Tele tupe fa’asili mai meleni

VM
By Vatapuia Maiava, 07 January 2017

“Ia o le uta lenei o meleni na taunu’u mai Samoa nei mai Toga i le vaitau o le Kirisimasi.” Muta’aga Samau,  38 le matua o le soifua o le afio’aga o Levili.

O le aso ananafi na maua ai le fa’atalatalanoaga ma Muta’aga ma na ia fa’ailoa ai le tele o se tupe ua mafai ona maua mai i le vaitau o le Kirisimasi e o’o mai le taimi lenei.

“Ia a fika atu ai, e tusa ua $30,000 le tupe ua i ai le taimi lenei , ma ua amata ona uma le container lenei.

“O se tasi o ma fa’auo Toga lea o lo’o sau ai le uta lenei, ma ua maitauina le tele o faletalimalo ua omai ma o latou fa’atauina meleni.

“O le Aso Gafua na se’i mavae atu nei, e tusa  ma le $1000 le tupe na mafai ona maua mai ae o le Aso Lulu e $700.

“O le taimi lenei o lo’o ua o ma titilo ma le tamā o le aiga e totō meleni i lo matou fanua o lo’o i Fagali’i.

ADVERTISEMENT

“I lo’u ia iloa i ai e tele atu tupe e maua mai meleni toe tupe vave nai lo nisi o fua o fa’ato’aga o lo’o fa’atauina nei i Samoa.

Na ia ta’ua o le taimi lenei e le to’atele nisi o fa’atau lumāfale vaega nei se’i vagana ai faletalimalo ma nisi o pisinisi.

“Ia ua ou titilo lava a’u ia i le tupe lenei e maua mai meleni, o se tulaga lelei tele mo Samoa pe afai latou te taumafai e totō i le taimi lenei.

“O lea fo’i le mana’oga e pei ona fa’ailoa atu o lo’o ua ma talatalanoa ai, o le amata lea ona fa’amili fatu nei.

“O lo’o omai fo’i lava tagata e fa’atau ia o lo latou manaoga lava lea e tasi o lo’o i ai, ia mafai lea ona totō ma ia fua mai se taimi vave.

“Ia e tau mai nei o lo’o ua savali i le selau ma ona tupu le tupe ua maua a lea e le’i taitai le aso, o nisi o fa’atau e usu mai lava masalo oni fa’atasiga o aiga ma ni fa’alavelave o lo’o o latou fa’aaogaina.

“O le tau lea le taimi lenei o lo’o amata atu i le $10 aga’i luga, ma o lo’o maitauina lava le tele o le mana’omia o lenei fuāla’au aina i le atunu’u.

“Talosia ae ua amata ona va’ava’ai ai nisi mo le totōina o meleni nei.

VM
By Vatapuia Maiava, 07 January 2017

Related Stories


Bg pattern top

Sign in for free to read more stories

Bg pattern light

UPGRADE TO PREMIUM

Subscribe to Samoa Observer Online

Enjoy access to over a thousand articles per month, on any device as well as feature-length investgative articles.

Ready to signup?