Mafatia ona o le utiuti o le suavai

SS
By Sarafina Sanerivi, 07 December 2016

O le suavai o le ola. 

A leai se suavai, o le a leai foi se ola. O le ala lea e utiuti ai loa le suavai, ona a’afia ai lea o le ola o tagata. 

O le fa’afitauli lea o lo’o feagai pea ma aiga o lo’o alala i le alalafaga o Leusoalii. 

I le fa’atalatalanoaga a le Fofoga o Samoa ma se tasi o tina mai le afioaga o Leusoalii, le tina ia Luma’ava Ta’uai, na ia ta’ua ai, ua fai lava sina leva o feagai pea le latou afioaga ma lenei fa’afitauli.

“Ua leva tele o feagai si o matou nu’u ma lenei fa’afitauli. 

“O le mea le iai se’iloga lava e timuga fa’atoa lelei laia o le suavai e maua. Ae a leai loa se timu aemaise o le vaitaimi mūgalā, ona faigata loa lea ona maua se suavai. 

ADVERTISEMENT

“Ia e pei la o lenei foi vaitau i le vevela o le la, e tausaili lava se ofe o maua ai se suavai ona o uma lea iai e la’u mai ai paelo vai.”

Na ia ta’ua foi, ua tele lava le mo’omia o se fesoasoani i le fa’aleleia o lea tulaga mo le latou nu’u. 

“Ua fai si leva o feagai pea le matou nu’u ma lea fa’afitauli. 

“A iai foi la sesi o lo’o fia fesoasoani mai isi o matou afioaga, o le a talia lava ma le agaga fa’afetai. Ua faigata lava le mea nei ona maua se suavai lelei ona o le la ma le vevela o iai le tau i Samoa.”

Na ia ta’ua foi, a maua foi le suavai, e iai lava nisi taimi e iloa ai le le saogalemu o le vai o lo’o taumafaina. 

“E ese le faigata o le leai ose vai. O isi taimi, e fa’alogoina ai lava le manogi o le ele, ai ona pau lava lea o le vai o lo’o totoe i le fa’atanoa o lo’o fa’aaogaina nei e le matou nu’u. 

“O isi taimi ta te masalosalo ai lava o le mafuaaga lea e mama’i ai nai fanau iti ona o le suavai.”

Na fa’aalia foi e le tina ia Luma’ava, e na te le’o mautinoa po’o ua ave se talosaga a le nu’u ina ia fa’aleleia le tulaga o suavai maua i Leusoalii.

“Ae o le moni lava, o lo’o fai lava si faigata o le tau sailiga lea o vai lelei mo le afioaga nei. E lelei lava mea uma, se’i vagana ai le tulaga na.”

SS
By Sarafina Sanerivi, 07 December 2016

Related Stories


Bg pattern top

Sign in for free to read more stories

Bg pattern light

UPGRADE TO PREMIUM

Subscribe to Samoa Observer Online

Enjoy access to over a thousand articles per month, on any device as well as feature-length investgative articles.

Ready to signup?