O le Lupe Uluiva a Tuisamoa

31 August 2016

Mai le Tusi o le “Suaga a le Vaatele”

O Tuife’ai –o le uluai Tui Samoa lea-na nofoia le itu i sauté o le Tuamasaga. Na taunuu le Tuisamoa i le itu i sauté o le Tuamasaga ma fausia ai loa lona maota e “Tasi le Pou.” O le pogai lena na maua ai le igoa o le nuu o “Poutasi.” 

O le maota o Tuisamoa sa i Poutasi-o lona igoa o “Mata-Tamali’i, “ ma sa i ai foi ma ana Lufilufi. O le laoa o Lufilufi o lona igoa o “Faleolupe”-e faa-faletui ai le Faleupolu. O Faleupolu sa fausia lea nofoaga o le “Lupeuluiva a le Tuisamoa.” O le tala i le “Lupeuluiva”fai mai na alu le faiva o le Soga o le Tuisamoa i le tasi aso-ma maua ai le i’a o le Ulua. 

Ina ua polo le i’a-sa maua i le folo o le i’a le ‘fua o le lupe’. 

O le fua lea na ave faa-fofoa i le vai o Vaimo’oia-i gauta ane lava o le maota o Tuisamoa i Poutasi. Ona faitau lea o po-po tasi, po lua, po tolu, o loo ua po fa, po lima, po ono, po fitu, po valu, o loo ua po iva. “O la’u lupe ua fofoa i le “Vaimo’oia.” Ona faasaga lava lea o Tuisamoa e tausi lana Lupeuluiva. 

Ua o’o i le tasi aso, ua sola ese le lupe. Ona saili lea e soga o le Tuisamoa i tagata na latou fetaia’i pe le’i maua se tala i le lupe. Sa faapea mai tagata-o le lupe o loo lele sa’o lava i Safata.O iina na maua ai le igoa o le eleele o loo i ai nei o “Talamaua.” 

Ua alu pea le tuliloaga o le Lupesiliva. Ua fetaia’i i laufanua o Siumu ma isi o loo malaga mai aga’i i Sasa’e. Sa toe fesili soga o Tuisamoa pe latou te le’i maua se tala i le lupe. 

ADVERTISEMENT

O le tali-o le lupe o loo lele sa’o lava i sisifo. O le pogai lena o le faaigoa o le ogaeleele o loo i gatai o Saaga o “Tala-ale-lupe”-aua o iina na maua ai e soga o le Tuisamoa le tala i le lupe. Ua lele pea le lupe-a ua fai pea le galuega a Soga o le Tuisamoa e tuliloa. Tuliloa, tuliloa ae ua lele lava le lupe i Salafai, ae ua le fo’i ai lava soga o Tuisamoa-ua tuliloa pea. O le tala o loo taofi i ai Falealili-na o’o le lele  a le Lupeuluiva i Aopo. I lea la taimi-o loo galue le tagata Aopo, o loo to-tiapula. 

E faapea le tala ua te’i lea tagata Aopo-ua pogisa le La-e pei ua ufitia i se ao-ma le ta a’e i luga o lana ‘oso-ae lavea ai le lupe-ua pa’ū i lalo ma mate. O loo alu pea le tuliloaga a soga o Tuisamoa. E maua atu-ua gase le Lupeuluiva. E le’i faatali Soga o Tuisamoa a ua faasaga atu loa fasi le tagata Aopo. Fai mai isi taofi-sa tausi lava le Lupeuluiva i Sogima’a le Maota o Tuisamoa i Vaovai Falealili. 

O le Maota o Sogima’a fai mai talatu’u-sa vao i le laau o le Aume-lea e ofaga ai le Lupeuluiva ma tuufua ai. O le Alii o Tuisamoa e tele ona suafa. O lona ulua’i suafa o ‘Tuifiti’-toe suafa ia ‘Tuife’ai’-ae mulimuli ai suafa i le Tuisamoa.Fai mai le Talatuu na malaga mai Tuifiti poo Tuife’ai mai Fiti. 

A’o malaga mai i Samoa-sa na aoina matagi vale ma tu’u i totonu o lana Pupū. 

Ina ua taunuu i Samoa-sa feiloa’i ma le Tupu o Malietoa-ma foa’i i ai lana Pupū-lea na ao uma i ai matagi. 

O le pogai lea o le suafa o le Faleupolu o “Aoimatagi” poo “Auimatagi” o le Malietoa. O le faafetai a Malietoa i le Tuifiti ona o le meaalofa o le Pupū-Matagi-o lea na sui ai loa e Malietoa le igoa o e Tuifiti i le Tuisamoa-ma tuuina atu ia te ia le itu i sauté o le Tuamasaga e nofo ai.!

 

31 August 2016

Related Stories


Bg pattern top

Sign in for free to read more stories

Bg pattern light

UPGRADE TO PREMIUM

Subscribe to Samoa Observer Online

Enjoy access to over a thousand articles per month, on any device as well as feature-length investgative articles.

Ready to signup?