O LA’U TALA FO’I

30 April 2016

1. Ua matauina foi i Tala Fou le osofa’ia o se tasi alii faipisinisi mai Saina-fasi ma saisai a ua matua manu’a tigaina.

Fai mai tala fou-o i la’ua na faia lea osofaiga i le tuneva o le po-fai mai o se tasi o alii na faia lea osofaiga o le pagota lea ua lauiloa i le sola so’o i tua-o Lauitiiti Tualima-lea fai mai na sola i tua mai le Falepuipui i Tafa’igata i le Aso Sa talu ai!

O le tala fiafia la o lea osofaiga –fai mai-o loo ola si alii Saina faipisinisi lea na osofa’ia. Ae a  tatou tilotilo la i le tulaga faafitauli o lenei pagota-ma le mata’utia o ana faiga o loo fai nei i tagata o le atunuu-o le a la se manatu o le Pule o le Falepuipui?

E mafai ona latou faaolaina tagata pe a afaina i lenei pagota?Ia-o le tala ua maua-o lena ua toe maua lea pagota-ae o le fesili-o afea foi la e toe sau ai i tua-ae tou nofonofo lava? O lea ua outou iloa lelei lava e afaina tagata o le atunuu i lenei pagota-ae matua leai lava sa outou fuafuaga ua faia- e taofi ai?

Afai la ua outou le mafai ona fai le galuega o loo totogi ai outou i tupe o le afu o tagata o le atunuu-e a la pe a aveese loa le tulafono-ae lafo mai i le atunuu lautele na te faia se faiga-e uma ai le sola soo Iifafo o lea pagota-aemaise ai o lona fasi tagata, gaoi ma le talepe fale-aemaise foi o le lamattia ai o tama teine a le atunuu! O le a sou taofi? 

2. Matauina foi i Tala Fou e uiga i le Falema’i - fai mai e fa ni fa’ama’i e le o mautinoa ma e leai ni o latou igoa! O le fesili la-o le a le pogai e faailoa mai ai i le atunuu ia faama’i pe afai e le o mautinoa ma e leai ni igoa?

Afai la tou te le o mautinoa ia faama’I ma o latou igoa-o lona la-“e leai foi ni a outou togafitiga o outou tapena i ai! A fua la i ia ituaiga o Tala Fou-o le a la le manatu o le Matagaluega o le Soifua Maloloina? O se mea e tatau ona faailoa mai ae le o mautinoa e le Falema’i?

ADVERTISEMENT

E aliali mai e na o mea lava e le o mautinoa ia e la’u mai e faapopole ai le atunuu.Aisea e tau ave solo ai ia faama’i i fafo e tau su’e ai-ae o fea la tatou Lab poo le Fale Su’esu’e? Afai o le tulaga lea o loo i ai nei le Falema’i Tele o le Atunuu-o lona uiga-o se matua tulaga mata’utia lava! Aisea?

E lamatia e le tele o faafitauli! E le lava foma’i-o lana auaunaga mo le atunuu lautele-ua matua mala-pagā lava. Lea foi faatoa uma atu le leai o ni vailaau-ae soso’o mai foi ma le faaletonu o taavale  a le Falemai mo gasegae.

O nisi foi taimi-a alu le taavale a le falema’i e aumai se gasegase e pei o le mataupu talu ai nei-e na o le avetaavale lava ma le leoleo po ae leai se foma’i! O le fea la mataupu e manatu le Falema’i e tatau ona ave i ai le faamuamua?

O le maua lava a le ‘au-matutua- a ua le mafai ona fai le tautua I le atunuu-“e sili ona tu’u” ae faaalu aoga tupe a le atunuu- e aumai ai ni foma’I lelei mai fafo-e tausia ma vaaia lelei le soifua maloloina o le atunuu! O le a sou taofi?

3. Matauina foi i Tala Fou fai mai ua lamatia Tuuga Fautasi-o lona uiga- o Tuuga Fautasi ia e masani ona fai i Tuto’atasi uma o Samoa-talu mai le Tuto’atasi muamua i le 1962. E le o iloa la pe ua lamatia le faamoemoe e =sili ona fiafia I ai tagata o le atunuu-ona ua leai ni tupe e fai ai faailoga mo ‘auvaa poo le a lava!

Ae afai e le o se mea tau tupe ua mafua ai-o le fesili la-Afai la o le a tu’u e le toe faia ni tuuga fautasi-o a la mea a faamanatu i le Tutoa’tasi o le atunuu-ina ia iloa ai e tupulaga lalovaoa o le atunuu pe na faapefea ona maua le Malo Tuto’atasi o Samoa?

O mea anoa na-e tatau ona sami ma faamanatu i  Tuto’atasi uma e toe faamanatu ma toe faa-vaai ai le atunuu i le toatele o latou matua pele -na tafetotoi i le sailiga o le Malo Tutoatasi o Samoa!

Aisea ua le mafai ai ona faamanatu ma faafetaia Lauaki lea na faatafea i Saipani-ona o lona finau ina ia tuto’atasi le Malo o Samoa! Aisea ua le mafai ai ona faamanatu Mataafa Iosefo na faatafea e Siamani ona o lona finau mo se Tuto’atasi o Samoa?

Aisea ua le mafai ai ona faamanatu le Mau a Pule lea sa auai Tamasese lea na fana i le fana taavili-i le Aso To’ana’i Pogisa-ma Mataafa Faumuina Mulinuu I ma Tuimalealiifafo?

Aisea ua le mafai ai ona faamanatu Fautua o le Malo o Samoa o Malietoa Tanumafili II ma Tupua Tamasese ma le Sui Tofia o Tuimalealiifano-ona soso’o ai lea ma le faamanatuina o le HRPP lea o le a atoa le 40 tausaga talu ona ia faafoeina le Malo Tuto’atasi o Samoa! O le a sou taofi?

30 April 2016

Related Stories


Bg pattern top

Sign in for free to read more stories

Bg pattern light

UPGRADE TO PREMIUM

Subscribe to Samoa Observer Online

Enjoy access to over a thousand articles per month, on any device as well as feature-length investgative articles.

Ready to signup?