“O le alofa faamagalo o le Atua”

01 May 2016, 12:00AM

Maifea ona fefaaleleia’i? E tupu maifea sootaga vavalalata? E afua i se a mafutaga mafanafana? Ae faapefea ona e faamatalaina le telē o le alofa o le Atua ia te oe ma a’u? Ua iai le to’a e lepa iai leaga o o tatou olaga, o le alofa faamagalo lea o lo tatou Atua.

O le valaauina o le perofeta o Mika, ia ta’u atu i tagata uma ma le aai o Ierusalema le faamassinoga a le Atua i lona nuu. Ua sauaina e le tagata malosi le lima vaivai.

Ua soona pule malosi le au maumea i mea totino ma le ola o nai tagata matitiva. Ua le aveasea foi lava ona nofoaga maualuluga ua tapuai ma faitaulaga ai le nuu i atua ese ua leai se ola o iai. Ua tupu pea le olaga faamaualuluga ma le faasausili.

O le olaga le popoi ma faaiuga amioletonu; o pulega sauā ma faiga le alofa i tagata le taualoa ma e matitiva. Ua faaaoga tagata vaivai e su’e ai mea a le au malolosi. Ua faaaoga foi le ola ole mativa e mailei ai manaoga leaga o le tagata e maua mea.

I le, o le faamasinoga a le Atua, o tagata uma. O tagatanuu i lo latou ifo i tupua, ma taitai o le nuu ma le lotu i faaiuga piopio. E tua le faamasinoga i le faasalaina. O le taui o galuega ma mea leaga ua fai. Peitai, ua valoia foi i le feau a le perofeta nei le folafolaga o le toe faatuina poo le toe fausia i se olaga toefuataina. O lona uiga, o iai lava se faamoemoe taua ua tapena e le Atua mo sou taeao fou.

E iai le faamoemoe mautinoa.

O le faamoemoe lava lea i le ola. O la Tavita, e alofa fua mai ma alofa mutimutivale le Atua. O le alofa e onosai ma faapalepale i o tatou uiga ma a tatou amioga.

O le natura sili lea ona ofoofogia o lo tatou Atua, o lona alofa.  Ua faatele ona talatala mai e perofeta le tiga o le Atua i lona nuu.

Ua le masino faiga saua ma le faalealofa, o amioga mataga ma le le tausi mavaega o le nuu i le feagaiga ma le Atua. Ae fai mai Ioane, o le Atua, o le alofa lava ia (I Ioane.4:16). E toasa le Atua, ae silisili lava lona alofa (Sal.103:8).

Fai mai Mika, o ai ea se Atua e tusa ma oe, o lē faamagalo ma faagalo au agasala ma a’u amiogaleaga uma lava? O le malosi o le alofa lea, o loo taavavale ai le onosai ma le faapalepale. I le, o le Tofa faapalepale a le Atua, ua tupu ai le finagalo faamagalo ma saunia ai se isi faamoemoe fou mo lona nuu.

E le tumau pea i sona toasa. Auā e fiafia o ia i le alofa. O lona lea uiga paia mai le vavau, e le liu e oo lava i le faavavau. Aleluia! 

Se a ea se mea ua le silafia e lo tatou Atua? Poo fea tatou te manatu tatou te sosola iai? A o ai e mafai ona lafi i luma o fofoga o le Atua? Samoa e, poo le a lava lou leaga ma sa’u amioga mataga, ua ta’oto lava le ata ma le fuafuaga paia a le Atua ia te oe ma a’u.

E le tolofia e ni manatu o le lalolagi. E le suia e se poto o se tagata. A o lana lava fuafuaga paia e foa i luga o lona lava alofa tunoa. O lona finagalo faapalepale, ia maua e tagata taitoatasi uma le avanoa, e salamō ai ma toe saili i le mafutaga mafanafana ma Ia e faavavau.

Oka, se Atua ina a fai tama! Se alofa ina a ofoofogia! Le tioa le fatu pese, E ofoofogia le alofa o le Atua mo a’u…. Se onosai ina a tele, ua ia le toe auauina mai ananafi; ua ia faato o tatou olaga tuai, ua le toe manatua lava e ia.

Ua ia lafoaina a tatou agasala uma i mea loloto o le sami, ina ia le toe iloa e faavavau (Iere.50:20). O le alofa e faamaoni. Ua le vaai mo nei, a o taeao ma aso uma lava. Maimau e, maimau pe ana se i e iloa ma lagona i lou loto, o le fatu lea o le foafoaga, o le alofa. 

O le totonugalemu foi lea o le faaolataga, o le alofa. E le o se isi lava mea na afio mai ai le Atua i le lalolagi, a o le alofa; ina ia e ola ma tatou maua le saolotoga (Ioane.3:16). 

O le itu aso e faamagalo ai oe ma a’u e le Atua, e le toe manatua, e faagalo (Iere.31:34).  E faagalo au amioleaga uma ma a’u agasala uma. E le ona o sau galuega lelei poo sau amio ua tauleleia, ae ona o lona lava alofa tunoa. Le alofa e tupu fua mai i le leai o se mea.

Auā o le alofa lava ia (I Ioane.4:16). Le ata lea o loo faailoa manino mai e Iesu i lana faataoto, i le atalii faamaualuga ma le olaga mimita ma le faasausili sa taitaiina sese ai lona talavou (Luk.15:11-32). E le i tuulafoa’ia e le tamā i le ao ma le po i le tatalo.

‘A ina ua foi mai i le aiga moni, na galo i le tamā ananafi. E le i toe auaua le olaga tuai. A ua momo’e ma le fiafia e faafetaui, fusi mau, ma sogi fiafia i le atalii na oti, a ua ola! Maifea? Ua ola i le loto faamagalo.

Ua tali leleia e le alofa faamagalo. Ua toe faalelei masei. Ua auli le manumi. Ua faalamolemole le fole. Ua timata mafutaga. Ua maua maopopoga, auā ua iai saolotoga. Ua mălie le ola, ona e maualuga le alofa.

A o oe, e aumā le ola, pe a leai se alofa? E nanea ni ou lelei, pe a na o se alofa e fai ma mailei?

Samoa pele e, o le manogi lena o loo teu faasoloatoa ai le malo o le lagi, o le fealofani. Afai o le uiga paia lea o le Atua, o foliga ma le ola foi lea o aso uma o tā’ua. E te mafaia? I a tatou faaiuga faavavevave, e le faigata.

Auā e lolotu tele o tatou tagata. Ae a talanoa i le mafai, o le gutu e gata mai ai. Auā o le loto, e leai.  Ona sa’o ai loa lea le isi tagata faafiafia o Samoa, “..oga o lou loko iga a maaa e pei o se uamea ua uma oga uela.”

Ae e te silafia Samoa, pau lea o le manumalo e viia. O lalo.O le loto maulalo, ma le agaga faamagalo. Manatua foi tuliga a le uluai tupu o Isaraelu ma Tavita, na faalua ona faasao e Tavita le ola o Saulo.

A o le faamoemoe o le tupu, ia matuā fasiotia Tavita. O le faalua ona laveai e Tavita o le soifua o le tupu, na valaau ai Saulo ia Tavita, “Ia manuia oe lo’u atalii e Tavita, e te faia e oe mea e sili, ma e manumalo pea lava.” (I Sam.26:25).

Ioe, e le o le poto o Tavita e ta le kitara po le violini, poo le ā na vivii ai e Saulo; e leai. A o le alofa faamagalo. Ua le o le mea matautia foi sa faia e Tavita ia Koliata ma Filisitia na vivii ai e le tupu Tavita; e leai.

O le alofa faamagalo. Aisea ua le mafaia ai e matua, ma faiaoga, le malo, ma ekalesia, ona faamuta le faifai pea o le vevesi o fanau aoga? Pe faasalalau i luga o nusipepa ma televise ni faaleleiga, e le mafai.

E le o lena le fofō. Pe o mai le army a Niu Sila ma Ausetalia e faalelei, e le mafai. E le mafai e le Aia Tatau ua leaga ai fanau a Samoa ona fai o se leleiga; e le mafai. E le mafai e le tupe poo meaai poo se isi lava mea ona faalelei oe ma le isi uso a tagata.

Vaganā ua talia i lou loto le Agaga faaola o le Atua, ona e saoloto lea mai pulega a le tiapolo (II Kori.3:17). Auā ua le o le fitafita, poo le malosi, poo le poto, e mafai ai ona e manumalo ma maua le saolotoga, a o le Atua lava (Sakaria.4:16).

‘Aua e te maitau leaga! ‘Aua foi ne’i feauina le alofa. A ia tupu a’e i le loto le alofa ua faamaoni, ona faatele lea ona tauia i le lelei, ma ‘e manumalo pea lava (Mat.18:21,22; I Sam.26:25). 

E le i faatoina e le Atua lona nuu. E le i vaoia e le amioleaga a Isaraelu le alofa faamătua alofa moni o le Atua. Ua le liliuina foi le feagaiga ma Aperaamo, ma Isaako, ma Iakopo. Auā e faamaoni le Atua i lana upu.

O le tautoga mai le vavau, e tumau e faavavau. Auā o le alofa o Ieova, mai le vavau lava lea, e oo i le faavavau… o lana amiotonu foi, e oo i le fanau a lana fanau…. (Sal.103:17-19).

Samoa e, a leai se faamagalo, e au ina tautala mai aso. Toe manatu i foliga ma uiga paia sa faia ai oe i le amataga…. O le fesili e te fealuai pea ma oe, Pe na faia ea oe e le Atua ia foliga ia te Ia, I ni a?  

 Amene

Petaia Setu

E-mail: [email protected]

7737063

01 May 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>