E le fou sauaga i totonu o aiga.

O lea le finagalo fa’aalia o Vaitu’utu’u Apisaloma i le Fofoga o Samoa i le fa’atalatalanoaga i le aso ananafi.

“Ia o a’u ou te tete’e lava i lea tulaga e pei ona silafia ai, e leai lava se tulaga fo’i lea o alu aga’i lalo le numera o i latou ua ‘a’afia, o le uiga o la’u tala ia o le taumafai ai pea lea ina ia  e tete’e atu i sauaga i so’o se itu e tatou te iloa e alagatatau.”

“O lo’u iloa i ai, ia e afua mai lava mea uma i totonu o le si’osi’omaga i aiga ma o se itu e ao lava ona silasila i ai aua e tele se ‘a’afiaga i le to’atele ai o tatou tagata.”

“O le uiga o la’u tala, o sauaga nei e ono avea o se tulaga fo’i le le e ta’amilomilo lava i totonu o aiga, ma e mafai ona pasi atu i lea augatupulaga i lea augatupulaga pe afai ae tuai ona fai i ai se fuafuaga.”

“E pei o la’u ia lea mau i ai, ma lo’u iloa i ai.”

Na ia fa’ailoa e ao lava i le to’atele o nai o tatou tagata ona silasila mamao pea.

“Ia masalo ona o le tele o sauaga ua fa’atupula’ia mai lenei taimi, ia na leai lava ni tulaga fa’apea na tutupu mai la aso  i lo’u iloa i ai.”

“O le uiga o la’u tala e faigofie mea uma  i le taumafai ai lea ona fo’ia muamua fa’afitauli i totonu lava i aiga latou ia.”

“Ina ia mafai ona silasila pea i ai aua le aga’i atu ai le lumana’i aemaise o le tulaga masani lava o le manuia lautele o tagata uma.”

“Aua a mafai ona foia le taimi lenei, o lona uiga o le a fesoasoani tele lava i le agai atu ai le lumana’i.”

Na ia fa’ailoa o le tele o suiga nei ua fa’apea ona fesoasoani tele i le tele o vaega ua i ai nei.

“Ia e pei o lea lava le tulaga o lo’o ua i ai nei, e le tele lava nisi vaega e ao ona o tatou silafia lelei, e tele lava ‘a’afiaga o nai fanau aemaise o latou uma ona o sauaga.

“O lea e ao ai lava ona tete’e atu i ai.”