TALATUU O MANONO

FN
By Fuimaono Na’oia Faasavalu Touli F. Tupua, 17 June 2016

O Manono e ta’oto i totonu o se aloalo o se aau tele o Aana ma e si’omia e le sami malū. O lona vaega i matu-sasa’e e i totonu o le aloalo, o loo i ai se papa e 8-10 mita le maualuga e igoa o “Fatumanava” ma ni nai niu e feagia’i solo i le matagi.

O lona itu i sisifo i le va o Manaono ma Apolima- o loo i ai se motu itiiti o Nuulopa- e tusa ma le 50 mita lona maualuga. O lona itu i Manono e tifatō i lalo, ma talu ai o lenei vaega e i totonu o le aloalo, o lea e faigofie ai ona o’o i ai tagata ma fe’a’ei i le tumutumu- lea o loo ola ai ituaiga eseese o laau ma fue sosolo, e ese mai nai niu o loo ola ai. A e taunuu i le tumutumu, ona e tilotilo lea i se vaega e tifato i lalo.

E te vaaia ai foi le latalata ane o le isi vaega e tifo-to i lalo-lea o loo va ai ma le motu autu mo se mamao e 20 mita-  ma se vaega papa’u e fati mai ai le galu ma e fiafia tagata e faase’e ai -e tau i le pito o le a’au e faafeagai tonu ma le vaega tifa-tō lona lua.

E mana’omia se va’a lelei e malaga ai se tasi i lenei avaava fai togafiti-talu ai e mafai lava i soo se taimi ona tulai mai se faalavelave e ala i le lafo’ia o se tasi i luga o lea papa- pe afai e te fia matamata i le tele o ana o loo i ai.

O Nuulopa lava ia e pei ona iloa ai- o le fanua tanu lea o alii o Manono, aemaise ai lava o le Aiga o Tuilaepa-lea e ta’ua so’o e Misi Sitea ma Misi Viliamu le tagata e igoa o Matātau e faapea o se tagata o lea aiga. O le itu i sauté o loo i ai se nofoaga tele o ana e mafua mai le natura ae na toe faalapopo’a e lima o tagata.

E faigofie ona ‘ausia ia nofoaga e vaa, ae ui o lea- o ia ana uma ua leai ni mea o totoe ai. O loo i ai ni ma’a papa taape laiti- o le tasi o loo i le itu i matu, ae o le isi o loo i sisifo. E tusa ai la ma le pese a Manono; fai mai Misi Sitea ma Ella o “Manupufanua” o se suafa matai o Manono, ae o le faaletonu o loo i ai- fai mai o le Tapunuu poo le Tapuafanua lea o le suafa “Lei’ataua Lesa.”

ADVERTISEMENT

O Manono, Malie ma Safotulafai e faae’eina atu le suafa Malietoa; ae o le Sa’o Aoaluma - o lona Aiga o  Tooa; ae o le Saoaualuma o Manono e peiseai e fia malie ai -fai mai o le “Suniula”.

O Upu Ta’oto la o Manono fai mai:- Tulouna Oe Aiga i le Tai; Tulouna lo Oulua Faa-Itu; Tulouna Le’iataua ma Lei’ataua; Susu mai Lau Susuga Lei’ataua Lesa o le Tapunuu; Tulouna le Aiga Sa Mutimuti ma le Matua o Vaisagote; Tulouna lau Tofa Futi; Tulouna Lau Susuga Lei’ataua Le Tauā ma le Fale-lima o Alo o Sapapa; ma le Matua o Vaī; Tuouna le Falefa o Salua; Tulouna Lua Susuga Taupa’ū ma Mulipola; Tulouna lau Susuga Luatutu; Tulouna le Aiga Satuilagi; Tulouna Pologama ma lau Susuga Tuilaepa-o le alo o Malietoa; Tulouna le Tulafale o Lau Fetalaiga Auapa’au.

APOLIMA: O le motu itiiti  o Manono, lea e 2 kilomita mai Nuulopa; o le gutu lea o se mauga-mu ua mate -ma o loo taoto i le itu i matu o le moana- e mafai ona sao i ai tagata pe a sa’o ona faitau galu.

E faigata tele ona ulufia le ava lea e tusa ma le 50mita le lautele, ae taofi e se vaega o le papa e igoa o Papaloto, ona maua ai lea na o sina avanoa itiiti i le ava e pei o se ala o se gata; o le itu i sisifo o loo i ai se vili. Talu ai e fati sa’o lava galu i totonu o le ava; o le faafitauli muamua lava i le itu i sisifo –o le pipisi a’e o le sami (vili) ma o se tulaga faigata lea mo vaa.

O luma ane o le vili o loo i ai se pito papa e igoa o “Paugaluga”, o ona luma ane i le agai i le sami le papa  o “Tautulioso”; o le vaega lenei- e tofu mea uma ma le igoa; o le pito i sisifo ma le pou i sasa’e -o loo i ai se Vili e igoa o “Togitu” lea e masani i taimi o taua ona tutu ai se molī ina ia mautinoa ai se fesoasoani mai Savaii.

O lou aga’i ane i luga mai “Togitu”-e va iti lava le auala, ae vave ona e taunuu i se nofoaga e igoa o “Vaivai” lea e masani ona maua ai se lavea’i pe o se nofoaga matamata i taimi o taua. O lau vaai mai lea nofoaga e te iloa atu ai le matagofie o le motu o Nuulopa, Manono ma Upolu.

Afai la ua e sao mai lea auala, e vave ona e taunuu i se vaipuna lapotopoto, e tusa ma le 100 mita lona lautele; ae o lona pito atoa i sauté o loo taoto ai se nuu. O le itu i matu o lea ala e te vaaia ai le pisi o le sami i luga o le papa- o “Nu’ule’ale’a” lea poo le nuu e vave ona mou ma aveese e galu o le sami.

Fai mai o le Alii Atimalala o Werner lea na ia kapeteniina le va’a o le “Ariadne” i le va o nei pupū ma Apolima -ma sa faamata’u ai tagata o Manono ma latou iloa ai le le malu o le ‘olo o pupū i Apolima. O le vaa o le Ariadne o se vaatau lea o Siamani sa taamilo i le Vasa Pasefika i lea taimi.

FN
By Fuimaono Na’oia Faasavalu Touli F. Tupua, 17 June 2016

Related Stories


Bg pattern top

Sign in for free to read more stories

Bg pattern light

UPGRADE TO PREMIUM

Subscribe to Samoa Observer Online

Enjoy access to over a thousand articles per month, on any device as well as feature-length investgative articles.

Ready to signup?