Ua lamatia le Tuuga Fautasi

LT
By Lanuola Tusani Tupufia, 29 April 2016

O se tasi o sauniga e aupito i sili ona fiafia i ai tagata i le faagasologa o le Faamanatuina o le Tuto’atasi- e ono mafai ona le toe faatinoina ona o le le fiafia o ‘auva’a o le atunuu.

Na matua manino mai lea tulga i le faagasologa o se fono na fai e le Komiti o Tuuga Fautasi  o lona 54 o Tutoatasi i le Aso Lua lea e na o le toatolu  ni sui auai o ‘auvaa o fautasi na ai. 

O Kapeteni mai le Telefoni o le Vainuu mai Manono, Little Rina ma le Don Bosco 200-ona pau ia o i latou na faaalia lo latou fiafia i ai. O le fautasi na manumalo i le tuuga fautasi o le tausaga talu ai-Le Tolotolo o le Tama Uli mai Salelologa- e le’i auai.

Ina ua fesoota’i atu i ai mo se manatu faaalia ananafi, fai mai le Kapeteni o Pauli Ivan Williams-na te le iloa sea fono. Ina ua fesiligia pe o fiafia le ‘au-vaa e auai i le tuuga fautasi o lenei tausaga-fai mai Pauli e faalagolago lava i le nuu.

 “Ou te alu i Savaii i le faaiuga o le vaiaso ma o le a ‘ou fesili i le nuu ma le ‘auvaa e uiga i lo latou faamoemoe. Ae pei lava ona ‘ou fai atu, ou te le iloa lea fono. Ou te le’i maua ia faasalalauga. O loo lava pea le taimi, e toe lima vaiaso ona aulia lea o lea aso”.

ADVERTISEMENT

O se sui auai o le Komiti ma o le Komesina Lagolago o Leoleo, o Fauono Talalelei Tapu na fai mai o le a tuuina atu e le latou komiti se latou lipoti ma se fautuaga i le komiti autu.

“Afai o le tulaga lea o le a i ai(e na o le to’atolu sui e auai) o le a matou tuuina atu la matou lipoti i le komiti autu e silasila i ai pe aoga le faaauau pea o lea tuuga,” o le faaaliga lea a Fauono.

“E le o ia i matou se pule e faaleaogaina ai lea tuuga-ae o le a matou lipoti atu ia i latou le tulaga o loo matou i ai. E mafua ona e le o se mea manaia ma avea ma tuuga tauva pe afai e na o le tolu fautasi….matou te mana’omia a itiiti mai o le ono poo se numera faapena.”

E tusa ai ma Fauono, o le le fiafia i ai o tagata atonu o se mea lea e faasino i tapenaga poo e le o ia i latou se fautasi lelei mo le tuuga. Na ia teena le manatu e faapea ua le fia auai ‘auvaa ona o faailoga.

Na ta’utino e Fauono e faapea o le faailoga tau tupe aupito i maualuga-e matua tele lava-e afua mai le $30,000 i le $10,000-e le aofia ai faailoga faaopoopo. O le isi itu, na ia faamatalaina e faapea ua mae’a ona auina atu se tusi valaau i Leone ina ia auai i le tuuga-ae latou te le’i tali mai.

Sa faailoa mai e le Komesina Lagolago e faapea ua faailoa atu e le Little Rina ia i latou e faapea ua ia i latou se ‘auvaa e mafai ona latou aloina le tolu fautasi ae leai ni o latou vaa.

“Na faailoa mai ia i matou e na o le tasi lo latou vaa-ma e manaomia nisi vaa se lua ona o le toatele o le latou auvaa,” o le faaaliga lea a Fauono.Ae peitai-o se mataupu lena e tatau ona latou faatinoina talu ai e le gafa le komiti ma ia tapenga ma e le talafeagai foi.

Ae ui o lea-ua uma ona latou faailoa mai o le a latou talosagaina Father Ricky-ma matou te le’i maua se tala e uiga i lena tulaga. E lima fautasi na tauva i le tuuga o le tausaga talu ai. O le vaiaso lava talu ai i Amerika Samoa, na faaleaogaina ai e le teritori lana tuuga fautasi mo le Aso o lana Sisiga-Fu’a. 

LT
By Lanuola Tusani Tupufia, 29 April 2016

Related Stories


Bg pattern top

Sign in for free to read more stories

Bg pattern light

UPGRADE TO PREMIUM

Subscribe to Samoa Observer Online

Enjoy access to over a thousand articles per month, on any device as well as feature-length investgative articles.

Ready to signup?