PEPA MAI LE KAPENETA

10 April 2016

1. Fausia o fale afi alu i le suavai e tolu

Ua faamaonia e le Kapeneta le tuuina atu o le konekarate i le kamupani a le Pernix Group/MAP JV mo le fausia o fale afi alu i le suavai e tolu i Faleaseela, Fausaga-Tafitoala ma Faleata.

Na faasalalauina tauofoga mo le faia o nei galuega mo le silafia lautele, ma e fitu kamupani na tuuina ane tusi tauofo.

Na iloiloina tauofoga uma e le Soa Komiti e fua i aiaiga o le tauofoga ma tuuina mai ai loa le fautuaga mo le faia o le faaiuga a le Kapeneta.

2. Aoaoga faatatau i le laau o le umala

Ua faamaonia e le Kapeneta le auai atu o le sui o Samoa i le aoaoga mo le faailoaina o iniseti ma faamai faalafua o le laau o le umala lea e faia i Papua Niu Kini i le 18 – 22 o Aperila 2016.

O le faamoemoe ia lava le tomai o sui auai faatatau i iniseti ogaoga ma faamai e aafia ai lenei laau mo le fofoga taumafa o tagata, ma e mafai ona taliu mai ma faaauau aoaoga ma suesuega i totonu o latou lava atunuu.

O le auai atu o le sui o Samoa o se valaaulia mai le Faalapotopotoga Faafailautusi a le Pasefika mo sui taito’atasi mai atunuu uma o le Pasefika aemaise i atunuu o lo o aofia i le faiga o le Poloketi o le IPM/ICM.

O le umala o le isi laau o lo o ave i ai le faamuamua a lo tatou Malo ona e maua pea le taumafa i taimi uma aemaise i taimi o afa ma matagi malolosi, e le gata i lea ua maua i suesuega, e tasi lea laau e maualuga le tamaoaiga mo le soifua maloloina o tagata.

O se avanoa foi lenei e talanoa ai ma fesootai ma faalapotopotoga mai fafo o le a auai i le aoaoga e mafai ona maua mai ai fesoasoani tau seleni mo Samoa e faaauau ai lenei atinae.

O le Susuga Aleni Uelese o lo o galue i le poloketi lenei i totonu o Samoa lea o le a auai atu i le aoaoga.

3. Polokalame mo le siitai o tomai a le Faletupe o le Lalolagi

Ua faamaonia e le Kapeneta le auai atu o le sui o Samoa i le Polokalame mo le siitia ai o le tomai e mata’ituina ma puleaina o aitalafu – Faletupe o le Lalolagi o lo o faagasolo nei i Amerika mai le aso 28 Mati – 28 o Iuni 2016.

O le polokalame fesoasoani lenei a le Faletupe o le Lalolagi e patino tonu i vaega o le mata’ituina ma le pulea o aitalafu mo atunuu tau atia’e.

E usuia i tausaga uma lenei polokalame, ma o se avanoa taua lenei e fefaasoaa’i ai le iloa o le aufaigaluega a le Faletupe o le Lalolagi ma sui auai i le polokalame.

O le Ofisa Sinia o le Matagaluega o Tupe, Susuga Peresitene Kirifi o lo o fai ma sui o Samoa i lea fono.

4. Anavatau a le Vaega Faaupufai e Puipuia Aia Tatau a Tagata 2016 - 2021

ADVERTISEMENT

Ua folasia mo le silafia e le Kapeneta le Anavatau a le Vaega Faaupufai e Puipuia Aia Tatau a Tagata (HRPP) 2016 – 2021.

O lenei anavatau o lo o faailoa manino ai le polokalame o galuega fuafua a le Vaega Faaupufai i le lima tausaga o lumanai.

Ua savali nei i le 34 tausaga o tulai mai pea le Vaega lenei i le taitaiga o le Malo talu mai le 1982, lea foi ua toe manumalo i le paeaiga lenei.

O le manulauti o le anavatau, o le siitia lea o le soifua manuia o o tatou tagata i se siosiomaga filemu, maopoopoga ma le galulue soosoo tauau o ona tagata, faapea ma le faatupulaia o avanoa faigaluega mo le au talavou ua i’u mai aoga maualuluga.

O le talitonuga o le Vaega Faaupufai, a manuia le faationga o lenei Anavatau, o le a siitia atili le soifua manuia o tagatanuu uma o Samoa.

O nisi o luitau sa feagai ai i le lima tausaga ua tuanai e aofia ai le faaletonu o le tamaoaiga o le lalolagi ma le tulaga vaivai na oo i ai le tamaoaiga o Saina sa matua aafia ai le tulaga lautele o maketi i atunuu i fafo ma faapea foi ma le Yazaki Samoa. O le isi luitau o le afatia lea o Samoa i le afa o Evan ii le 2012 lea na tele mea na faaleagaina ai e pei o alatele, ala laupapa, vaega o faatoaga, atinae lagolago e pei o faletalimalo ma meatotino a tagata taitoatasi.

O nisi o matati’a na ausia i le lima tausaga talu ai e aofia ai:

• Siitia o le tulaga o Samoa e avea o se atunuu malosi;

• Fono a Malo Aufaatasi mo Atunuu Laiti  le lalolagi;

• Taaloga Tupulaga o le Taupulega;

• Taaloga a le All Blacks ma le Manu Samoa;

• Faalautele polokalame tau apu i Ausetalia;

• Faatauina o le PFL;

• Feagaigai o le Suiga o le Tau;

 O isi taunuuga iloga na ausia e vaega lautetele o le tamaoaiga aofia ai aoaoga, soifua maloloina, faatoaga, atinae o nuu i tua, penisione tagata matutua, vaega o faamasinoga faapea ma atinae autu tetele e i ai suavai ma vai lafoai, malosiaga faaeletise, felauaiga, fesootaiga.

O atinae o lo o ave i ai le faamuamua a le anavatau mo le isi lima tausaga e aofia ai le faatupulaia o avanoa faigaluega, atinae o aoga, faaleleia atili auaunaga faasoifua maloloina, faateleina o atinae o faatoaga, atinae o tagata maimoa mai fafo, atinae o tupulaga talavou, atinae o nuu ma afioaga, mataupu tau suiga o le tau, tulaga tau faamasinoga, faapea ma auaunaga ma atinae tetele.

5. Asiasiga faaleaoaoga mo Minisita o Faigafaiva o le Pasefika

Ua faamaonia e le Kapeneta le auai atu o le Afioga i le Minisita o Faatoaga Vaomatua ma Faigafaiva, Afioga Laaulialemalietoa Polataivao Leuatea Schmidt mo le Asiasiga Faaleaoaoga mo Minisita o Faigafaiva o le Pasefika e faia i Niu Sila i le aso 9 – 21 Aperila 2016.

O le asiasiga faaleaoaoga e faailoa ai i Minisita o le Pasefika auala o lo o faatino ai e le Malo o Niu Sila le puleaina o faigafaiva e faatatau lea i le mata’ituina o i’a maua. E le gata i lea ae faasoa mai ai foi a latou galuega o fai mo le silafia e le Pasefika.

O le Ofisa Sili Lagolago o le Matagaluega o Faatoaga, Susuga ia Joyce Samuelu Ah Leong o le a malaga faatasi ma le Afioga i le Minisita i lenei asiasiga.

10 April 2016

Related Stories


Bg pattern top

Sign in for free to read more stories

Bg pattern light

UPGRADE TO PREMIUM

Subscribe to Samoa Observer Online

Enjoy access to over a thousand articles per month, on any device as well as feature-length investgative articles.

Ready to signup?