Aso fa'apitoa mo Tagata Palota

09 March 2018, 12:00AM

Taoto pea ia sa o le vao filifili, e faigata o Samoa o le ao mamala aua e talatau Toga ae talatofi Samoa. O le Sa fa'aufigatᾱ, o le ma'a foi e le fa'afuagalu e iloa ai le vaeluaga o le tai. I le tafatolu o lau faigamalo aua paia faaleaganu'u, o paia fa'a le malo ae tainane mamalu fa'aletalalelei aua le au faigaluega totofi a le Atua i so'o se tafa o Samoa.

Susu lau Susuga le Ta'ita'i o le Sauniga, Afifio Minisita o le Kapeneta, Afifio Malo Fa'aaloalogia mai atunuu i fafo, fa'auluuluga o Matagaluega ma Fa'alapotopotoga Tuma'oti o faipa'aga ma le Ofisa o Faiga Palota ma Samoa ua potopoto, aemaise alo ma fanau mai Kolisi ma Autalavou ua lautogia mo le fa'amoemoe o lenei tausaga.

O lenei aso fa'apitoa ua atofaina e le tatou Malo, e fa'ataua ai le ASO MO TAGATA PALOTA. O le tausaga lona lua lenei ua faia ai lenei aso fa'apitoa e fa'ataua ai tatou tagata palota ma le tatou sao i faiga filifiliga a le Atunuu mo le filifilia o ona ta'ita'i fa'alemalo.

I le mae'a ai o le tele o tatou Faiga Palota ua mavae, e mae'a loa Faiga Palota ona maoga atu lea o talatalanoaga e faia ai seia vagana foi ua toe latalata mai le isi Faiga Palota.

Ma o le ala foi lea e alai ona tele fa'afitauli i tatou Faiga Palota ona o le le lava o se taimi e tatau ona fa'atalatalanoa ai so'o se mataupu e patino i aia ma tiute o o tatou tagata e tatau ona faia pe a o'o i taimi o Faiga Palota.

Ua matauina ma le fa'anoanoa le fa'atuputupulaia pea o le maualuga o le fuainumera o tupulaga talavou o e le o resitalaina e avea ma tagata palota. O lona uiga o lea mea, o lo o to'atele fo'i tupulaga talavou e le o faia so latou sao po'o se latou leo i le filifilia o ta'ita'i o le tatou atunu'u.

Ae o le tele o taimi lea tatou te faitau ma fa'alogologo ai ile tele o a latou faitioga i mataupu o lo o a'afia ai lo latou soifua. Ae foliga mai e latou te le o fa'atauaina tonu le avanoa taua lenei o Faiga Palota e auala mai ai so latou leo.

O le ala lea ua matou filifilia ai le sini autu o lenei tausaga ua fa'aulutalaina e fa'apea; "UNAIA LE AUAI O TUPULAGA TALAVOU I FAIGA PALOTA."

O le manulauti tulitliloa a le Ofisa o le Komesina o Faiga Palota o lo o atagia ai le fa'amoemoe ia talisapaia e o tatou tagata e aofia ai ma tupulaga talavou le fa'atauaina o lou aia tatau e filifili ai o tatou ta'ita'i e ala i Faiga Palota.

O le fa'amuamua pea o fanau aoga ma tupulaga talavou i lenei polokalame, ina ia taumafai pea e toto i mafaufau ma loto o le fanau le taua ma le aogᾱ o le faia o filifiliga sa'o ma le fa'amaoni.

E valu aoga o le a fa'atinoina le tauvaga lauga i lenei aso; 4 Kolisi mai Savaii, 4 le motu nei Upolu.

O le debate po'o le fa'atauaiga o manatu o le a fa'atino lea  e tupulaga talavou mai le EFKS i Vaitele Uta ma le autalavou mai le Metotisi i Matafele.

E fia fa'aleo le agaga fa'afetai i Fa'afeagaiga o Autalavou,  Fa'auluuluga o aoga, matua, tupulaga talavou fa'apea foi ma alo ma fanau aoga aua le auai mai i lenei fa'amoemoe.

O le tou auai mai ua fa'amautinoa mai ai ia te a'u nei ma le Ofisa o Faiga Palota, o lo 'o i ai se naunauta'iga ina ia faia ni suiga lelei mo tatou palota mo le lumana'i e ala lea i le fa'aauauina o fa'atalatalanoaga o mea nei o Faiga Palota a'o le'i taitai o'o mai le i si Faiga Palota.

E iai le talitonuga o le a aoga polokalame fa'atino o lenei aso i mafaufau o tupulaga talavou ina ia si'itia ai le auai i faiga filifiliga a le Atunuu.

Se taimi tuuama le fua ma tatala le filialii, agalelei le Atua i le toe taliu atu i nu'u ma aiga.

Soifua.

09 March 2018, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>