O LE FAAMA’I TELE 1918

FN
By Fuimaono Na’oia Fasavalu Touli F. Tupua, 17 June 2016

O tagata e malaga atu mai Samoa i Niu Sila sa latou faailoa atu i nusipepa i Aukilani ni tala uiga ese. 

Talu ai ona ua avea le faama’i ma vaaiga masani, o lea na faamatala ai e se tagata pasese, e te ulufale atu i se fale a ua tapunipuni faasolo atoa ma e te maua ai ua feoti uma lava tagata o loo i ai. I nisi taimi, o le toatele o tagata, ua leva ona maliliu, ma e te maua i latou o ola, o loo faaapotopoto faatasi i tala ane o tagata ua maliliu, ma taumafai e ave soo se mea latou te maua. I le tele lava o fale e te ulufale i ai, e te maua ai tagata mama’i ua le o toe mafai ona fai i ai se fesoasoani, ma ua tapunipuni uma fale e faatali ai le taunuu atu o le taavale e ave ai e ua maliliu, lea e ui atu i luga o le auala, ma afeafe solo i fale e ave tagata oti.

O le isi tala mata’utia o le vaaia lea o tagata Samoa o taatitia i luga o alatetele; i luga o matafaga ma nofoaga e latalata i vai taele- ia na o i ai e faamalu ai le fiva o latou tino.

“Ua matua faanoanoa lava o matou tagata ma tiga. O le lua o vae tolu o latou alii ma faia’oga o ekalesia ua maliliu ma e faapena foi le toatele o Leoleo o le atunuu. Pe tusa o le lua o vae tolu o e ua maliliu o tane.

Mo Lokeni  ma le ‘olo a fitafita, ua latou matua le mafaia lava ona fai se mea i le faama’i; ua matua mama’i tagata uma o le atunuu i se tulaga faanatinati. O lea faalavelave na fetaia’i ma le lē mautonu ma ua le mafai ai ona tuufaatasi galuega faatino le ‘au-galulue o loo faia le fesoasoani. O lea na tonu ai i se vaega o tama’ita’i papa’e sa ta’ita’i ai Mrs Cotton e tatala se falema’i faaopoopo i totnu o le Maketi Tele i le Ala I luga o le Sami talu ai ona ua tumu le falema’i autu ma o le a maua ai lo latou taimi e o atu ai e fafaga tagata mama’i.

I le amataga sa una’ia e Skerman ia tama’ita’i, ae i le aso na tatala ai, ina ua amata ona taunuu ane tagata mama’i, na ia tapunia faamalosi lea nofoaga e ui ina tete’e i ai ia tama’ita’i. O lea na toe avatu ai tagata mama’i e toe ave i le falema’i autu lea ua tumu saisai. I Tuasivi Savaii, o le foma’i sa na vaaia o William James e le’i asiasi faatasi i se gasegase Samoa, e o’o lava ia i latou sa mafai ona savali i ai.Sa faamalieina lava o ia i le na o le tuuina atu o vailaau i soo se tagata e alu ane. Fai mai le suesuega tusa lava pe asiasi James i nuu i totonu o se faataamilosaga e lima kilomita, ae ui lava ina tele tiga sa feagai ma tagata aemaise ai lava o le tele o soifua ua maumau, ae sa tatau lava ona mafai ona faasaoina i le faagasologa o le faama’i.

O se tasi o mea uiga ese na tupu e aofia ai Lokeni ma le Aoga Nofo Tumau a Papauta lea e i vaega maupu’epu’e o Apia lea e na o le to’atasi lava mai le 120 teine na sao i le Faama’i O le Pule o le Aoga faatasi ai ma se Faatoaga tuufaatasi ma se malae- o le tama’ita’i o Miss Eilzabeth Moore, o se misionare LMS  e luasefulu-lima tausaga sa nofo ai i Samoa nei e faavae aoaoga mo tama’ita’i. Na aafia le A’oga i le faama’i i le Aso Faraile 15 o Novema, ma e o’o ane i le Aso Lua o le vaiaso na soso’o ai, ua mama’i le toatele o teine, faatasi ai ma Miss Hilda, o se faia’oga fesoasoani. Na maua foi Miss Moore i le vevela o le tino, ae sa faaauau pea ona tausia e ia tama’ita’i e to’alua a la teine a’oga, o se tasi o ia teine ua toetoe lava oti.

ADVERTISEMENT

“Sa ma matua finau mo le ola o lea teine,” o le faaaliga mulimuli ane lea a Moore, “sa ma  ala i le po atoa ma ia, ae o’o ane i le taeao o le Aso To’ana’i, ua oti, ma o le taimi lava lea na o’o mai ai le tala e faapea o se tasi o a matou alii sa mama’i i totonu o fale Samoa, na maliu foi i le po i luma atu.”

Sa lē iloa e Miss Moore pe o le a faapefea ona tanu lea to’alua ua maliliu ona o le leai o se tagata o malosi na te eliina se tuugamau. Ua le mafai foi e ia ma Misi Simolo ona iloa pe o le a faapefea ona fafaga le to’atele o e ua mama’i. Fai mai Loketi- ona o se mafuaga e le o iloa-e leai ni mea’ai e maua atu mai le fale kuka mo fesoasoani i Apia mo Papauta. Ina ua faalogo Moore e faapea o le a tufa atu fasi povi fasi i le Maketi Tele, o lea sa na auina atu se talosaga mo ni kilokalama  se sefulu  o fasi povi fasi ina ia mafai ona ia faia se supo mo le 150 o tagata mama’i. Sa matua ita Lokeni ona o lea talosaga. Sa taua mulimuli ane Moore le isi mea na tupu .

Pe tusa o le itula e 10 i le taeao o le Aso Sa, Novema 24-o lona iva a’i lea o aso talu ona aliali mai le faama’i i totonu o la matou a’oga.E tusa ma le valusefulu teine na faata’otolia i le faama’i i totonu o fale e nonofo ai..Sa fealua’i solo Misi Simoli e auauna atu i mea latou te mana’omia, ae o a’u ma isi teine e to’alua, sa i fafo i le poletito e tapena le tanuga o le teine lea na maliu muamua, ae aami mai loa a’u i lalo e se leo leoleoā o le alii e pule ia Samoa, ma vala’au mai lo’u igoa.

E le’i faafeiloa’i mai, ae amata lava lana sauniga-e tusa ai ma le mea o loo o’u  manatua- ma fai mai loa i se leo tele ma le ita. “Miss Moore., ou te talitonu na e talosaga atu i le taeao nei mo se fasi povi fasi. Ou te fia faailoa atu ia te oe e le avatua se fasi povi mo oe.

O lo’u manatu o lenei faalapotopotoga o se faalapotopotoga e aupito i sili ona faalumaina i totonu o Samoa, ma ou te faamoemoe e faailoa atu lea mea moni i lo outou nofoaga autu i Lonetona. E faapefea ona ‘ou auina mai ni mea’ai mo i latou! E sili ia te a’u pe a ‘ou vaai ua susunu uma i latou i le Afi. O loo i ai se solofanua pe i le faitoto’a o la outou lotoa-fai i ai e o ane e ‘ai le solofanua  pe. O meaola ua lapopo’a, puputa , paie ma loufa solo” (ma tusi lona lima i le toatele o tagata mama’i  o loo pulupulu o latou ‘ie ‘afu ma faapupu’u solo i totonu o fale Samoa) “Tutuli  latou nei  i le fanua tanu e ‘ali tuugamau.

O se faalumaluma  i le talitonuga faa-Kerisiano! Ou te fia vaai ia i latou uma nei o mu i le Afi e faavavau ma isi lava upu. Sa ‘ou tali atu ia te ia o tagata ia o tagata mama’i! O mai e o tanu o latou tagata oti!.

Sa ‘ou ta’u atu ia te ia o lea ou te taumafai e saili soo se tagata o malosi e tanuina a matou tagata oti, ae sa fai lava lana fati, “Afai e te le auina mai ia te a’u se luasefulu-lima o nei teine e fesoasoani i le eliina o tuugamau, ou te toe sau i le aoauli nei ma susunu i lalo le a’oga.

O lena fuafuaga ailoga a mafai ona faatino, o la’u faaaliga lea. O le mea moni lava- ia e iloa Colonel,  e le mafai ona latou o atu pe afai o le a e susunuina le a’oga. E leai sa’u mea e mafai i ai.

A’o faatetele lona ita ma lulu lona to’oto’o e faamata’u ai a’u ma le leo tele, “E le o mai? O le a ‘ou tilotilo i lena tulaga, ma o le a ‘ou faia se faiga e o atu ai ma isi lava faaupuga…ona alu ese loa lea ma toe fai mai e toe fo’i mai le aoauli e susunu i lalo le falea’oga.”

FN
By Fuimaono Na’oia Fasavalu Touli F. Tupua, 17 June 2016

Related Stories


Bg pattern top

Sign in for free to read more stories

Bg pattern light

UPGRADE TO PREMIUM

Subscribe to Samoa Observer Online

Enjoy access to over a thousand articles per month, on any device as well as feature-length investgative articles.

Ready to signup?