E selau ma selau sui o le Ekalesia Kerisiano o le Worship Centre o lo’o tumutumu i Samoa i lenei vaiaso.

O lo’o fa’atasi mai mo le “Fonotagga mo le Agaga Pa’ia”, lea na tatala aloa’ia i le po o le Aso Sa, i le Faleta’alo Numera 1 i Tuana’imato. O le 11 ai lenei o tausaga o lea fono-fa’aleTausaga a le Ekalesia.

O le ta’ita’i le Ekalesia, le Aposetolo o Viliamu Mafo’e sa tatalaina aloa’ia lea fa’amoemoe.

“O le Fonotaga mo le Agaga Pa’ia, o se va’aiga mai Le Atua,” o lana fa’aaliga lea. “Ae talu ai o se va’aiga mai Le Atua, o tatou o lana fanau ma lana ekalesia, e ao ona tatou usita’ia ma fa’aauau pea Lona finagalo i le lalolagi nei.”

O le fa’amoemoe ‘autu lava,o le toe fa’amalosia lea o le soifua fa’aleAgaga o sui o le Ekalesia, ia toe fa’afouina ma fa’aopoopo lo latou malosi  ina ia mafai ona fa’aauau pea le tala’ina o le ‘Upu a Le Atua. 

“O se avanoa mo o matou tagata e fa’a’aupegaina ai fa’aleAgaga a’o fa’alogologo ma a’oa’oina atili i le ‘Upu a Le Atua.

“O le vaiaso la lenei, e mo ‘Oe ma ‘Oe ma a’u nei ina ia matua fa’atumuina i le Agaga Pa’ia ma ia papatisoina i le afi. ‘Ou te tatalo fo’i ina ia aveale Fonotaga ma le Agaga Pa’ia ia o-fa’atasi ma olaina fa’atasi ma lou soifua i aso ta’itasi. 

“Pei ona fai mai o le Tusi Pa’ia, e fa lava vaega o le loloto o le iai o le Agaga Pa’ia,” o lana fa’aaliga lea. “O le vaega e gata i tapuvae, o le tulivae, lou manava ma le lona fa, o le fa’atumuina atoa o ‘Oe ma lou soifua e le Agaga Pa’ia, ma le-mafai ai ona e tu pe a’au fo’i.”

Ma talosagaina fo’i e le Susuga a Mafoe sui uma o le Ekalesia, ina ia ta’ita’ia latou uma e le Agaga Pa’ia ma ia fa’aaoga tatau saunoaga ma fe’au fa’aleTusi Pa’ia o le a saunoa iai nisi o to’oto’o o le Fonotaga ua tapena mo lenei vaiaso.