Tutusa lava le tulaga o a’oga i nu’u i tua ma Apia

SS
By Sarafina Sanerivi, 04 September 2016

O Fa’atali Ma’ave’ave, o se tinā 35 tausaga o tama’itai e to’asefulu mai le afio’aga o Falevao. 

Na ia fa’ailoa i le Fofoga o Samoa lona fiafia tele i le atina’e tau a’oa’oga i  nu’u i tua. 

Fai mai lana tala, “Ou te talitonu ua tutusa le tulaga tau a’oa’oga i nu’u i tua ma Apia.

“Ou te iloa aua ou te alu lava e momoli la’u fanau ile aoga, ma momoli le latou meaai ile malologa I aso uma.

“Aua o lea lava ou te va’ai o lo’o lelei lava le fa’atinoina o galuega a ali’i ma tama’ita’i faiaoga ma o mea fo’i lava o lo’o aoaoina ai fanau i tua nei o lo’o a’oa’oina ai fo’i fanau i Apia. 

“O lo’o iai si a’u tama lea ole a i’u mai le Tulaga Lua, ma o lea o le a o’o atu i le Kolisi. 

“Ia o lea ua i ai le Kolisi a la matou Itumalo o lo’o i Saoluafata, ma o lo’o i ai le fa’amoemoe e ave ai ‘i’ina la’u tama teine e aoga ai. 

“Ia te au a ia, ua tutusa lava Apia ma tua nei I mea tau aoaoga. Ma e a lava ona leaga le tamaititi ia ole lē fa’alogo ma to’aga lava aemaise foi pe a faatamala matua ile latou pitola’au o le lagolago I fanau.”

Na ia fa’afetaia fuafuaga a le malo ina ia faia Kolisi uma mo Itumalo auā fanau I nu’u i tua. 

“Ae measili fa’afetai o lea ua fa’akolisi le tele o itumalo ina ia fa’aitiitia ai le gasolo o fanau I Apia pe a mae’a Tulaga lua. 

ADVERTISEMENT

“Ma ou te fiafia tele i lea tulaga auā e sili lava le faasaga ole tagata  i lana tama ma tilotilo atu iai i taimi uma, nai lo le mea lea ole tu’u atu e alu e nofo i Apia ae ta’aina ai i isi tamaiti ma oo ai i nisi tulaga. 

“Auā ua o’u faalogo atu foi i TV ma leitio i le mau fa’alavelave o tutupu mai i fanau aoga i nofoaga faitele.

O fusu’aga i le va o aoga o se fa’afitauli fou, ole fa’aaliga lea a Fa’atali. 

“Sa leai lava ni vevesi fa’apea sa tutupu i va o aoga i la aso. 

“Ae pei o le tele ole suiga ole olaga ua i ai nei. 

“O le telefoni lava le isi mea ua ‘a’afia ai mafaufau o fanau. 

“E aoga telefoni e fa’afaigofie ai ona feso’ota’i, peita’i, ua fa’aaoga sese e le tele o fanau ma ua mafua ai ona tula’i mai ia vevesi.”

Ae ui i lea, ua ia fa’ailoa mai ole nofo ma alala ai i nu’u i tua e manaia tele. 

“E sili lava Samoa fa’atusatusa i isi atunu’u ole lalolagi. 

“Ia e mo’i a i fafo i mea tau tupe, ae o Samoa ia, o lo’o iai lava fa’atoaga o lo’o mafai ona fesoasoani ile atina’e o aiga. 

“E tele foi laueleele ma fanua i tua nei e mafai ona galulue ai tagata aua manuia o aiga. 

“Aua o Apia ia, oute leiloa pe o fai ai galuega o lo’o fai i tua nei. 

E sili lava le olaga i nu’u i tua.”

SS
By Sarafina Sanerivi, 04 September 2016

Related Stories


Bg pattern top

Sign in for free to read more stories

Bg pattern light

UPGRADE TO PREMIUM

Subscribe to Samoa Observer Online

Enjoy access to over a thousand articles per month, on any device as well as feature-length investgative articles.

Ready to signup?