Aua le fa’avaivai!
“Ua leva ona avea a’u ma fai fa’ato’aga.” Le tamā i a Tanielu Pati o Le’auva’a Uta i le fa’atalatalanoaga ma le Fofoga o Samoa i le aso ananafi.
O le 57 o le matua o lona soifua, e le’o avea lea ma mafua’aga e fa’avaivaia ai lona ola galue aua lava le tausia ai o lona aiga.
“Ia ua fai si tele o tausaga o fai lava lenei galuega tau fa’ato’aga ma e le fou lea galuega mo a’u…ia ma e pei ona e va’ai atu nei , ia ua toeititi lava matua le tele o kapisi nei.
“Ia o lea ua fa’amama le pito nei aua e le’i leva ona la’u kapisi sa tōtō i le vaega lea mo le maketi e fa’atau atu ai….ma o lo’o taumfai e fa’atumu atu paelo nei mo kapisi.
“Ia o le fa’amoemoega tele lava e pei ona ta’ua muamua e mo aiga lava ma lona tausiga.
Na ia fa’ailoa fo’i le tele ai lea o tupe maua o le aiga ona o le fa’ato’aga o lo’o taumafai ai o ia ma le aiga.
“Ia o le masina o Me na amata ai vaega nei.” o lana saunoaga lea.
“Ia o le fuafua lelei lava o vaega e fa’atau atu i le maketi i le taimi e iloa ai ua lelei le tau o le tele o vaega.
“E ese le lelei o le tupe e maua mai i kapisi nei, aemaise lava le taimi e tatau ona fa’atau ai.
“O lo’u atali’i e nonofo ma lona to’alua i Aleisa na ia sau ma amata le tōtōina o fuāla’au ‘aina nei.
“Ia ua alu nei i Niu Sila ae o lea ua o matou fa’aauauina ai lava e o’o mai i le taimi lenei.
“Ia e leai lava se isi mea e o lua ma le fiafia i le a le galuega o lo’o fa’atinoina, o le uiga o la’u ia tala, a e fiafia lava i au galuega e faigofie mea uma.
“O lea fo’i le tulaga e pei ona i ai i le taimi lenei, ia e mo le atia’e lava o nai aiga. “E tele lava le tupe o lo’o mafai ona maua, e pei o le Aso To’ona’i na ave fo’i ma fa’atau atu isi kapisi e tusa ma le $300 le tupe na maua, ma e fa’apena fo’i i le Aso Sa.
“Ia o le vaivai lava , e ala ai ona fiu gofie i nisi taimi, ae o le tulaga lava ia e tatau ona i ai o le finafinau pea.