“O le fa’amuamua lea a le Falepuipui ma le ‘Au’aunaga o le Ola Toe Fuata’ina, o le fa’amalieina lea e latou o latou lava mana’oga” – Minisita o Falepuipui, Tialavea Tionisio Hunt

Ua matua sologa lelei ma alualu i luma le Nofoaga mo Tupulaga i Oloimanu talu ona fa’avaeina e le malo, i le lima tausaga talu ai.

O le taimi nei, na o le fia o’o lava i Oloimanu ae va’aia le mata’utia  o galuega  a le Tamaloa Pule o Taefu Niko Vili Ifopo ma lana vaega ma le 300 eka o ‘ele’ele na fa’amatu’u iai mo lea nofoaga aua le toe fuata’ina o ola o tupulaga-talavou ua molia i le tulafono.   

Toeititi a leai se vaega o le fanua o totoe i Oloimanu ona o le tele o le fa’ato’aga ua iai nei, na una’ia ma fa’afoe e le ta’ita’i-leoleo.

“Ua ‘uma lelei ona matou toto le 300 eka o le fanua, o le toga-fala, o taro, niu, manioka, fa’i ma o lo’o talia i le taimi nei se ioega a le Matagaluega o Fa’ato’aga ma Faigafaiva mo le koko ma le kofe matou te ‘auai ai le ponesi aua le toe fa’aolaolaina o le koko ma le niu,” o le fa’aaliga lea a Taefu.  

“E iai fo’i le matou fa’atoaga i’a o le tilapia. A gafatia lava ma maua le fa’asoa, o le a tilotilo fo’i i le fa’ateleina o itu tau lafumanu pei o pua’a, moa, mamoe ma povi. 

“O se fa’amanuiaga lea le iai o le lagolago a le matou Minisita – Tialavea Fea Leniu Tionisio Hunt)  ma le ta’ita’iga e si’itia ai fo’i le tulaga o le Falepuipui ma le ‘Au’aunaga o le Ola Toefuata’ina ia ma gafatia taulima ma lava mea’ai mo le nofoaga nei. 

“Leai se mea e popole ai i se ‘aufaigaluega aua e sili i le 60 tagata tino-malolosi,” o le fa’aopoopo mai lea a Taefu ma fa’amanino mai le soifuaga o iai lea nofoaga, e fa’aigoa pagota ma tagata uma, o tamaiti-a’oga.

“O le to’afitu o a matou tamaiti-a’oga o lo’o va’aia le ma’umaga taro e 100 eka i Tanumalala, le nofoaga o le a fausia ai le falepuipui fou.

“O le fuafuaga lena, ia amata ane le falepuipui fou, a ua iai le malosi’aga matou te fafaga ai le silia i le 600 pagota ma fa’aitiitia ai fo’i le fa’alagolago i tupe a le atunu’u lautele.”

Na ioeina fo’i e le Minisita Lagolago o Falepuipui, o So’oalo Mene le mo’omia o nisi ‘ele’ele mo le aga’i i luma.  

 “E $300,000.00 tala le tala o le tupe mo mea’ai mo le falepuipui,” o le fa’aaliga lea a le Minisita. “E le taitai gafatia ai le tausiga o le silia i le 600 pagota i Tafa’igata am Oloimanu, ae le taulia ai Samoa, mo le 12 masina i le tausaga. 

“E matua mo’omia tele la le suia o le ola-fa’alagolago, ae to’a’aga e toto fa’ato’aga e tua iai. 

““O le fa’amuamua lea a le Falepuipui ma le ‘Au’aunaga o le Ola Toe Fuata’ina, o le fa’amalieina lea e latou o latou lava mana’oga” – Minisita o Falepuipui, Tialavea Tionisio Hunt

 “A ‘ausia le tulaga lena, o le isi la’asaga e tilotilo iai, o le sa’ilia o tupe, faiga fa’apa’aga ma isi vaega o le malo mo atina’e ma tupe maua, o faletalimalo ma pisinisi i le taulaga,” o le fa’aaliga lea a le Minisita. 

“O le fa’amuamua i le taimi nei, o se fa’ato’aga lafumanu papalagi ma o lo’o tilotilo ia Tupe Teu a le Falepuipui e fa’atau ai ni manu e fa’aopoopo i le lafu e 20 o lo’o totoe.

“O le Teuga tupe lea, o tupe-maua mai le fa’atauina o fua o fa’ato’aga sa galulue ai pagota. 

 “O le fuafuaga lea, o o’o loa ina tulaga lelei mai mea uma, ua iai vaega o lo’o mo’omia, o le a mafai loa ona fa’agaioia le falepuipui mai tupe-maua, e le gata mo le fa’atinoina o tulaga mo le ola toe fuata’ina ae fa’amautuina ai fo’i le avea ma tagata-nu’u aoga mo aiga, nu’u ma ekalesia, pe a tu’ua le falepuipui ma magalo.”