Ia manuia fanau

By Ilia L Likou 18 January 2018, 12:00AM

I le toe amatalia ai o aoga mo lenei tausaga ua avea lea ma tulaga lua faapopoleina ai le se tasi o tina.

O Lusia Iosefo mai Manono Uta e toaono lana fanau ma o loo aumau nei i le afioaga o Manono- Uta. O loo talosagaina e le tinā se Samaria agalelei e fesoasoani  i le itu tau le seleni sei faaa’e ai le fanau ile aoga.

O loo manaomia e lenei tinā se fesoasoani ona e na’o lona toalua o loo faigaluega i le taimi nei ae o o totogi e le’o lava lea e faasoa mo lea vaega.

Sa ia faailoa ua utiuti le faasoa.

 “E ala ona faia nonogatupe ona ua leai lava se vaega e ono maua mai ai  se seleni maua. “O a’u e le faigaluega ae ua na’o lo’u toalua o loo faigaluega i le taimi nei.”O le tele o taimi e maua ai lona totogi e tele na ave ese ai le tele o nonogatupe ma o le taimi e uma ai ona aveesea uma nei nonogatupe ua le o’o i se $100”, o lana saunoaga lea.

I le taugata ai le soifuaga i Samoa ua iai  lenei vaitau sa taua ai e Lusia le tulaga pagatia o loo iai nei i le taumafai lea tausi si ana fanau e toafa.

Sa faailoa foi e ia i le Fofoga o Samoa e fa lelei lava tausaga o leai se suavai faatasi ai ma le eletise i lo latou aiga.

Ua uma foi ona ave le talosaga i le Koluse Mumu mo se fesoasoani ae o’o mai lava i le taimi nei e lei maua atu lava se tali ile latou talosaga.

O le ulumatua e 10 tausaga le matua. O si au fanau e tele na agai atu i o matou tuaoi e utuvai ai.

“O le matuai manaomia lava o le suavai ina ia taofia ai le fanau e agai atu o le fanau i o matou tuaoi e utuvai aua e le mafai ona ou faia ona o loo iai si au pepe faatoa fitu masina le matua.

E tele lava faanaunauga o le tinā e le’o mafai ona tino mai ae o tasi lava le vaega o loo faananau ai ia manuia olaga o si ana fanau.

By Ilia L Likou 18 January 2018, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>