Mae’a le Vaega Muamua o le Galuega – Malosi Fa’afouina mai le la

SS
By Sarafina Sanerivi, 26 May 2016

O le a fa’asaoina le tasi-tesi-iva miliona lita o le suauu-tiso e fa’aalu i le gaosiga o le eletise i tausaga ta’itasi, aua o lea ua mae’a le Vaega e Pu’eina ai le Malosi-fa’afouina o le La, i le Malae-tutu’u i Faleata.

O le tatalaina aloa’ia fo’i o le Fale e Pu’e ai le Malosi o le La (e 2.1 MekaUati le malolosi), ua tu-lalata ai nei Samoa i le fa’ataunu’uina o ana fuafuaga tu’u-mamao, o le ‘ausia lea o le 100 pasene o le malosi fa’afouina mo le atunu’u.

O lea fa’amoemoe ananafi, sa fa’atinoina i le Malae Tutu’u i Faleata ma sa ‘auai le Ali’i Palemai, Tuila’epa Sa’ilele Malielegoi, o Minisita o le Kapeneta ae maise sui o matagaluega ma fa’alapotopotoga a le Malo, o malo mai fafo ae maise pa’aga aua le fa’amanatuina o lea fa’amoemoe lelei.  

I se Pepa o Fa’amatalaga sa tu’uina mai, o lo’o fa’alauiloa ai, o le galuega ua mae’a nei, o  le vaega muamua lea o le poloketi e 5.2 meka-uati o le malosi fa’afouina mai le la. Ua fa’amautuina ai le mana’o o le malo o Samoa, ia o’o atu i le 2017, ua ‘ausia le 100 pasene o lo’o tulimata’ia, o le fa’aaogaina o le malosi fa’afouina mai le la. 

O le Susuga a Tuila’epa Sa’ilele Malielegaoi sa saunoa e momoli le fa’amalo i le Vaega o le ‘Solar for Samoa’ ona o le galuega fita sa latou fa’atinoina.

“Ua ‘ou fiafia lava ona ua mae’a le poloketi lea ma ua sauni mo le fa’aaogaina,” o saunoaga ia a le Ali’i Palemia. 

ADVERTISEMENT

Na ta’ua e le Palemia, ‘o le Solar for Samoa’ o le ulua’i kamupani lea na lagolagoina e le malo mo le una’ia o le mana’o ia 100 le fa’aaogaina o le malosi fa’afouina.

“Sa ave iai la matou lagolago ona sa fa’amalieina le Kapeneta i a latou fuafuaga sa tu’uina atu,” o lana fa’aaliga lea. 

“Ua tele lo tatou fa’alagolago i le malosi e maua mai suau’u palapala ma ua matua taugata tele fo’i ae maise e tele ona sao i le fa’aleagaina o le tatou si’osi’omaga,” o lana saunoaga lea.

“O le mafuaga lea o le fa’atauaina ai i le taimi nei, le fa’aaogaina o le malosi mai le la, e leai ni a’afiaga e maua mai ai.

 “O le malosi mai le la, e maua pea lava pea i aso ta’itasi uma e oso ai le la. E le gata e manuia ai tagata faipisinisi ta’ito’atasi ma le atunu’u, ae silisili ona manuia ai lo tatou si’osi’omaga ma o lo tatou sao lena e tete’e atu ai i fesuia’iga o le tau ua va’aia nei.” 

O le Fa’atonu o le Konekarate o le Solar for Samoa, o Terrence Betham sa fa’afetaia le malo ona o lana lagolago ma le tofa na laga’i.

“Matou te fa’afetai tele i le Malo o Samoa, ae maise lava le ta’ita’iga a Lau Afioga a le Ali’i Palemia, le lagolago mai Matagaluega ‘ese’ese ma Fa’alapotopotoga e aofia ai le Malosi Tau Eletise ma le Matagaluega o Tupe, mo le fa’alauiloaina o lenei poloketi mo le Itulagi o le Pasefika,” o lana fa’aaliga lea.   

 “Ua matou fiafia tele ua mafai ona ausia lenei vaega aupito taua i le tala-fa’asolopito o le malo o Samoa, o le fa’aaogaina lea o le malosi’aga e mama ma saogalemu mo le si’osi’omaga, ua atagia ai le galulue va-va-lalata o le Solar for Samoa ma le Fa’alapotopotoga o le Malosi Tau Eletise.

Na fa’ailoa e Aaron Hawkins o le kamupani o le Solar for Samoa, o le tau atoa o le poloketi lea, e i se vaega o le ono-miliona tala ($6 miliona tala).

SS
By Sarafina Sanerivi, 26 May 2016

Related Stories


Bg pattern top

Sign in for free to read more stories

Bg pattern light

UPGRADE TO PREMIUM

Subscribe to Samoa Observer Online

Enjoy access to over a thousand articles per month, on any device as well as feature-length investgative articles.

Ready to signup?