I le to’atele o tagata Samoa e le talia le amio le pulea a nisi o tamaiti e fa’atau a latou oloa i le taulaga, o Siliato Fuamaila o ia o se tasi o fanau e ese mai lava.

E 17 ona tausaga ma e sau o ia mai Tufuiopa ma sa ia ta’ua i lana fa’atalatalanoaga ma le Fofoga o Samoa, o ia e fiafia lava e ola galue aua se lumana’i manuia o lona aiga.

“Ou te iloaina a le inosia o nisi o matou ia e fa’atau oloa i luga o le auala ona o amio le pulea a isi ae o a’u a ia ma le olaga sa ou ola mai ai, o le ola fa’aaloalo,” o lana tala lea i le Fofoga o Samoa.

“O lo’u tina o ia lea e ave ma fa’ata’ita’iga mo a’u.

Sa ta’ua e Siliato o lona tina o le tama ma le tina o le aiga aua sa ola mai o ia i se olaga e leai sona tama.

Sa fa’atau oloa o ia i se taimi ua leva ma e to’atele fo’i tagata e iloaina lenei tamaitiiti. 

O lo’o a’oga nei o ia i le kolisi a Sagato Iosefo i Alafua ae o lo’o fa’atau oloa o ia i le taulaga i lenei taimi aua o lo’o tu’ua a’oga.

“O la’u galuega a lea ou te fesoasoani ai i lo’u aiga ma a na ou faia, aua ou te mana’o e fesoasoani atu i le tau atina’eina o lo’u aiga. 

“E lagona lava lo’u fia galue i lo’u va’ai atu i le latou galue malosi ma o le galuega faigofie lea ou te faia, e faigofie ia a’u a ia.

“E maua a le $500 mai le fa’atauina o oloa ia ma e ave uma lena tupe i lo’u tina e fesoasoani ai i lo’u pili aoga ma mea e mana’omia i le aiga. 

“E manaia a lea galuega aua ua to’atele a tagata ou te masani ai ma maua ai uo.

Sa ta’ua fo’i e Siliato e fia avea o ia ma se tama lakapi pea matua.

“Pau a le mea o lo’o ou taumafai ai lenei taimi, o le faiga lelei o le aoga ia manuia.

“E fia maua so’u lumana’i manuia aua o la’u vaai atu lenei vaitaimi, to’atele tamaiti ua le mafai ona toe a’oa’i e matua.

“O isi ua ola i le olaga ulaula tapa’a ma le inu pia. 

“Ou te le fia ola i lena olaga, ma o le mafua’aga lena o lo’o ou taumafai malosi ai ia lelei la’u aoga ma ola lelei lo’u aiga.

Sa ta’ua e Siliato o ia sa faigaluega i le Apollo Cinemas ma o lo’o iai fo’i tusitusiga a le Samoa Observer i le aso 8 o Fepuari 2017, e fa’amaonia ai lana ia ta’utino mai. 

“Sa ou lagona a le fiafia i le taimi sa ou faigaluega ia i le Apollo Cinemas.

“E fa masina sa ou galue ai i lenei pisinisi, amata mai le fa’asino ino o itu e paka ai ta’avale ma aga’i atu a i le tulaga la lea o le fa’asinoina o nofoa e nonofo ai tagata i totonu o le fale tifaga. 

“E $200 la’u tupe maua i le vaiaso ma e ave uma i lo’u tina lena tupe. 

“Ou te fa’afetai a a’u ia i la’u uo lea sa maua ai la’u galuega.

Sa fa’apea mai Siliato “Ou te fautuaina le to’atele o tupulaga e to’aaga i le aoga ae aua le fiafia e ola i le olaga ula tapa’a ma le inu pia aua e leai se lumana’i lelei e maua ai.