O LA’U TALA FO’I

10 August 2016

1. Matauina i Tala Fou le maoa’e o le tupe e le o mafai ona maua mo le Falepuipui fou i Tanumalala-ae o loo taofi lava le Minisita -e mafai lava ona faatino lea faamoemoe. 

Fai mai e na o le miliona e tasi le tupe mo lea faamoemoe mai le Tala o le Tupe a le Malo…!O lona uiga la-afai e le o maua se tupe mo lea falepuipui fou i Tanumalala-o lona uiga la-o le a matua sa’oloto lava pagota i le o i totonu ma fafo o le falepuipui. 

Afai ua leai se tupe e fai ai lea falepuipui-o lona uiga la-o le a sa’oloto lava pagota ia i le taimi e fia o ai i fafo ma le toe o i totonu poo le le toe o lava i totonu. 

Afai la ae toe tupu mai se isi faafitauli-o ai la e tatau ona tuua’ia? Afai la e le o mamafa i le Malo lea mataupu-o le faaupuga sa’o la-e leai se falepuipui fou e faia-ae faitalia le atunuu ia ma le puipuiga o latou mai pagota! O le a sou taofi? 

2. Ua tai le ‘asa le aso ma le faalavelave tau taavale e tupu mai-ma o ia faalavelave-ua afaina ai nisi-talu ai le le faautauta lelei o avetaavale. Afai la o le tulaga lea o le a tatou alu ai-o le a la le mea e o’o i ai? E le o lilo i le atunuu le tulaga i le taimi nei ona ua lelei auala. O le saoasao o taavale ua le mafai ona faatonutonuina. 

ADVERTISEMENT

O le pogai-ua toatele avetaavale talavou-ma o avetaavale na-e le manana’o e mulimuli i tua o isi taavale-ona o le mana’o ia faailoa atu le saoasaoa o lana taavale.

Afai la ua le mafai lava ona faafoeina lenei faafitauli-atonu ua tatau loa ona faaaoga le Malae lea o loo i Tuana’imato e fai ai tuuga-taavale a tagata ia e fiafia i lea tulaga-a lavevea ai lava latou-lavevea ai pea ae saogalemu le toatele o le atunuu o loo tausisi i le saoasaoa faatulagaina!

Afai e le mafai-ia atonu ua tatau loa ona matua fai su’ega mo avetaavale uma-ina ia latou iloa lelei ai tulafono tau feoaiga i ala tetele-ona ono faaitiiti ai lea o le faafitauli o loo i ai nei! O le a sou taofi?

3. Matauina i nisi o magā-ala i Sinamoga, Alafua ma faasolo atu ai i le USP, Se’ese’e ma Tuana’imato-nisi o galuega sa faatinoina i luga o ala tetele-e pei o le ‘eliina o vaipaipa fou ma isi lava mea. 

O le tulaga ua vaaia pea-e na ona uma lava o ia galuega-ona o lea o i latou na faia-e aunoa ma le fai faalelei poo le toe tanuina lelei., Ua aliali mai la- e na ona fai lava ia uma le galuega-ona tanu lea tusa lava pe le o lelei-ae o lava ae tuu ai….!

Afai la o nei galuega o loo totogi e le Malo ia kamupani-masalo o le mea muamua sa tatau ona fai-o le o lea o le matagaluega poo le faalapotopotoga e ou lea galuega-e siaki poo lelei ona fai-ona faatoa totogi ai lea. 

Ae o le matau i le tele o galuega e faatino i luga o auala-o le tele o taimi –e uma loa ona o lea ae le o lelei ona toe tanu ia gatasi lea pu sa ‘eli-aemaise ai lava pe afai sa fai lea galuea i luga o le alatele. 

Afai la o tupe a tagata totogi lafoga ia o loo totogi ai nei galuega ma isi mea uma lava-e tatau la ona o muamua e siaki poo lelei ona fai le galuega-ona faatoa totogi ai lea-leaga o le afu maligi o tagata totogi lafoga lea e totogi ai ia mea uma!  O le a sou taofi? 

10 August 2016

Related Stories


Bg pattern top

Sign in for free to read more stories

Bg pattern light

UPGRADE TO PREMIUM

Subscribe to Samoa Observer Online

Enjoy access to over a thousand articles per month, on any device as well as feature-length investgative articles.

Ready to signup?