samoa na folau faatasi mai ma ilamutu poo sauali’i na faaauvaaina lona Vaaloa. Sa a’e tonu fo’i i le tutaga o Vaaloa peiona muai faamatalaina. O le feiloai atu o Tuifiti i ona tagata, o le maa faamanatu lea o Utu, e mai Fiti o ia. E matua sao’o ma malu le vaomatua i gauta tonu o le nu’u o Fagamalo. Le ogavao lea ua faasaina loa e mapu i ai le Tuifiti ma ona ilamutu e fono ai ma fai ai filifiliga. Ia, o le ituaso lea e afua mai ai ona ta’u lea vao “O le Vaosa o le Tuifiti”

ADVERTISEMENT

Ua amata ai fo’i ona matua tapu ia Utu ma ona tagata le vao, e le taina se laau, e le faia ai se faatoaga ao le mea e faasili, e sa ona pisao ai se tasi. Ua sa le vao, e afio ai Tuifiti ma ua uta i ai le nu’u o Utu (Matautu) e o’o mai i nei ona aso. E le gata la i lea, ua i ai i lea vao le nofoaga faapitoa ua ta’ua, o le paepae mo le Tuifiti. 

Ua maua’a le so’otaga, mavae augatupulaga a ua sa pea le vao mo Tuifiti. Ae i nisi itu tausaga, e mautinoa e Matautu, ua nofoia le vao e le alii e ui ina le vaaia e mata lona tino. Muamua, e mamalu ma pa’ia, e le aleale i ai se tasi. Tele faalavelave sa tutupu i nisi tagata ona pei e foliga e le talitonu ma agaaga i le Vaosa, ma sa afaina ai i latou toetoe a iu le ola. Sa iloga faailoga ma faaaliga i Matautu pe a o’o ina mau ai le Tuifiti i lona vao. I le o le a apo le mafuaaga o le auga o le Tala “Molia o se taulaga o’o i le Vaosa”.

E o’o mai lava i nei ona po e iai se aiga poo ni aiga fo’i e latou te pale feagai ma le vaaiga o le Vaosa. Afai ua maua se tasi i se ma’i, ua siliga fofo ma ua masalomia, o lea gasegase atonu ua afaina ona o le Vaosa. Ona tapena lea o se faatamalii (sua) e fia faamaulalo ai i le Tuifiti ina ia ola le ma’i. O le a le faia se loto le talitonu ae sauna lava ma le mautinoa, o le a manuia le ua gasegase. Aisea ua faia ai lea aganuu?

E le fuatasi i lenei tala le talitonuga faanuupo o le atunuu o Samoa, ae aofia itu uma o le atunuu ii a tu pe a o’o i o’oo’oga tiga o le soifuaga. Pe o le ifo ea lea i tupua? Ona ave lea o lea sua faatamalii i le paepae sa o le Tuifiti, e fai ma taulaga o le lavea’i o le soifua. O lea le gagana o le a musuva ai e le gata o i latou e faatinoina ao le silasila faanono manu a tamalii ma failauga ma le mataitu a Matautu. 

 

“Molia o se taulaga o’o i le Vaosa”

O le taimi e olioli ai le faatamalii poo le taulaga mo le togiola, o le a momoli mua le fetalaiga a se o loo taufeagai ma le Vaosa. E moega ma maniti itno peiseai ua taasaualiia le vao, e ui ina le vaai ale Tuifiti i le tino tagata, a ua le o se mea taumatea atonu o i ai le alii i lona uiga saualii.

Ua maona lea ituaso, e leai se leo e lagona poo se tali, ae talu ai ua o’o le taulaga momoli, ona tapena lea o upu faamaulalo, upu faamalulu ina ia talia le ifoga e ala i le taulaga. Afai lava o le malolo ma manuia. Ao le faatamalii, o le a fo’i loa i le tupua poo le nu’u o Fagamalo latou te lufilufi i ai ma talosia ia tafa le finagalo o Tuifiti. “Molia o se taulaga o’o i le Vaosa o le Tuifiti”

 

Manatu Faaopoopo:

1. O le sailiiliga, o se ulua’i tusitusiga lenei e avea ai le Vaosa o Tuifiti ma mataupu ‘Autu ua faalia ai e le gata o finagalo o nisi o le mamalu o tama o le itumalo ma le igoa o Matautu, a ua mafai ai foi ona ‘apo’apo i ai ma manatu e tusa ma le soifuaga lautele o le siosiomaga o Matautu. 

Mamalu o le Malo o Samoa, Malietoa Tanumafili II faapea le Susuga ia Tooa Salamasina. Sa asiasi atu Ratu George Cakobau e maimoa i le nofoaga ua faapitoa mo le Tuifiti, afua mai po o Utu e oo i nei ona po. Na faaee ia “Ratu Sir George Cakobau” le suafa “Peestalesili” e Matautu, i le Malaefono o Falefagamalo”.

6. O le taliga malo e pei ona ta’ua i luga, o se tasi lea o taimi na iloa ai e Matautu o loo faatasi ma i latou le alii o Tuifiti. O le saoga o le laulautasi aua le malo mamalu, na iloa ai, e i ai lava le laulautasi na sili ai na i lo le faitauga aotele a Matautu. Fai mai le taofi o le ‘aumatutua, o le sao lena o le alii o Tuifiti e faaleleia atili ai le talia aloaia e ala i fa’aaloaloga mamalu na faalia i lea aso maualuga. 

7. Ua le o ni vi’ivi’iga faaopoopo faaalia, a ua fausia mai i Talatu’u ma uputu’u faavae o le itumalo. Matautu i le Gaga’emauga. 

 

Uiga o Upu: 

(Ua faauigaina faatatau i le 

faaaogaina i le Tala)

‘auga – autu, faapogai, faatumutumu, ‘auau 

Aumai – fai mai, gasologa mao o tupulaga, au i luma 

‘ale’ale – ulaula, agaga, tofotofo, tete’e, faafia toa 

‘apo – faaali, tusa’o, faatatau tonu

Ilamutu – o aitu, sauali’i e leoleo i tupu po o alii 

O’oo’oga – mutaaga o se mea, taunuuga, gataaga

Olioli ai – sauniuni, tapenapena, nofo sauni 

Tapa’au i ai – tapa se fesoasoani, fato’ai i ai 

Tapu – sa, faasaina, tuutuuga tausi i ai 

Tualuga – lauiloa, ta’uta’ua, lausilafia 

Vaaloa – vaa o sauali’i po o aitu 

Ae faataalolo upu faavae – o le a le apoina uputu’u 

 

Upu faauigalua:

“Molia se taulaga o’o i le Vaosa o le Tuifiti”

a) o se agaga faamalulu ina ia finagalo malie ma talia se aioiga

e) o le faatinoga o le faaaloalo, ae le na o upu 

i) o se faamoemoe i luma mo se mea lelei

 

Faamatalaina:

Aloaina Totive Ilaoa Aita, Seuamuli Mikaele ma Lealaiauloto atoa ma nisi o le mamalu o Fagamalo i Matautu

14 March 2016

Related Stories


Bg pattern top

Sign in for free to read more stories

Bg pattern light

UPGRADE TO PREMIUM

Subscribe to Samoa Observer Online

Enjoy access to over a thousand articles per month, on any device as well as feature-length investgative articles.

Ready to signup?