Lauga - Talitonu ma talia Iesu Keriso i lou loto

RP
By Rev. Petaia Setu, 17 December 2017

E le tutusa uma loto o tagata. O nisi e faigofie; o isi e faigata; a o isi foi e femoumoua’i. E iai tagata latou te le talia; e le ‘asa foi ē masalosalo; ae iai lava foi nisi e talitonu faamaoni. O le mau a Samoa mai anamua, o le inati to o le afioaga o Auala, o le i’a o le manini. O le meaalofa na tuu mo Papa ma Puleia, o le igaga. A o Pu’apu’a, sa faamanuiaina i le anae laugutu mūmū. O tua atu o tala tuu o Samoa, na faailoa ai le faamaoni o le Atua ia Aperaamo, i se tama tane (Ken.18:9-10). Ou te mana’o la Samoa, e te vaai lelei i tala ia ua tā’ua, ma e mafaufau filemu, pe afua i se a ona sapi i nei faamanuiaga. Auā ’a ’e fai mai o le talimālō, - Lelei! Ae o le fesili la, O fea e faapogai mai ai le talimālō lelei? Ae lē o le loto ua talitonu – e lelei? (Mat.22:39). Ae lē ona ua talia i le loto – e lelei? (Mat.10:42).

O le vaai lea ma le maitau a le atalii o Sepetaio i uiga ma loto faaalia o tagata Iutaia, i le 33 tausaga o Iesu i le lalolagi nei. Fai mai Ioane, na teena e ona lava tino. E le i talia e ona lava tagata (f.11). “A o i latou uma e na talia o ia, ma faatuatua i lona suafa, na ia avatu iai o lea manuia, ia avea i latou ma fanau a le Atua.”

Fanau a le Atua?? O ai? O oe? O oe o se fanau a le Atua? E faapefea ona maua e oe se manuia faapena pe afai o loo e fiafia pea i le pouliuli (f.5)? E mafai faapefea sea mea pe afai e te le i iloa lava Iesu Keriso (f.10)? Afai foi e iloa e le gutu, ae inoino iai le loto, e faapefea la ona e fai mai o oe o le fanau a le Atua (f.11)?

O le upu moni lava, Na o i latou ua talia o Ia, ma faatuatua (talitonu) i lona suafa (f.12).

O le ‘autu’ o le tatou lauga, o le ‘autu’ foi lea o le Tusi atoa a Ioane le atalii o Sepetaio,  le soo na mulimuli ane faaaunua i le motu o Patamo, ona o lona talitonuga, ma lona talia atoatoa o le Alii o Iesu Keriso, o le Alo lava Ia o le Atua (Ioa.20:31)

A silasila i le folasaga o le Tusi nei o Ioane (1:1-18), E tatala lava le Tusi nei i se fesili faapea: Se a sou taofi i le Keriso? (Mat.22:42). Se atalii ia o ai? Auā e pei lava ona mua’i tā’ua, e eseese loto ma manatu o tagata. Fai mai Iutaia, o le atalii o le kamuta (Mat.13:55). Fai mai foi Mataio, o le atalii o Tavita (Mat.01:01). O le mau a Luka, o le atalii o le Tagata (Luk.3:38). A o Ioane, o le Alo o le Atua. O le tali lea o loo totonugalemu ai le folasaga (Ioa.01:01-18) , ina ia talitonu ma talia e Iutaia – o Iesu Keriso, o le Mesia lea na valoia; ina ia talitonu foi ma talia e nuu ese, - o Iesu Keriso, o le Alo o le Atua. O le talitonuga faa Isalama, o Iesu Keriso o le perofeta tagata. E le o se Atua; e le o se Alo foi o le Atua. A o oe, se a sou oe manatu?

E le nenefu le vaai a Ioane i le Alo o le Atua. Na matua faaali atoa e Iesu Keriso lona mamalu ma lona silisili ese ma lona moni ia Ioane i le motu o Patamo. A o le uiga foi o le igoa o Ioane – “E mamalu lava Ieova”

Samoa, o le mamalu atoa o le Tusi nei, o loo taoto i uluai fuaiupu e sefulu ma le valu o lenei Tusi. A o le faaeaina o le tagata faatuatua, o le avea ma fanau a le Atua. O le tagata talitonu, o le tagata lea ua ia faamuamua le Atua i mea uma lava ua manatu ia iai.

Ou te le o fai atu ina ia faamuamua le lotu, poo le au failotu – Leai! A o le Atua, o Lē Amiotonu ia, tatou te faia ai mea tonu uma, i le moni ma le faamaoni e tusa ona finagalo lava ia iai. O tatou Samoa, tatou te talitonu ia Iesu Keriso, peitai, ua tele ina tatou faaaoga la tatou faa Samoa e faapogisaina ai lea talitonuga.

E oo lava i le ekalesia; e folafola Iesu Keriso o le Alo o le Atua, ae aumai le va fealoaloa’i, e folamua ai mana’o o le lalolagi o loo i tua. E faapefea ona tatou talia o Iesu Keriso?

E leai lava se isi faamoemoe o le afio mai o le Atua i le lalolagi e ala ia Iesu Keriso. Na afio mai ia te oe! Na afio mai e laveai oe ma a’u. Na afio mai lava Iesu na te tauave o tatou tiga ma o tatou leaga. Ia faaolaina i tatou i Lona alofa tunoa (Isa.53:4-6). Ioe, o lona alofa tunoa, o luga o le satauro (Ioa.19:30). O lona faamaoni, o lona manumalo i le oti (Mat.28:06).

Ua atu fia ona e olegia o le Atua? Ua tatou le miga lava e faaaoga le Suafa Pele o lo tatou Alii Faaola e mailei ai o tatou mana’o. O lou talitonuga lenā i le Alo o le Silisili Ese? E lelei tele le toaga i le lotu. Ae ua le natia foi le tele o le suiga ua iai le tele o lotu. 

ADVERTISEMENT

Na alu atu i le lotu o mamā le loto ma fiafia; ae foi mai ua maumau le Aso Sa ma foliga faasiasia! Aisea? Toe vaai iai! Mafaufau ma tatalo. Afai ua manu’a lou loto o le feau moni o le talalelei mo lou faaolaina, Aleluia! Viia le Alii! Manatua foi o le mamalu lena o Iesu Keriso o loo faailoa mai e Ioane (f.9). Talitonu iai ma talia Iesu Keriso o le Alo o le Atua, o le malamalama moni lea.

E ao foi ina toe vaai tatou le au molimau, poo fea tonu o loo faamamafa i le feau? Poo le finagalo o Lē ana le feau, poo lou lava tuinanau?

Ua faigata ona talitonu le toatele ona o le toatele lava, ua ese lava le feau e folafola, ae ese foi isi mea na e faapoga! Ta’u sa’o i tagata le Iesu Keriso o loo molimauina e Ioane. O lona uiga paia, o lona finagalo paia,  ma lana amio paia, ma lona soifua paia. A manino le atunuu i le faamaoni lea, ona mălie lea o le ola talitonu, ma talia ma le loto fiafia.

O le taui? Se a sona taunuuga? O le manuia – e avea ma fanau a le Atua! Oka se maualuga o lenei faaeaea! O le tagata ua talitonu ma talia Iesu Keriso, ua le pisia i leaga o le lalolagi, ua le nanamu i tuinanau o le tagata, a o le Atua le olaga i aso uma (f.13).

Uso e, o ’e talitonu ea, poo e faaopeopea? 

O ’e talia ea Iesu i lou loto, poo lenā lava e te ola faavalevalea? 

E le i vaai se isi i le Atua ua faavae ai Samoa; a o Iesu Keriso, o le alo e toatasi o loo i le fatafata o le Tamā, o ia ua na faailoa mai le Atua ia te i tatou (f.18). O foliga, o uiga, o le amio, o le natura uma lava o le Atua, sa tautala, sa galue, sa faaalia uma lava e Iesu i lona soifuaga faale tagata. O ia foi ua tusa ma le Atua e le vaaia, o le ulumatua o mea uma lava ua faia (Kol.01:15). Fai mai Ioane, Sa i le amataga, sa i le Atua, o le Atua lava ia. Sa i le Atua i le amataga…. (Ioa.01:01-05).

Samoa e, pe mata e talia le Alii, Lē na maliu mo i tatou? Pe e te talitonu o lona maliu o le faataitaiga lea mo oe ma a’u i le loto faamagalo, ina ia fai i tatou ma fanau a le Atua? (Mat.05:44-45).

Se a lou manatu? O fea lou loto? A o a’u, ou te talitonu foi ia Iesu Keriso o lona Alo lava e toatasi ma lo tatou Alii, o Lē na faatupuina e le Agaga Paia, na fanau mai lava e Maria le taupou. Na faasatauroina, na maliu, na falelauasi; na ia afio ifo i Hetesi. Na toe tu mai o ia i lona po tolu; na ia afio a’e i le lagi. O loo afio mai ai i le aao taumatau o le Atua le Tamā, e ona le mana uma lava;  na te toe afio mai ai lava e faamasino i e ua ola atoa foi ma e ua oti…

Pe le o Iesu Keriso ea lea le Alo o le Atua Soifua, na te faaolaina oe ma lou aiga? Ioe, talitonu nei loa ma talia o Ia i lou loto, ona ia avatu lea ia te oe o lea manuia – ia avea ma fanau a le Atua.

 

Amene

 

7737063/7783782

RP
By Rev. Petaia Setu, 17 December 2017

Related Stories


Bg pattern top

Sign in for free to read more stories

Bg pattern light

UPGRADE TO PREMIUM

Subscribe to Samoa Observer Online

Enjoy access to over a thousand articles per month, on any device as well as feature-length investgative articles.

Ready to signup?