O nisi faamaumauga faaopoopo o le tala faasolopito o Samoa

31 August 2016

Tapena ma Tuufaatasi e Fuimaono Na’oia Faasavalu Touli F. Tupua mo le Samoa Observer. Aso Lulu 31 o Aokuso 2016.

1930-Na taunuu mai ai le Vaatau o le “Dunedin.” Na faailoa ai foi e faapea o le Mau o se Faalapotopotoga solitulafono.

1931-Na suitulaga ai Brigadier-General Hart ia Colonel Allen e avea ma Pule o Samoa.

1933-Na toe taliu mai ai i Samoa Nelesoni. Na maliu ai foi Mr. Gurr i Pago Pago, ae toe saisai ai Nelesoni ona o ni moliaga e faapea o loo auai i le faagaoioiga o le Mau.

1934-Na toe falepuipui ai Nelesoni ma faa-aunuua mo le 10 tausaga.

1935-Na tuumalo ai Mata’afa Salanoa. Na tulai mai ai foi le faiga-malo a le Leipa i Niu Sila. Na asiasi mai ai le Savali a le Palemene o Niu Sila i Samoa ma fono ma le Mau.

Na teena ai le Faaaliga Faalaua’itele e faapea o le Mau o se faalapotopotoga solitulafono. Na soloia ai foi aitalafu tau lafoga o tupe maua ma faaleaogaina ai lafoga a tagata ta’ito’atasi. Na tonu ai o le a tofia ni sui usufono Samoa e to’afa- ae le o le to’alua i le Fono Faatonu, ma o le a faaopoopoina foi le aofa’i o Fautua mai le 2 i le tolu. E ao ina toe filifili ni faipule, ia tofia se Faamasino Lagolago Samoa, ia i ai se komiti o tupe e aofia ai ni tagata Samoa-e iloiloina faamatalaga tau tupe a le malo, ia faateleina galuega tau le soifua maloloina ma a’oa’oga. Na toe taliu mai ai foi i Samoa Nelesoni i le M.V. Matua ina ua amata ana malaga i atumotu.

1937-Na tuumalo ai le Afioga i le Fautua o Tuimalealiifano. O Pulenuu ia sa tofia muamua, o le a filifilia lava e nuu.

ADVERTISEMENT

1938-Na tofia ai Tupua Tamasese e avea ma Fautua. Na amata ai A’oga Maualuga a le Matagaluega o A’oga i Leifiifi, ma faavaeina ai le “Aoga Faafaia’oga fou mo Faia’oga.

1939-Na tu’ua ai le malo e Lana Susuga Malietoa Tanumafili I. Sa na umia mo le 41 tausaga lea suafa maualuga o Samoa. O ia o le Tupu mulimuli o Samoa na aloa’ia. Na tula’i mai ai foi le Taua Lona Lua o le Lalolagi i le aso 3 o Setema. Na faatonu ai foi e Niu Sila Samoa ina ia faatu sana Fitafita e puipuia o ia.

1940-Na tofia ai-i le aso 8 o Tesema Malietoa Tanumafili II e avea ma Fautua.

1941-Na osofa’ia ai e Iapani Pearl Harbour. Na taunuu mai ai Maligi Amerika i Samoa ma fausia le Malae Vaalele i Faleolo-ma le ala faalava mai Leulumoega-tuai i Lefaga. Sa faamamalu ai foi ma le Vavao i Samoa atoa.

1942-Na osi feagaiga ai le Ministry of Food a Peretania ma Samoa -o le a na faatauina le Popo a Samoa.

1943-Na faamaonia ai e le Pule o Samoa-o Mr, Turnbull o se tausaga faamanuiaina lea mo Samoa e ala i totogi ma le faaopoopoina o tau o oloa e gaosia i totonu o le atunuu.

1944-Na tuumalo ai le Afioga a Taisi Nelesoni. Na asiasi mai ai le Kovana Sili o Niu Sila o Sir Cyril Newall-e talanoaina le talosaga a Samoa mo sona Malo Tuto’atasi.

1945- Na taunuu mai ai Peter Fraser, le Palemia o Niu Sila i lena taimi- e toe talanoaina le talosaga a Samoa mo sona Malo Tuto’atasi. O le taimi foi lea na auina atu ai tamaiti sikolasipi i Niu Sila. Na uma ai foi le taua i le Pasefika.

1947-Na taunuu mai ai le Vaega Su’esu’e a Malo Aufaatasi i Samoa e su’esu’eina lana talosaga mo se Malo Tuto’atasi. Sa fofola ai foi e Niu Sila ana fuafuaga mo le a’oa’oina o tagata Samoa i ala ma faiga tau pulega-malo tu-to’atasi. (Sa mulimuli ane ona talia e Malo Aufaatasi (Organisation Trusteeship Council)ata o ia fuafuaga. Ua uma ona pasi e Niu Sila le Tulafono o le Samoa Amendment Act, e faatino ai fautuaga mo le Malo Tuto’atasi.

1948-Na tuumalo ai Mata’afa Faumuina Fiame Mulinuu I. Na tofia ai foi Mr. Lambie e avea ma Faatonu Sili o le Matagaluega o A’oga. Na sisi ai faa-fualua le Tagavai a Samoa ma le Fu’a a Niu Sila i Mulinuu. Na feiloa’i ai le ulua’i Fono Aoao Faitulafono ma le malaga asiasi mai i Samoa-a le Kovana o Niu Sila o Sir B. Freyberg V.C. 

31 August 2016

Related Stories


Bg pattern top

Sign in for free to read more stories

Bg pattern light

UPGRADE TO PREMIUM

Subscribe to Samoa Observer Online

Enjoy access to over a thousand articles per month, on any device as well as feature-length investgative articles.

Ready to signup?