Anoanoa’i le ‘Au-fa’atuatua e talitonu i fa’aaliga

08 April 2016, 12:00AM

Ua salalau le mau fa’amatalaga i Samoa nei ma atunu’u mamao, e uiga i le tama’ita’i-talavou fa’apea o lo’o ia tau’aveina fa’ailoga o Le Mesia i taimi o Ona puapuaga. O le a sou finagalo? Na fesiligia e Deidre Fanene, i polokalame masani a le Samoa Observer – Talanoaga i le Ala o le aso, le mamalu o le atunu’u, ma o nisi nei o finagalo na fa’aalia:

Ioe, ‘ou te matua talitonu lava i ai aua o tatou o le atunu’u Kerisiano ma e le o le taimi muamua fo’i lenei ua va’aia ai ni fa’ailoga fa’apea i lo tatou atunu’u. O lo’u lava manatu, e le o le tagata e ‘auala mai ai le fe’au, a’o le fe’au ua ‘aumai ‘aua ‘ou te talitonu i Le Atua ma, afai o Lona finagalo lea ua ‘auala mai i lea teine-talavou, ‘ou te lagona la, ua tatau ona tatou nofo-sauniuni uma iai.

 

Ou te talitonu i mea sa tautala ai le teine ae maise o lana ta’utinoga fa’apea, na va’ai i le lagi ma seoli. O a’u o se tagata-Kerisiano ma o mea uma lava na saunoa iai, o lo’o i totonu lava Tusi Pa’ia. E ao ona tatou nofo sauniuni mo le toe Afio mai o le Keriso ma afai la na ‘auina mai e Le Atua, ‘ou te manatu ua tatau ona tatou talitonu uma i mea sa ia fa’amatala.

 

Fa’atoa ‘ou fa’alogo iai ina ua pisa tagata ae ‘ou le’i va’ai tino iai nei mata, ae ui  lava i lea, ‘ou te talitonu iai. Se ‘aua le va’ai i le tagata na ‘aumaia le fe’au ae silasila ma le toto’a i le taua o le fe’au ua ‘aumai. Lea tatou te fa’atalitali uma i le toe Afio mai o Iesu ma afai ua filifili e Le Atua le teine lea e avea ma Ana ‘ave-fe’au, ‘ou te iloa lava e tatau ona tatou fa’alogo uma ma talitonu iai, i mea uma ua na fa’aalia

E ia se fe’au taua i le mea lea na ‘auala mai le teine-talavou, e ‘ese’ese uma lava o tatou lagona ma manatu, a’o a’u lava ia, ‘ou te matua talitonu i ana fa’aaliga uma. O le mea aupito taua, o ia o se tama’ita’i ua fa’amanuiaina, ua fa’atino ia te ia a’o talavou ae maise o le iai o lona talitonu ma le fa’atuatuaga e tala’i le ‘upu e ui i le tele o tala a tagata o lo’o fai iai.

 

E ‘ese’ese lava manatu fa’aalia o tagata i le mata’upu lea ae ia a’u lava ia, e le o le  tagata a’o le fe’au. O le mea lena ‘ou te matua talitonu ai i le fe’au, tu’u le tagata ae talitonu i le fe’au sa ia momoli mai mo tatou uma.  

 

Afai lava o se fa’aaliga lea mai Le Atua, ua tatau ona tatou talitonu atoatoa iai ma tapena iai o tatou tagata mo Lona toe Afio mai. ‘Ou te talitonu i fa’aaliga uma ua fa’aalia ae maise le fe’au ua na momoli mai mo tagata uma ma ua ‘ou sauni fo’i mo le toe Afio Mai o le Keriso Manumalo.

08 April 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>